TITUS
Vetus Testamentum graece iuxta LXX interpretes
Part No. 614
Previous part

Chapter: 45 
Verse: 1  Εἰς τὸ τέλος· ὑπὲρ τῶν υἱῶν Κορε, ὑπὲρ τῶν
κρυϕίων ψαλμός.
Verse: 2  ῾Ο ϑεὸς ἡμῶν καταϕυγὴ καὶ δύναμις,
βοηϑὸς ἐν ϑλίψεσιν ταῖς εὑρούσαις ἡμᾶς σϕόδρα.
Verse: 3  διὰ τοῦτο οὐ ϕοβηϑησόμεϑα ἐν τῷ ταράσσεσϑαι τὴν γῆν
καὶ μετατίϑεσϑαι ὄρη ἐν καρδίαις ϑαλασσῶν.
Verse: 4  ἤχησαν καὶ ἐταράχϑησαν τὰ ὕδατα αὐτῶν,
ἐταράχϑησαν τὰ ὄρη ἐν τῇ κραταιότητι αὐτοῦ.
διάψαλμα.
Verse: 5  τοῦ ποταμοῦ τὰ ὁρμήματα εὐϕραίνουσιν τὴν πόλιν τοῦ ϑεοῦ·
ἡγίασεν τὸ σκήνωμα αὐτοῦ ὁ ὕψιστος.
Verse: 6  ὁ ϑεὸς ἐν μέσῳ αὐτῆς, οὐ σαλευϑήσεται·
βοηϑήσει αὐτῇ ὁ ϑεὸς τὸ πρὸς πρωί.
Verse: 7  ἐταράχϑησαν ἔϑνη, ἔκλιναν βασιλεῖαι·
ἔδωκεν ϕωνὴν αὐτοῦ, ἐσαλεύϑη ἡ γῆ.
Verse: 8  κύριος τῶν δυνάμεων μεϑ' ἡμῶν,
ἀντιλήμπτωρ ἡμῶν ὁ ϑεὸς Ιακωβ.
διάψαλμα.
Verse: 9  δεῦτε ἴδετε τὰ ἔργα κυρίου,
ἃ ἔϑετο τέρατα ἐπὶ τῆς γῆς.
Verse: 10  ἀνταναιρῶν πολέμους μέχρι τῶν περάτων τῆς γῆς
τόξον συντρίψει καὶ συγκλάσει ὅπλον
καὶ ϑυρεοὺς κατακαύσει ἐν πυρί.
Verse: 11  σχολάσατε καὶ γνῶτε ὅτι ἐγώ εἰμι ὁ ϑεός·
ὑψωϑήσομαι ἐν τοῖς ἔϑνεσιν, ὑψωϑήσομαι ἐν τῇ γῇ.
Verse: 12  κύριος τῶν δυνάμεων μεϑ' ἡμῶν,
ἀντιλήμπτωρ ἡμῶν ὁ ϑεὸς Ιακωβ. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.