TITUS Texts: Vetus Testamentum graece iuxta LXX interpretes

Chapter: 12
Verse: 1 ὁ ἀγαπῶν παιδείαν ἀγαπᾷ αἴσϑησιν,
ὁ δὲ μισῶν ἐλέγχους ἄϕρων.
Verse: 2 κρείσσων ὁ εὑρὼν χάριν παρὰ κυρίῳ,
ἀνὴρ δὲ παράνομος παρασιωπηϑήσεται.
Verse: 3 οὐ κατορϑώσει ἄνϑρωπος ἐξ ἀνόμου,
αἱ δὲ ῥίζαι τῶν δικαίων οὐκ ἐξαρϑήσονται.
Verse: 4 γυνὴ ἀνδρεία στέϕανος τῷ ἀνδρὶ αὐτῆς·
ὥσπερ δὲ ἐν ξύλῳ σκώληξ, οὕτως ἄνδρα ἀπόλλυσιν // γυνὴ κακοποιός.
Verse: 5 λογισμοὶ δικαίων κρίματα,
κυβερνῶσιν δὲ ἀσεβεῖς δόλους.
Verse: 6 λόγοι ἀσεβῶν δόλιοι,
στόμα δὲ ὀρϑῶν ῥύσεται αὐτούς.
Verse: 7 οὗ ἐὰν στραϕῇ, ἀσεβὴς ἀϕανίζεται,
οἶκοι δὲ δικαίων παραμένουσιν.
Verse: 8 στόμα συνετοῦ ἐγκωμιάζεται ὑπὸ ἀνδρός,
νωϑροκάρδιος δὲ μυκτηρίζεται.
Verse: 9 κρείσσων ἀνὴρ ἐν ἀτιμίᾳ δουλεύων ἑαυτῷ
ἢ τιμὴν ἑαυτῷ περιτιϑεὶς καὶ προσδεόμενος ἄρτου.
Verse: 10 δίκαιος οἰκτίρει ψυχὰς κτηνῶν αὐτοῦ,
τὰ δὲ σπλάγχνα τῶν ἀσεβῶν ἀνελεήμονα.
Verse: 11 ὁ ἐργαζόμενος τὴν ἑαυτοῦ γῆν ἐμπλησϑήσεται ἄρτων,
οἱ δὲ διώκοντες μάταια ἐνδεεῖς ϕρενῶν.
Verse: 11a ὅς ἐστιν ἡδὺς ἐν οἴνων διατριβαῖς,
ἐν τοῖς ἑαυτοῦ ὀχυρώμασιν καταλείψει ἀτιμίαν.
Verse: 12 ἐπιϑυμίαι ἀσεβῶν κακαί,
αἱ δὲ ῥίζαι τῶν εὐσεβῶν ἐν ὀχυρώμασιν.
Verse: 13 δι' ἁμαρτίαν χειλέων ἐμπίπτει εἰς παγίδας ἁμαρτωλός,
ἐκϕεύγει δὲ ἐξ αὐτῶν δίκαιος.
Verse: 13a ὁ βλέπων λεῖα ἐλεηϑήσεται,
ὁ δὲ συναντῶν ἐν πύλαις ἐκϑλίψει ψυχάς.
Verse: 14 ἀπὸ καρπῶν στόματος ψυχὴ ἀνδρὸς πλησϑήσεται ἀγαϑῶν,
ἀνταπόδομα δὲ χειλέων αὐτοῦ δοϑήσεται αὐτῷ.
Verse: 15 ὁδοὶ ἀϕρόνων ὀρϑαὶ ἐνώπιον αὐτῶν,
εἰσακούει δὲ συμβουλίας σοϕός.
Verse: 16 ἄϕρων αὐϑημερὸν ἐξαγγέλλει ὀργὴν αὐτοῦ,
κρύπτει δὲ τὴν ἑαυτοῦ ἀτιμίαν πανοῦργος.
Verse: 17 ἐπιδεικνυμένην πίστιν ἀπαγγέλλει δίκαιος,
ὁ δὲ μάρτυς τῶν ἀδίκων δόλιος.
Verse: 18 εἰσὶν οἳ λέγοντες τιτρώσκουσιν μαχαίρᾳ,
γλῶσσαι δὲ σοϕῶν ἰῶνται.
Verse: 19 χείλη ἀληϑινὰ κατορϑοῖ μαρτυρίαν,
μάρτυς δὲ ταχὺς γλῶσσαν ἔχει ἄδικον.
Verse: 20 δόλος ἐν καρδίᾳ τεκταινομένου κακά,
οἱ δὲ βουλόμενοι εἰρήνην εὐϕρανϑήσονται.
Verse: 21 οὐκ ἀρέσει τῷ δικαίῳ οὐδὲν ἄδικον,
οἱ δὲ ἀσεβεῖς πλησϑήσονται κακῶν.
Verse: 22 βδέλυγμα κυρίῳ χείλη ψευδῆ,
ὁ δὲ ποιῶν πίστεις δεκτὸς παρ' αὐτῷ.
Verse: 23 ἀνὴρ συνετὸς ϑρόνος αἰσϑήσεως,
καρδία δὲ ἀϕρόνων συναντήσεται ἀραῖς.
Verse: 24 χεὶρ ἐκλεκτῶν κρατήσει εὐχερῶς,
δόλιοι δὲ ἔσονται εἰς προνομήν.
Verse: 25 ϕοβερὸς λόγος καρδίαν ταράσσει ἀνδρὸς δικαίου,
ἀγγελία δὲ ἀγαϑὴ εὐϕραίνει αὐτόν.
Verse: 26 ἐπιγνώμων δίκαιος ἑαυτοῦ ϕίλος ἔσται,
αἱ δὲ γνῶμαι τῶν ἀσεβῶν ἀνεπιεικεῖς.
ἁμαρτάνοντας καταδιώξεται κακά,
ἡ δὲ ὁδὸς τῶν ἀσεβῶν πλανήσει αὐτούς.
Verse: 27 οὐκ ἐπιτεύξεται δόλιος ϑήρας,
κτῆμα δὲ τίμιον ἀνὴρ καϑαρός.
Verse: 28 ἐν ὁδοῖς δικαιοσύνης ζωή,
ὁδοὶ δὲ μνησικάκων εἰς ϑάνατον.

This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.