TITUS
Text collection: NT 
Novum Testamentum iberice
Book: Act. 
Actus Apostolorum

The Old Georgian Version
of the Acts of Apostles
(Oldest Redaction)


On the basis of the edition by
G. Garitte,
L'ancienne version géorgienne des Actes des Apôtres
d'après deux manuscrits du Sinaï,
Louvain 1955
(Bibliothèque du Muséon, 38)
edited by Jost Gippert and Vaxṭang Imnaišvili,
Frankfurt a/M and Tbilisi, 1989-1999;
TITUS version by Jost Gippert,
Frankfurt a/M, 8.2.1999 / 26.12.1999 / 1.6.2000 / 15.12.2002 / 20.3.2007





Chapter: 1 
Verse: 1  Link to gnt Link to armnt   პირველად ესე სიტყუაჲ ვყავ ყოვლისა მისთჳს, ღმრთის მოყუარეო, რომელი-იგი იწყო იესუ საქმედ და სწავლად
Verse: 2  Link to gnt Link to armnt   
ვიდრე დღედმდე ამაღლებისა მისისა ამცნებდა მოციქულთა სულითა წმიდითა, რომელნი-იგი გამოირჩინა, და აღმაღლდა,
Verse: 3  Link to gnt Link to armnt   
რომელთაცა-იგი წარუდგინა თავი თჳსი ცხოველი შემდგომად ვნებისა მისისა მრავლითა სახითა, ორმეოცთა დღეთა ეჩუენებოდა მათ და ეტყოდა სასუფეველისათჳს ღმრთისაჲსა,
Verse: 4  Link to gnt Link to armnt   
თანა-ექცეოდა მათ და ამცნებდა: "იერუსალჱმით ნუ განეშოვრებით*, არამედ მოელოდეთ აღთქუმასა მას მამისასა, რომელი გესმა ჩემგან.
Verse: 5  Link to gnt Link to armnt   
რაჲმეთუ იოვანე ნათელ-სცემდა წყლითა, ხოლო თქუენ ნათელ-იღოთ სულითა წმიდითა არა მრავალთა დღეთა ამათ შემდგომად".
Verse: 6  Link to gnt Link to armnt   
ხოლო რომელნი-იგი შეკრებულ იყვნეს, ჰკითხვიდეს მას და იტყოდეს: "უფალო, უკუეთუ ამათ ჟამთა* კუალად მოაგო სასუფეველი ისრაჱლსა?"
Verse: 7  Link to gnt Link to armnt   
ხოლო თავადმან ჰრქუა მათ: "არა თქუენი არს ცნობაჲ ჟამთაჲ გინა წელთაჲ, რომელი-იგი მამამან* დადვა თჳსითა ჴელმწიფებითა;
Verse: 8  Link to gnt Link to armnt   
არამედ მოიღოთ ძალი მოსლვასა მას სულისა წმიდისასა თქუენ ზედა, და იყვნეთ თქუენ ჩემდა მოწამე იერუსალჱმს და ყოველსა ჰურიასტანსა და სამარიასა და ვიდრე დასასრულადმდე ქუეყანისა".
Verse: 9  Link to gnt Link to armnt   
და ესე ვითარცა თქუა, ვიდრე ხედვიდესღა იგინი, აღმაღლდა და ღრუბელმან შეიწყნარა იგი თუალთაგან მათთა.
Verse: 10  Link to gnt Link to armnt   
და ვითარცა დგესღა და ჰხედვიდესღა იგინი ზეცად ამაღლებასა მისსა, აჰა ესერა ორ კაც ზედა-მოადგეს მათ სამოსლითა სპეტაკითა,
Verse: 11  Link to gnt Link to armnt   
რომელთა ჰრქუეს მათ: "კაცნო გალილეველნო, რაჲსა სდგათ და ჰხედავთ ზეცად მიმართ? ესე იესუ, რომელი აღმაღლდა თქუენგან ზეცად, ეგრევე მოვიდეს, ვითარცა იხილეთ აღმაღლებული ზეცად".
Verse: 12  Link to gnt Link to armnt   
მაშინ მოიქცეს იგინი იერუსალჱმდ მთისა მისგან, რომელსა ჰრქჳან ზეთისხილთაჲ, რომელ არს მახლობელ იერუსალჱმსა ვითარ შაბათის გზა ოდენ.
