Page of ms. P: _ Page of ms. L: 336R [მაშინ ჰრქუა მათ იესუ:] ნუ გეშინინ თქუენ, წარვედით და უთხართ ძმათა, რაჲთა წარვიდენ გალილეად და მუნ მიხილონ მე.
და ესენი ვითარცა წარვიდეს, და, აჰა, ესერა, დასისა მისგანნი შევიდეს ქალაქად და უთხრეს მღდელთმოძღუართა მათ ყოველი ესე, რაჲცა იქმნა.
ხოლო იგინი შეკრბეს მოხუცებულთა თანა, ზრახვა-ყვეს, ვეცხლი დიდძალი მისცეს ერისაგანთა მათ.
და ჰრქუეს: ესრეთ თქუთ, ვითარმედ მოწაფენი მისნი ღამე მოვიდეს და წარიპარეს იგი, ვიდრე ჩუენ მეძინა.
დაღაცათუ ესმას ესე მთავარსა მას, ჩუენ ვარწმუნოთ, თქუენ უზრუნველ-გყვნეთ.
ხოლო მათ მიიღეს ვეცხლი იგი და ყვეს, ვითარცა Page of ms. L: 336V ისწავეს მათგან. და განითქუა სიტყუაჲ ესე ჰურიათა შორის, ვიდრე დღევანდელად დღემდენ.
ხოლო ათერთმეტნი იგი მოწაფენი წარვიდეს მთასა მას ზედა, გალილეას, სადაცა უბრძანა მათ იესუ.
ვითარცა იხილეს იგი და თაყუანის-სცეს მას, ხოლო რომელნიმე შეორგულდეს.
მოვიდა მათა იესუ და ეტყოდა: მომეცა მე ყოველი ჴელმწიფებაჲ ცათა შინა და ქუეყანასა ზედა.
წარვედით და იმოწაფენით ყოველნი წარმართნი და ნათელსცემდით მათ სახელითა მამისაჲთა, ძისაჲთა და სულისა წმიდისაჲთა.
და ასწავებდით მათ [დამარხვად] ყოველი, რავდენი გამცენ თქუენ. და, აჰა, ესერა, მე თქუენ თანა ვარ ყოველთა დღეთა, ვიდრე აღსასრულამდე სოფლისა.
