TITUS
Vetus Testamentum graece iuxta LXX interpretes
Part No. 624
Previous part

Chapter: 55 
Verse: 1  Εἰς τὸ τέλος, ὑπὲρ τοῦ λαοῦ τοῦ ἀπὸ τῶν ἁγίων
μεμακρυμμένου· τῷ Δαυιδ εἰς στηλογραϕίαν,
ὁπότε ἐκράτησαν αὐτὸν οἱ ἀλλόϕυλοι ἐν Γεϑ.
Verse: 2  ᾽Ελέησόν με, κύριε, ὅτι κατεπάτησέν με ἄνϑρωπος,
ὅλην τὴν ἡμέραν πολεμῶν ἔϑλιψέν με.
Verse: 3  κατεπάτησάν με οἱ ἐχϑροί μου ὅλην τὴν ἡμέραν,
ὅτι πολλοὶ οἱ πολεμοῦντές με ἀπὸ ὕψους.
Verse: 4  ἡμέρας ϕοβηϑήσομαι, ἐγὼ δὲ ἐπὶ σοὶ ἐλπιῶ.
Verse: 5  ἐν τῷ ϑεῷ ἐπαινέσω τοὺς λόγους μου ὅλην τὴν ἡμέραν.
ἐπὶ τῷ ϑεῷ ἤλπισα, οὐ ϕοβηϑήσομαι· τί ποιήσει μοι σάρξ;
Verse: 6  ὅλην τὴν ἡμέραν τοὺς λόγους μου ἐβδελύσσοντο,
κατ' ἐμοῦ πάντες οἱ διαλογισμοὶ αὐτῶν εἰς κακόν.
Verse: 7  παροικήσουσιν καὶ κατακρύψουσιν·
αὐτοὶ τὴν πτέρναν μου ϕυλάξουσιν,
καϑάπερ ὑπέμειναν τὴν ψυχήν μου.
Verse: 8  ὑπὲρ τοῦ μηϑενὸς σώσεις αὐτούς,
ἐν ὀργῇ λαοὺς κατάξεις, ὁ ϑεός.
Verse: 9  τὴν ζωήν μου ἐξήγγειλά σοι,
ἔϑου τὰ δάκρυά μου ἐνώπιόν σου ὡς καὶ ἐν τῇ ἐπαγγελίᾳ σου.
Verse: 10  ἐπιστρέψουσιν οἱ ἐχϑροί μου εἰς τὰ ὀπίσω,
ἐν ᾗ ἂν ἡμέρᾳ ἐπικαλέσωμαί σε·
ἰδοὺ ἔγνων ὅτι ϑεός μου εἶ σύ.
Verse: 11  ἐπὶ τῷ ϑεῷ αἰνέσω ῥῆμα,
ἐπὶ τῷ κυρίῳ αἰνέσω λόγον.
Verse: 12  ἐπὶ τῷ ϑεῷ ἤλπισα, οὐ ϕοβηϑήσομαι· τί ποιήσει μοι ἄνϑρωπος;
Verse: 13  ἐν ἐμοί, ὁ ϑεός, αἱ εὐχαὶ ἃς ἀποδώσω αἰνέσεώς σοι,
Verse: 14  ὅτι ἐρρύσω τὴν ψυχήν μου ἐκ ϑανάτου
καὶ τοὺς πόδας μου ἐξ ὀλισϑήματος
τοῦ εὐαρεστῆσαι ἐνώπιον τοῦ ϑεοῦ ἐν ϕωτὶ ζώντων. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.