Verse: 13  Link to gnt Link to armnt   
და ოდეს შევიდეს იგინი ქალაქად, აჴდეს იგინი ქორსა მას, სადაცა იყოფოდეს პეტრე და იოჰანე, იაკობ და ანდრეა, ფილიპე და თომა, ბართლომე და მათეოზ, იაკობ ალფჱსი და სჳმონ მოშურნჱ და იუდა იაკობისი.
Verse: 14  Link to gnt Link to armnt   
ესე ყოველნი იყვნეს განკრძალულ ერთბამად ლოცვასა დედებითურთ, და მარიამ, დედაჲ იესუჲსი, და ძმებითურთ მისით.
Verse: 15  Link to gnt Link to armnt   
და მათ დღეთა შინა აღდგა პეტრე შორის მოწაფეთა და თქუა (იყო ერი რიცხჳთ ერთბამად ვითარ ას და ოც ოდენ კაც):
Verse: 16  Link to gnt Link to armnt   
"კაცნო, ჯერ-იყო აღსრულებად წერილი ესე, რომელი წინაჲსწარ თქუა სულმან წმიდამან პირითა დავითისითა იუდაჲსთჳს, რომელი-იგი იქმნა წინამძღუარ შემპყრობელთა მათ იესუჲსთა,
Verse: 17  Link to gnt Link to armnt   
რამეთუ შერაცხილ იყო ჩუენ შორის, და ხუედრებულ იყო ნაწილი მსახურებისაჲ ამის და მოციქულებისაჲ;
Verse: 18  Link to gnt Link to armnt   
ამან მოიგო დაბაჲ იგი სასყიდელითა სიცრუვისაჲთა, და განსივნა და განსთქდა შორის და განიბნინეს ყოველნი ნაწლევნი მისნი;
Verse: 19  Link to gnt Link to armnt   
და საცნაურ იქმნა წინაშე ყოველთა დამკჳდრებულთა იერუსალჱმისათა, ვითარმედ ეწოდაცა დაბასა მას თჳსითა მით სიტყჳთა მათითა აკალდამა, ესე იგი არს დაბაჲ სისხლისაჲ.
Verse: 20  Link to gnt Link to armnt   
რამეთუ წერილ არს წიგნსა ფსალმუნთასა: "იყავნ საყოფელი მისი ოჴერ და ნუ იყოფინ მკჳდრი მას შინა; და განსაგებელი მისი სხუამან მიიღენ".
Verse: 21  Link to gnt Link to armnt   
ჯერ-არს შეკრებულთა ამათ ჩუენ თანა კაცთაჲ ყოველსა ჟამსა, რომელთა შორის* შემოვიდა და განვიდა ჩუენგან უფალი იესუ,
Verse: 22  Link to gnt Link to armnt   
იწყო ნათლის-ცემითგან იოჰანესისა ვიდრე დღედმდე ამაღლებისა მისისა ჩუენგან, მოწამედ აღდგომისა მისისა** ჩუენ თანა ყოფად ერთი ამათგანი".
Verse: 23  Link to gnt Link to armnt   
და დაადგინნეს ორნი: იოსებ, რომელსა ერქუა ბარსაბა და მერმე ეწოდა იუსტოს, და მატათია.
Verse: 24  Link to gnt Link to armnt   
და ილოცეს და თქუეს: "შენ, უფალო, ყოველთა გულთა მეცნიერო, გამოაჩინე ამათ ორთაგანი ერთი,
Verse: 25  Link to gnt Link to armnt   
მიღებად წილი მსახურებისაჲ, რომლისაგანცა განვიდა იუდა მისლვად ადგილსა თჳსსა".
Verse: 26  Link to gnt Link to armnt   
და მისცეს წილი მათ. და გამოუჴდა წილი მატათიას ზედა და თანა-შეერაცხა ათერთმეტთა მოციქულთა მეათორმეტედ.
Next part



This text is part of the TITUS edition of Actus Apostolorum iberice (Versio sinaitica).

Copyright TITUS Project, Frankfurt a/M, 28.10.2007. No parts of this document may be republished in any form without prior permission by the copyright holder.