TITUS
Vetus Testamentum graece iuxta LXX interpretes
Part No. 1084
Previous part

Chapter: 31 
Verse: 1    Τῇ Μωαβ. Οὕτως εἶπεν κύριος Οὐαὶ ἐπὶ Ναβαυ, ὅτι ὤλετο· ἐλήμϕϑη Καριαϑαιμ, ᾐσχύνϑη Αμαϑ καὶ ἡττήϑη.
Verse: 2    οὐκ ἔστιν ἔτι ἰατρεία Μωαβ, ἀγαυρίαμα ἐν Εσεβων· ἐλογίσαντο ἐπ' αὐτὴν κακά· ἐκόψαμεν αὐτὴν ἀπὸ ἔϑνους, καὶ παῦσιν παύσεται, ὄπισϑέν σου βαδιεῖται μάχαιρα.
Verse: 3    ὅτι ϕωνὴ κεκραγότων ἐξ Ωρωναιμ, ὄλεϑρος καὶ σύντριμμα μέγα
Verse: 4    Συνετρίβη Μωαβ, ἀναγγείλατε εἰς Ζογορα.
Verse: 5    ὅτι ἐπλήσϑη Αλαωϑ ἐν κλαυϑμῷ, ἀναβήσεται κλαίων ἐν ὁδῷ Ωρωναιμ, κραυγὴν συντρίμματος ἠκούσατε
Verse: 6    Φεύγετε καὶ σώσατε τὰς ψυχὰς ὑμῶν καὶ ἔσεσϑε ὥσπερ ὄνος ἄγριος ἐν ἐρήμῳ.
Verse: 7    ἐπειδὴ ἐπεποίϑεις ἐν ὀχυρώμασίν σου, καὶ σὺ συλλημϕϑήσῃ· καὶ ἐξελεύσεται Χαμως ἐν ἀποικίᾳ, οἱ ἱερεῖς αὐτοῦ καὶ οἱ ἄρχοντες αὐτοῦ ἅμα.
Verse: 8    καὶ ἥξει ὄλεϑρος ἐπὶ πᾶσαν πόλιν, καὶ πόλις οὐ μὴ σωϑῇ, καὶ ἀπολεῖται ὁ αὐλών, καὶ ἐξολεϑρευϑήσεται ἡ πεδινή, καϑὼς εἶπεν κύριος.
Verse: 9    δότε σημεῖα τῇ Μωαβ, ὅτι ἁϕῇ ἀναϕϑήσεται, καὶ πᾶσαι αἱ πόλεις αὐτῆς εἰς ἄβατον ἔσονται· πόϑεν ἔνοικος αὐτῇ;
Verse: 10    ἐπικατάρατος ὁ ποιῶν τὰ ἔργα κυρίου ἀμελῶς ἐξαίρων μάχαιραν αὐτοῦ ἀϕ' αἵματος.
Verse: 11    ἀνεπαύσατο Μωαβ ἐκ παιδαρίου καὶ πεποιϑὼς ἦν ἐπὶ τῇ δόξῃ αὐτοῦ, οὐκ ἐνέχεεν ἐξ ἀγγείου εἰς ἀγγεῖον καὶ εἰς ἀποικισμὸν οὐκ ᾤχετο· διὰ τοῦτο ἔστη γεῦμα αὐτοῦ ἐν αὐτῷ, καὶ ὀσμὴ αὐτοῦ οὐκ ἐξέλιπεν.
Verse: 12    διὰ τοῦτο ἰδοὺ ἡμέραι ἔρχονται, ϕησὶν κύριος, καὶ ἀποστελῶ αὐτῷ κλίνοντας, καὶ κλινοῦσιν αὐτὸν καὶ τὰ σκεύη αὐτοῦ λεπτυνοῦσιν καὶ τὰ κέρατα αὐτοῦ συγκόψουσιν.
Verse: 13    καὶ καταισχυνϑήσεται Μωαβ ἀπὸ Χαμως, ὥσπερ κατῃσχύνϑη οἶκος Ισραηλ ἀπὸ Βαιϑηλ ἐλπίδος αὐτῶν πεποιϑότες ἐπ' αὐτοῖς.
