TITUS
Vetus Testamentum graece iuxta LXX interpretes
Part No. 849
Previous part

Chapter: 18 
Verse: 1  Τοῖς δὲ ὁσίοις σου μέγιστον ἦν ϕῶς·
ὧν ϕωνὴν μὲν ἀκούοντες μορϕὴν δὲ οὐχ ὁρῶντες,
ὅτι μὲν οὐ κἀκεῖνοι ἐπεπόνϑεισαν, ἐμακάριζον,
Verse: 2  ὅτι δ' οὐ βλάπτουσιν προηδικημένοι, ηὐχαρίστουν
καὶ τοῦ διενεχϑῆναι χάριν ἐδέοντο.
Verse: 3  ἀνϑ' ὧν πυριϕλεγῆ στῦλον
ὁδηγὸν μὲν ἀγνώστου ὁδοιπορίας,
ἥλιον δὲ ἀβλαβῆ ϕιλοτίμου ξενιτείας παρέσχες.
Verse: 4  ἄξιοι μὲν γὰρ ἐκεῖνοι στερηϑῆναι ϕωτὸς καὶ ϕυλακισϑῆναι // σκότει
οἱ κατακλείστους ϕυλάξαντες τοὺς υἱούς σου,
δι' ὧν ἤμελλεν τὸ ἄϕϑαρτον νόμου ϕῶς τῷ αἰῶνι δίδοσϑαι.
Verse: 5  Βουλευσαμένους δ' αὐτοὺς τὰ τῶν ὁσίων ἀποκτεῖναι νήπια
καὶ ἑνὸς ἐκτεϑέντος τέκνου καὶ σωϑέντος
εἰς ἔλεγχον τὸ αὐτῶν ἀϕείλω πλῆϑος τέκνων
καὶ ὁμοϑυμαδὸν ἀπώλεσας ἐν ὕδατι σϕοδρῷ.
Verse: 6  ἐκείνη ἡ νὺξ προεγνώσϑη πατράσιν ἡμῶν,
ἵνα ἀσϕαλῶς εἰδότες οἷς ἐπίστευσαν ὅρκοις ἐπευϑυμήσωσιν.
Verse: 7  προσεδέχϑη ὑπὸ λαοῦ σου
σωτηρία μὲν δικαίων, ἐχϑρῶν δὲ ἀπώλεια·
Verse: 8  ᾧ γὰρ ἐτιμωρήσω τοὺς ὑπεναντίους,
τούτῳ ἡμᾶς προσκαλεσάμενος ἐδόξασας.
Verse: 9  κρυϕῇ γὰρ ἐϑυσίαζον ὅσιοι παῖδες ἀγαϑῶν
καὶ τὸν τῆς ϑειότητος νόμον ἐν ὁμονοίᾳ διέϑεντο
τῶν αὐτῶν ὁμοίως καὶ ἀγαϑῶν
καὶ κινδύνων μεταλήμψεσϑαι τοὺς ἁγίους
πατέρων ἤδη προαναμέλποντες αἴνους.
Verse: 10  ἀντήχει δ' ἀσύμϕωνος ἐχϑρῶν ἡ βοή,
καὶ οἰκτρὰ διεϕέρετο ϕωνὴ ϑρηνουμένων παίδων·
Verse: 11  ὁμοίᾳ δὲ δίκῃ δοῦλος ἅμα δεσπότῃ κολασϑεὶς
καὶ δημότης βασιλεῖ τὰ αὐτὰ πάσχων,
Verse: 12  ὁμοϑυμαδὸν δὲ πάντες ἐν ἑνὶ ὀνόματι ϑανάτου
νεκροὺς εἶχον ἀναριϑμήτους·
οὐδὲ γὰρ πρὸς τὸ ϑάψαι οἱ ζῶντες ἦσαν ἱκανοί,
ἐπεὶ πρὸς μίαν ῥοπὴν ἡ ἐντιμοτέρα γένεσις αὐτῶν διέϕϑαρτο.
