გთნდა, უფალო, ქუეყანაჲ შენი, მოაქციე ტყუე იაკობისი.
მიუტევე უსჯულოებაჲ ერსა შენსა და დაფარენ ყოველნი ცოდვანი მათნი.
დააცხრვე ყოველი გულის წყრომაჲ შენი, მოაქციე რისხვისაგან გულის წყრომისა შენისა
მოიქეც ჩუენდა, ღმერთო მაცხოვარო ჩუენო, და გარე წარაქციე რისხვაჲ შენი ჩუენგან.
ნუ უკუნისამდე მრისხავ ჩუენ და ნუ განაგრძობ რისხვასა შენსა თესლითი თესლამდე.
ღმერთო, შენ მოიქეც და მაცხოვნენ ჩუენ, და ერი შენი ვიხარებდეთ შენდამი.
მიჩუენე, უფალო, წყალობაჲ შენი და მაცხოვარებაჲ შენი მომეც ჩუენ.
მესმოდის ჩუენ, რასაცა იტყოდის უფალი ღმერთი ჩუენი, რამეთუ იტყოდა იგი მშჳდობასა ერისა თჳსისასა წმიდათა მისთასა და მათთჳსცა, რომელნი მოქცეულ არიან გულითა.
რამეთუ ახს მოშიშთა მისთა მაცხოვარებაჲ მისი დამკჳდრებად დიდებაჲ მისი ქუეყანასა ჩუენსა.
წყალობაჲ და ჭეშმარიტებაჲ შეიმთხჳნეს, სიმართლემან და მშჳდობამან ურთიერთას ამბორ-იყვეს.
ჭეშმარიტებაჲ ქუეყანით აღმოსცენდა, და სიმართლე ზეცით გამოჩნდა.
რამეთუ უფალმან მოსცეს სიტკბოებაჲ, და ქუეყანამან ჩუენმან გამოსცეს ნაყოფი თჳსი.
სიმართლე მის წინაშე ვიდოდის, დადვას სლვად გზაჲ თჳსი.