Verse: 14    πῶς ἐρεῖτε ᾽Ισχυροί ἐσμεν καὶ ἄνϑρωπος ἰσχύων εἰς τὰ πολεμικά;
Verse: 15    ὤλετο Μωαβ πόλις αὐτοῦ, καὶ ἐκλεκτοὶ νεανίσκοι αὐτοῦ κατέβησαν εἰς σϕαγήν·
Verse: 16    ἐγγὺς ἡμέρα Μωαβ ἐλϑεῖν, καὶ πονηρία αὐτοῦ ταχεῖα σϕόδρα.
Verse: 17    κινήσατε αὐτῷ, πάντες κυκλόϑεν αὐτοῦ, πάντες εἰδότες ὄνομα αὐτοῦ· εἴπατε Πῶς συνετρίβη βακτηρία εὐκλεής, ῥάβδος μεγαλώματος;
Verse: 18    κατάβηϑι ἀπὸ δόξης καὶ κάϑισον ἐν ὑγρασίᾳ, καϑημένη Δαιβων· ἐκτρίβητε, ὅτι ὤλετο Μωαβ, ἀνέβη εἰς σὲ λυμαινόμενος ὀχύρωμά σου.
Verse: 19    ἐϕ' ὁδοῦ στῆϑι καὶ ἔπιδε, καϑημένη ἐν Αροηρ, καὶ ἐρώτησον ϕεύγοντα καὶ σῳζόμενον καὶ εἰπόν Τί ἐγένετο;
Verse: 20    κατῃσχύνϑη Μωαβ, ὅτι συνετρίβη· ὀλόλυξον καὶ κέκραξον, ἀνάγγειλον ἐν Αρνων ὅτι ὤλετο Μωαβ.
Verse: 21    καὶ κρίσις ἔρχεται εἰς γῆν τοῦ Μισωρ ἐπὶ Χαιλων καὶ ἐπὶ Ιασσα καὶ ἐπὶ Μωϕαϑ
Verse: 22    καὶ ἐπὶ Δαιβων καὶ ἐπὶ Ναβαυ καὶ ἐπ' οἶκον Δεβλαϑαιμ
Verse: 23    καὶ ἐπὶ Καριαϑαιμ καὶ ἐπ' οἶκον Γαμωλ καὶ ἐπ' οἶκον Μαων
Verse: 24    καὶ ἐπὶ Καριωϑ καὶ ἐπὶ Βοσορ καὶ ἐπὶ πάσας τὰς πόλεις Μωαβ τὰς πόρρω καὶ τὰς ἐγγύς.
Verse: 25    κατεάχϑη κέρας Μωαβ, καὶ τὸ ἐπίχειρον αὐτοῦ συνετρίβη.
Verse: 26    μεϑύσατε αὐτόν, ὅτι ἐπὶ κύριον ἐμεγαλύνϑη· καὶ ἐπικρούσει Μωαβ ἐν χειρὶ αὐτοῦ καὶ ἔσται εἰς γέλωτα καὶ αὐτός.
Verse: 27    καὶ εἰ μὴ εἰς γελοιασμὸν ἦν σοι Ισραηλ; εἰ ἐν κλοπαῖς σου εὑρέϑη, ὅτι ἐπολέμεις αὐτόν;
Verse: 28    κατέλιπον τὰς πόλεις καὶ ᾤκησαν ἐν πέτραις οἱ κατοικοῦντες Μωαβ, ἐγενήϑησαν ὡς περιστεραὶ νοσσεύουσαι ἐν πέτραις στόματι βοϑύνου.
Verse: 29    ἤκουσα ὕβριν Μωαβ, ὕβρισεν λίαν· ὕβριν αὐτοῦ καὶ ὑπερηϕανίαν αὐτοῦ, καὶ ὑψώϑη ἡ καρδία αὐτοῦ.
Verse: 30    ἐγὼ δὲ ἔγνων ἔργα αὐτοῦ· οὐχὶ τὸ ἱκανὸν αὐτοῦ, οὐχ οὕτως ἐποίησεν.
