TITUS
Vetus Testamentum graece iuxta LXX interpretes
Part No. 686
Previous part

Chapter: 117 
Verse: 1  Αλληλουια.
᾽Εξομολογεῖσϑε τῷ κυρίῳ, ὅτι ἀγαϑός,
ὅτι εἰς τὸν αἰῶνα τὸ ἔλεος αὐτοῦ.
Verse: 2  εἰπάτω δὴ οἶκος Ισραηλ ὅτι ἀγαϑός,
ὅτι εἰς τὸν αἰῶνα τὸ ἔλεος αὐτοῦ·
Verse: 3  εἰπάτω δὴ οἶκος Ααρων ὅτι ἀγαϑός,
ὅτι εἰς τὸν αἰῶνα τὸ ἔλεος αὐτοῦ·
Verse: 4  εἰπάτωσαν δὴ πάντες οἱ ϕοβούμενοι τὸν κύριον ὅτι ἀγαϑός,
ὅτι εἰς τὸν αἰῶνα τὸ ἔλεος αὐτοῦ.
Verse: 5  ἐν ϑλίψει ἐπεκαλεσάμην τὸν κύριον,
καὶ ἐπήκουσέν μου εἰς πλατυσμόν.
Verse: 6  κύριος ἐμοὶ βοηϑός,
οὐ ϕοβηϑήσομαι τί ποιήσει μοι ἄνϑρωπος.
Verse: 7  κύριος ἐμοὶ βοηϑός,
κἀγὼ ἐπόψομαι τοὺς ἐχϑρούς μου.
Verse: 8  ἀγαϑὸν πεποιϑέναι ἐπὶ κύριον
ἢ πεποιϑέναι ἐπ' ἄνϑρωπον·
Verse: 9  ἀγαϑὸν ἐλπίζειν ἐπὶ κύριον
ἢ ἐλπίζειν ἐπ' ἄρχοντας.
Verse: 10  πάντα τὰ ἔϑνη ἐκύκλωσάν με,
καὶ τῷ ὀνόματι κυρίου ἠμυνάμην αὐτούς·
Verse: 11  κυκλώσαντες ἐκύκλωσάν με,
καὶ τῷ ὀνόματι κυρίου ἠμυνάμην αὐτούς·
Verse: 12  ἐκύκλωσάν με ὡσεὶ μέλισσαι κηρίον
καὶ ἐξεκαύϑησαν ὡσεὶ πῦρ ἐν ἀκάνϑαις,
καὶ τῷ ὀνόματι κυρίου ἠμυνάμην αὐτούς.
Verse: 13  ὠσϑεὶς ἀνετράπην τοῦ πεσεῖν,
καὶ ὁ κύριος ἀντελάβετό μου.
Verse: 14  ἰσχύς μου καὶ ὕμνησίς μου ὁ κύριος
καὶ ἐγένετό μοι εἰς σωτηρίαν.
Verse: 15  ϕωνὴ ἀγαλλιάσεως καὶ σωτηρίας ἐν σκηναῖς δικαίων
Δεξιὰ κυρίου ἐποίησεν δύναμιν,
Verse: 16  δεξιὰ κυρίου ὕψωσέν με,
δεξιὰ κυρίου ἐποίησεν δύναμιν.
Verse: 17  οὐκ ἀποϑανοῦμαι, ἀλλὰ ζήσομαι
καὶ ἐκδιηγήσομαι τὰ ἔργα κυρίου.
Verse: 18  παιδεύων ἐπαίδευσέν με ὁ κύριος
καὶ τῷ ϑανάτῳ οὐ παρέδωκέν με.
Verse: 19  ἀνοίξατέ μοι πύλας δικαιοσύνης·
εἰσελϑὼν ἐν αὐταῖς ἐξομολογήσομαι τῷ κυρίῳ.
Verse: 20  αὕτη ἡ πύλη τοῦ κυρίου,
δίκαιοι εἰσελεύσονται ἐν αὐτῇ.
Verse: 21  ἐξομολογήσομαί σοι, ὅτι ἐπήκουσάς μου
καὶ ἐγένου μοι εἰς σωτηρίαν.
Verse: 22  λίϑον, ὃν ἀπεδοκίμασαν οἱ οἰκοδομοῦντες,
οὗτος ἐγενήϑη εἰς κεϕαλὴν γωνίας·
Verse: 23  παρὰ κυρίου ἐγένετο αὕτη
καὶ ἔστιν ϑαυμαστὴ ἐν ὀϕϑαλμοῖς ἡμῶν.
Verse: 24  αὕτη ἡ ἡμέρα, ἣν ἐποίησεν ὁ κύριος·
ἀγαλλιασώμεϑα καὶ εὐϕρανϑῶμεν ἐν αὐτῇ.
Verse: 25  ὦ κύριε, σῶσον δή,
ὦ κύριε, εὐόδωσον δή.
Verse: 26  εὐλογημένος ὁ ἐρχόμενος ἐν ὀνόματι κυρίου·
εὐλογήκαμεν ὑμᾶς ἐξ οἴκου κυρίου.
Verse: 27  ϑεὸς κύριος καὶ ἐπέϕανεν ἡμῖν·
συστήσασϑε ἑορτὴν ἐν τοῖς πυκάζουσιν
ἕως τῶν κεράτων τοῦ ϑυσιαστηρίου.
Verse: 28  ϑεός μου εἶ σύ, καὶ ἐξομολογήσομαί σοι·
ϑεός μου εἶ σύ, καὶ ὑψώσω σε·
ἐξομολογήσομαί σοι, ὅτι ἐπήκουσάς μου
καὶ ἐγένου μοι εἰς σωτηρίαν.
Verse: 29  ἐξομολογεῖσϑε τῷ κυρίῳ, ὅτι ἀγαϑός,
ὅτι εἰς τὸν αἰῶνα τὸ ἔλεος αὐτοῦ. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.