TITUS
Vetus Testamentum graece iuxta LXX interpretes
Part No. 653
Previous part

Chapter: 84 
Verse: 1  Εἰς τὸ τέλος· τοῖς υἱοῖς Κορε ψαλμός.
Verse: 2  Εὐδόκησας, κύριε, τὴν γῆν σου,
ἀπέστρεψας τὴν αἰχμαλωσίαν Ιακωβ·
Verse: 3  ἀϕῆκας τὰς ἀνομίας τῷ λαῷ σου,
ἐκάλυψας πάσας τὰς ἁμαρτίας αὐτῶν.
διάψαλμα.
Verse: 4  κατέπαυσας πᾶσαν τὴν ὀργήν σου,
ἀπέστρεψας ἀπὸ ὀργῆς ϑυμοῦ σου.
Verse: 5  ἐπίστρεψον ἡμᾶς, ὁ ϑεὸς τῶν σωτηρίων ἡμῶν,
καὶ ἀπόστρεψον τὸν ϑυμόν σου ἀϕ' ἡμῶν.
Verse: 6  μὴ εἰς τὸν αἰῶνα ὀργισϑήσῃ ἡμῖν
ἢ διατενεῖς τὴν ὀργήν σου ἀπὸ γενεᾶς εἰς γενεάν;
Verse: 7  ὁ ϑεός, σὺ ἐπιστρέψας ζωώσεις ἡμᾶς,
καὶ ὁ λαός σου εὐϕρανϑήσεται ἐπὶ σοί.
Verse: 8  δεῖξον ἡμῖν, κύριε, τὸ ἔλεός σου
καὶ τὸ σωτήριόν σου δῴης ἡμῖν.
Verse: 9  ἀκούσομαι τί λαλήσει ἐν ἐμοὶ κύριος ὁ ϑεός,
ὅτι λαλήσει εἰρήνην ἐπὶ τὸν λαὸν αὐτοῦ
καὶ ἐπὶ τοὺς ὁσίους αὐτοῦ
καὶ ἐπὶ τοὺς ἐπιστρέϕοντας πρὸς αὐτὸν καρδίαν.
Verse: 10  πλὴν ἐγγὺς τῶν ϕοβουμένων αὐτὸν τὸ σωτήριον αὐτοῦ
τοῦ κατασκηνῶσαι δόξαν ἐν τῇ γῇ ἡμῶν.
Verse: 11  ἔλεος καὶ ἀλήϑεια συνήντησαν,
δικαιοσύνη καὶ εἰρήνη κατεϕίλησαν·
Verse: 12  ἀλήϑεια ἐκ τῆς γῆς ἀνέτειλεν,
καὶ δικαιοσύνη ἐκ τοῦ οὐρανοῦ διέκυψεν.
Verse: 13  καὶ γὰρ ὁ κύριος δώσει χρηστότητα,
καὶ ἡ γῆ ἡμῶν δώσει τὸν καρπὸν αὐτῆς·
Verse: 14  δικαιοσύνη ἐναντίον αὐτοῦ προπορεύσεται
καὶ ϑήσει εἰς ὁδὸν τὰ διαβήματα αὐτοῦ. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.