TITUS
Vetus Testamentum graece iuxta LXX interpretes
Part No. 598
Previous part

Chapter: 29 
Verse: 1  Εἰς τὸ τέλος· ψαλμὸς ᾠδῆς τοῦ ἐγκαινισμοῦ
τοῦ οἴκου· τῷ Δαυιδ.
Verse: 2  ῾Υψώσω σε, κύριε, ὅτι ὑπέλαβές με
καὶ οὐκ ηὔϕρανας τοὺς ἐχϑρούς μου ἐπ' ἐμέ.
Verse: 3  κύριε ὁ ϑεός μου, ἐκέκραξα πρὸς σέ, καὶ ἰάσω με·
Verse: 4  κύριε, ἀνήγαγες ἐξ ᾅδου τὴν ψυχήν μου,
ἔσωσάς με ἀπὸ τῶν καταβαινόντων εἰς λάκκον.
Verse: 5  ψάλατε τῷ κυρίῳ, οἱ ὅσιοι αὐτοῦ,
καὶ ἐξομολογεῖσϑε τῇ μνήμῃ τῆς ἁγιωσύνης αὐτοῦ·
Verse: 6  ὅτι ὀργὴ ἐν τῷ ϑυμῷ αὐτοῦ,
καὶ ζωὴ ἐν τῷ ϑελήματι αὐτοῦ·
τὸ ἑσπέρας αὐλισϑήσεται κλαυϑμὸς
καὶ εἰς τὸ πρωὶ ἀγαλλίασις.
Verse: 7  ἐγὼ δὲ εἶπα ἐν τῇ εὐϑηνίᾳ μου
Οὐ μὴ σαλευϑῶ εἰς τὸν αἰῶνα.
Verse: 8  κύριε, ἐν τῷ ϑελήματί σου παρέσχου τῷ κάλλει μου δύναμιν·
ἀπέστρεψας δὲ τὸ πρόσωπόν σου, καὶ ἐγενήϑην τεταραγμένος.
Verse: 9  πρὸς σέ, κύριε, κεκράξομαι
καὶ πρὸς τὸν ϑεόν μου δεηϑήσομαι
Verse: 10  Τίς ὠϕέλεια ἐν τῷ αἵματί μου,
ἐν τῷ καταβῆναί με εἰς διαϕϑοράν;
μὴ ἐξομολογήσεταί σοι χοῦς
ἢ ἀναγγελεῖ τὴν ἀλήϑειάν σου;
Verse: 11  ἤκουσεν κύριος καὶ ἠλέησέν με,
κύριος ἐγενήϑη βοηϑός μου.
Verse: 12  ἔστρεψας τὸν κοπετόν μου εἰς χορὸν ἐμοί,
διέρρηξας τὸν σάκκον μου καὶ περιέζωσάς με εὐϕροσύνην,
Verse: 13  ὅπως ἂν ψάλῃ σοι ἡ δόξα μου καὶ οὐ μὴ κατανυγῶ·
κύριε ὁ ϑεός μου, εἰς τὸν αἰῶνα ἐξομολογήσομαί σοι. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.