Verse: 13  πάντα γὰρ ἀπιστοῦντες διὰ τὰς ϕαρμακείας
ἐπὶ τῷ τῶν πρωτοτόκων ὀλέϑρῳ ὡμολόγησαν ϑεοῦ υἱὸν // λαὸν εἶναι.
Verse: 14  ἡσύχου γὰρ σιγῆς περιεχούσης τὰ πάντα
καὶ νυκτὸς ἐν ἰδίῳ τάχει μεσαζούσης
Verse: 15  ὁ παντοδύναμός σου λόγος ἀπ' οὐρανῶν ἐκ ϑρόνων βασιλείων
ἀπότομος πολεμιστὴς εἰς μέσον τῆς ὀλεϑρίας ἥλατο γῆς
ξίϕος ὀξὺ τὴν ἀνυπόκριτον ἐπιταγήν σου ϕέρων
Verse: 16  καὶ στὰς ἐπλήρωσεν τὰ πάντα ϑανάτου
καὶ οὐρανοῦ μὲν ἥπτετο, βεβήκει δ' ἐπὶ γῆς.
Verse: 17  τότε παραχρῆμα ϕαντασίαι μὲν ὀνείρων δεινῶν ἐξετάραξαν // αὐτούς,
ϕόβοι δὲ ἐπέστησαν ἀδόκητοι,
Verse: 18  καὶ ἄλλος ἀλλαχῇ ῥιϕεὶς ἡμίϑνητος
δι' ἣν ἔϑνῃσκον αἰτίαν ἐνεϕάνιζεν·
Verse: 19  οἱ γὰρ ὄνειροι ϑορυβήσαντες αὐτοὺς τοῦτο προεμήνυσαν,
ἵνα μὴ ἀγνοοῦντες δι' ὃ κακῶς πάσχουσιν ἀπόλωνται.
Verse: 20  ῞Ηψατο δὲ καὶ δικαίων πεῖρα ϑανάτου,
καὶ ϑραῦσις ἐν ἐρήμῳ ἐγένετο πλήϑους.
ἀλλ' οὐκ ἐπὶ πολὺ ἔμεινεν ἡ ὀργή·
Verse: 21  σπεύσας γὰρ ἀνὴρ ἄμεμπτος προεμάχησεν
τὸ τῆς ἰδίας λειτουργίας ὅπλον
προσευχὴν καὶ ϑυμιάματος ἐξιλασμὸν κομίσας·
ἀντέστη τῷ ϑυμῷ καὶ πέρας ἐπέϑηκε τῇ συμϕορᾷ
δεικνὺς ὅτι σός ἐστιν ϑεράπων·
Verse: 22  ἐνίκησεν δὲ τὸν χόλον οὐκ ἰσχύι τοῦ σώματος,
οὐχ ὅπλων ἐνεργείᾳ,
ἀλλὰ λόγῳ τὸν κολάζοντα ὑπέταξεν
ὅρκους πατέρων καὶ διαϑήκας ὑπομνήσας.
Verse: 23  σωρηδὸν γὰρ ἤδη πεπτωκότων ἐπ' ἀλλήλων νεκρῶν
μεταξὺ στὰς ἀνέκοψε τὴν ὀργὴν
καὶ διέσχισεν τὴν πρὸς τοὺς ζῶντας ὁδόν.
Verse: 24  ἐπὶ γὰρ ποδήρους ἐνδύματος ἦν ὅλος ὁ κόσμος,
καὶ πατέρων δόξαι ἐπὶ τετραστίχου λίϑων γλυϕῆς,
καὶ μεγαλωσύνη σου ἐπὶ διαδήματος κεϕαλῆς αὐτοῦ.
Verse: 25  τούτοις εἶξεν ὁ ὀλεϑρεύων, ταῦτα δὲ ἐϕοβήϑη·
ἦν γὰρ μόνη ἡ πεῖρα τῆς ὀργῆς ἱκανή.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.