ჰრქუა უფალმან უფალსა ჩემსა, დაჯედ მარჯუენით ჩემსა, ვიდრემდის დავსხნე მტერნი შენნი ქუეშე ფერჴთა შენთა.
კუერთხი ძლიერებისაჲ გამოგივლინოს შენ უფალმან სიონით, და უფლებდე შენ შორის მტერთა შენთა.
შენ თანა არს მთავრობაჲ დღეთა ძლიერებისა შენისათა, მბრწყინვალებასა წმიდათა შენთასა; საშოჲთვე მთიებისა წინა გჳშევ შენ.
ფუცა უფალმან და არა შეინანა. შენ ხარ მღდელ უკუნისამდე წესსა მას ზედა მელქიზედეკისსა.
უფალი არს მარჯუენით შენდა, შემუსრნეს დღესა რისხვისასა მეფენი;
საჯნეს წარმართნი და აღავსნეს მძორითა შემუსრნეს თავნი მრავალთანი ქუეყანასა ზედა.
ნაღუარევისაგან გზისა ასუას; ამისთჳს აღამაღლოს თავები.
