TITUS
Vetus Testamentum graece iuxta LXX interpretes
Part No. 853
Previous part

Chapter: 2 
Verse: 1    Τέκνον, εἰ προσέρχῃ δουλεύειν κυρίῳ,
   ἑτοίμασον τὴν ψυχήν σου εἰς πειρασμόν·
Verse: 2    εὔϑυνον τὴν καρδίαν σου καὶ καρτέρησον
   καὶ μὴ σπεύσῃς ἐν καιρῷ ἐπαγωγῆς·
Verse: 3    κολλήϑητι αὐτῷ καὶ μὴ ἀποστῇς,
   ἵνα αὐξηϑῇς ἐπ' ἐσχάτων σου.
Verse: 4    πᾶν, ὃ ἐὰν ἐπαχϑῇ σοι, δέξαι
   καὶ ἐν ἀλλάγμασιν ταπεινώσεώς σου μακροϑύμησον·
Verse: 5    ὅτι ἐν πυρὶ δοκιμάζεται χρυσὸς
   καὶ ἄνϑρωποι δεκτοὶ ἐν καμίνῳ ταπεινώσεως.
Verse: 6    πίστευσον αὐτῷ, καὶ ἀντιλήμψεταί σου·
   εὔϑυνον τὰς ὁδούς σου καὶ ἔλπισον ἐπ' αὐτόν.
Verse: 7    Οἱ ϕοβούμενοι τὸν κύριον, ἀναμείνατε τὸ ἔλεος αὐτοῦ
   καὶ μὴ ἐκκλίνητε, ἵνα μὴ πέσητε.
Verse: 8    οἱ ϕοβούμενοι κύριον, πιστεύσατε αὐτῷ,
   καὶ οὐ μὴ πταίσῃ ὁ μισϑὸς ὑμῶν.
Verse: 9    οἱ ϕοβούμενοι κύριον, ἐλπίσατε εἰς ἀγαϑὰ
   καὶ εἰς εὐϕροσύνην αἰῶνος καὶ ἔλεος.
Verse: 10    ἐμβλέψατε εἰς ἀρχαίας γενεὰς καὶ ἴδετε·
   τίς ἐνεπίστευσεν κυρίῳ καὶ κατῃσχύνϑη;
   ἢ τίς ἐνέμεινεν τῷ ϕόβῳ αὐτοῦ καὶ ἐγκατελείϕϑη;
   ἢ τίς ἐπεκαλέσατο αὐτόν, καὶ ὑπερεῖδεν αὐτόν;
Verse: 11    διότι οἰκτίρμων καὶ ἐλεήμων ὁ κύριος
   καὶ ἀϕίησιν ἁμαρτίας καὶ σῴζει ἐν καιρῷ ϑλίψεως.
Verse: 12    Οὐαὶ καρδίαις δειλαῖς καὶ χερσὶν παρειμέναις
   καὶ ἁμαρτωλῷ ἐπιβαίνοντι ἐπὶ δύο τρίβους.
Verse: 13    οὐαὶ καρδίᾳ παρειμένῃ, ὅτι οὐ πιστεύει·
   διὰ τοῦτο οὐ σκεπασϑήσεται.
Verse: 14    οὐαὶ ὑμῖν τοῖς ἀπολωλεκόσιν τὴν ὑπομονήν·
   καὶ τί ποιήσετε ὅταν ἐπισκέπτηται ὁ κύριος;
Verse: 15    οἱ ϕοβούμενοι κύριον οὐκ ἀπειϑήσουσιν ῥημάτων αὐτοῦ,
   καὶ οἱ ἀγαπῶντες αὐτὸν συντηρήσουσιν τὰς ὁδοὺς αὐτοῦ.
Verse: 16    οἱ ϕοβούμενοι κύριον ζητήσουσιν εὐδοκίαν αὐτοῦ,
   καὶ οἱ ἀγαπῶντες αὐτὸν ἐμπλησϑήσονται τοῦ νόμου.
Verse: 17    οἱ ϕοβούμενοι κύριον ἑτοιμάσουσιν καρδίας αὐτῶν
   καὶ ἐνώπιον αὐτοῦ ταπεινώσουσιν τὰς ψυχὰς αὐτῶν.
Verse: 18    ἐμπεσούμεϑα εἰς χεῖρας κυρίου
   καὶ οὐκ εἰς χεῖρας ἀνϑρώπων·
   ὡς γὰρ ἡ μεγαλωσύνη αὐτοῦ,
   οὕτως καὶ τὸ ἔλεος αὐτοῦ.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.