Verse: 31    διὰ τοῦτο ἐπὶ Μωαβ ὀλολύζετε πάντοϑεν, βοήσατε ἐπ' ἄνδρας Κιραδας αὐχμοῦ.
Verse: 32    ὡς κλαυϑμὸν Ιαζηρ ἀποκλαύσομαί σοι, ἄμπελος Σεβημα· κλήματά σου διῆλϑεν ϑάλασσαν, Ιαζηρ ἥψαντο· ἐπὶ ὀπώραν σου, ἐπὶ τρυγηταῖς σου ὄλεϑρος ἐπέπεσεν.
Verse: 33    συνεψήσϑη χαρμοσύνη καὶ εὐϕροσύνη ἐκ τῆς Μωαβίτιδος, καὶ οἶνος ἦν ἐπὶ ληνοῖς σου· πρωὶ οὐκ ἐπάτησαν οὐδὲ δείλης, οὐκ ἐποίησαν αιδαδ.
Verse: 34    ἀπὸ κραυγῆς Εσεβων ἕως Ελεαλη αἱ πόλεις αὐτῶν ἔδωκαν ϕωνὴν αὐτῶν, ἀπὸ Ζογορ ἕως Ωρωναιμ καὶ Αγλαϑ σαλισια, ὅτι καὶ τὸ ὕδωρ Νεβριμ εἰς κατάκαυμα ἔσται.
Verse: 35    καὶ ἀπολῶ τὸν Μωαβ, ϕησὶν κύριος, ἀναβαίνοντα ἐπὶ βωμὸν καὶ ϑυμιῶντα ϑεοῖς αὐτοῦ.
Verse: 36    διὰ τοῦτο καρδία μου, Μωαβ, ὥσπερ αὐλοὶ βομβήσουσιν, καρδία μου ἐπ' ἀνϑρώπους Κιραδας ὥσπερ αὐλὸς βομβήσει· διὰ τοῦτο ἃ περιεποιήσατο, ἀπώλετο ἀπὸ ἀνϑρώπου.
Verse: 37    πᾶσαν κεϕαλὴν ἐν παντὶ τόπῳ ξυρήσονται, καὶ πᾶς πώγων ξυρηϑήσεται, καὶ πᾶσαι χεῖρες κόψονται, καὶ ἐπὶ πάσης ὀσϕύος σάκκος.
Verse: 38    καὶ ἐπὶ πάντων τῶν δωμάτων Μωαβ καὶ ἐπὶ πλατείαις αὐτῆς, ὅτι συνέτριψα τὸν Μωαβ, ϕησὶν κύριος, ὡς ἀγγεῖον, οὗ οὐκ ἔστιν χρεία αὐτοῦ.
Verse: 39    πῶς κατήλλαξεν; πῶς ἔστρεψεν νῶτον Μωαβ; ᾐσχύνϑη καὶ ἐγένετο Μωαβ εἰς γέλωτα καὶ ἐγκότημα πᾶσιν τοῖς κύκλῳ αὐτῆς.
Verse: 40    ὅτι οὕτως εἶπεν κύριος
Verse: 41    ᾽Ελήμϕϑη Ακκαριωϑ, καὶ τὰ ὀχυρώματα συνελήμϕϑη·
Verse: 42    καὶ ἀπολεῖται Μωαβ ἀπὸ ὄχλου, ὅτι ἐπὶ τὸν κύριον ἐμεγαλύνϑη.
Verse: 43    παγὶς καὶ ϕόβος καὶ βόϑυνος ἐπὶ σοί, καϑήμενος Μωαβ·
Verse: 44    ὁ ϕεύγων ἀπὸ προσώπου τοῦ ϕόβου ἐμπεσεῖται εἰς τὸν βόϑυνον, καὶ ὁ ἀναβαίνων ἐκ τοῦ βοϑύνου συλλημϕϑήσεται ἐν τῇ παγίδι, ὅτι ἐπάξω ταῦτα ἐπὶ Μωαβ ἐν ἐνιαυτῷ ἐπισκέψεως αὐτῆς.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.