TITUS
Text collection: YVW 
White Yajur-Veda
Text: VS 
Vājasaneyi-Saṃhitā

Mādhyandina-Recension


On the basis of the edition by
Albrecht Weber,
The Vajasaneyi-Saṃhitā
in the Mādhyandina and the Kānva-Śākhā
with the Commentary of Mahidhara,
Berlin 1849 / repr. Varanasi 1972
(Chowkhamba Sanskrit Series, 103)
entered by Martin Kümmel,
Freiburg, 1997;
TITUS version by Jost Gippert,
Frankfurt a.M., 14.10.1997 / 28.2.1998 / 21.6.1998 / 15.10.1999 / 1.6.2000 / 7.12.2008 / 21.4.2012



Paragraph: 1 

Verse: 1 
Sentence: a    iṣé tvā \
Sentence: b    ūrjé tvā \
Sentence: c    vāyáva stʰa \
Sentence: d    devó vaḥ savitā́ prā́rpayatu śréṣṭʰatamāya kármaṇa ā́ pyāyadʰvam agʰnyā índrāya bʰāgáṃ prajā́vatīr anamīvā́ ayakṣmā́ mā́ va stená īśata mā́gʰaśam̐so dʰruvā́ asmín gópatau syāta bahvī́ḥ \
Sentence: e    yájamānasya paśū́n pāhi \\

Verse: 2 
Sentence: a    vásoḥ pavítram asi \
Sentence: b    dyáur asi pr̥tʰivy àsi \
Sentence: c    mātaríśvano gʰarmò si viśvádʰā asi paraméṇa dʰā́mnā dŕ̥m̐hasva mā́ hvār mā́ te yajñápatir hvārṣīt \\

Verse: 3 
Sentence: a    vásoḥ pavítram asi śatádʰāraṃ vásoḥ pavítram asi sahásradʰāram \
Sentence: b    devás tvā savitā́ punātu vásoḥ pavítreṇa śatádʰāreṇa supvā̀ \
Sentence: c    kā́m adʰukṣaḥ \\

Verse: 4 
Sentence: a    sā́ viśvā́yuḥ \
Sentence: b    sā́ viśvákarmā \
Sentence: c    sā́ viśvádʰāyāḥ \
Sentence: d    índrasya tvā bʰāgám̐ sómenā́ tanacmi \
Sentence: e    víṣṇo havyám̐ rakṣa \\

Verse: 5 
Sentence: a    ágne vratapate vratáṃ cariṣyāmi tác cʰakeyaṃ tán me rādʰyatām \
Sentence: b    idám ahám ánr̥tāt satyám úpaimi \\

Verse: 6 
Sentence: a    kás tvā yunakti sá tvā yunakti kásmai tvā yunakti tásmai tvā yunakti \
Sentence: b    kármaṇe vāṃ véṣāya vām \\

Verse: 7 
Sentence: a    prátyuṣṭam̐ rákṣaḥ prátyuṣṭā árātayaḥ \
Sentence: b    níṣṭaptam̐ rákṣo níṣṭaptā árātayaḥ \
Sentence: c    urv àntárikṣam ánv emi \\

Verse: 8 
Sentence: a    dʰū́r asi dʰū́rva dʰū́rvantaṃ dʰū́rva táṃ yò smā́n dʰū́rvati táṃ dʰūrva yáṃ vayáṃ dʰū́rvāmaḥ \
Sentence: b    devā́nām asi váhnitamam̐ sásnitamaṃ pápritamaṃ júṣṭatamaṃ devahū́tamam \\

Verse: 9 
Sentence: a    áhrutam asi havirdʰā́naṃ dŕ̥m̐hasva mā́ hvār mā́ te yajñápatir hvārṣīt \
Sentence: b    víṣṇus tvā kramatām \
Sentence: c    urú vā́tāya \
Sentence: d    ápahatam̐ rákṣaḥ \
Sentence: e    yáccʰantāṃ páñca \\

Verse: 10 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    agnáye júṣṭaṃ gr̥hṇāmi \
Sentence: c    agnī́ṣómābʰyāṃ júṣṭaṃ gr̥hṇāmi \\

Verse: 11 
Sentence: a    bʰūtā́ya tvā nā́rātaye \
Sentence: b    svàr abʰiví kʰyeṣam \
Sentence: c    dŕ̥m̐hantāṃ dúryāḥ pr̥tʰivyā́m \
Sentence: d    urv àntárikṣam ánv emi \
Sentence: e    pr̥tʰivyā́s tvā nā́bʰau sādayāmy ádityā upástʰé gne havyám̐ rakṣa \\

Verse: 12 
Sentence: a    pavítre stʰo vaiṣṇavyàu \
Sentence: b    savitúr vaḥ prasavá út punāmy áccʰidrena pavítreṇa sū́ryasya raśmíbʰiḥ \
Sentence: c    dévīr āpo agreguvo agrepuvó gra imám adyá yajñáṃ nayatā́gre yajñápatim̐ sudʰā́tuṃ yajñápatiṃ devayúvam \\

Verse: 13 
Sentence: a    yuṣmā́ índro vr̥ṇīta vr̥tratū́rye yūyám índram avr̥ṇīdʰvaṃ vr̥tratū́rye \
Sentence: b    prókṣitā stʰa \
Sentence: c    agnáye tvā júṣṭaṃ prókṣāmi \
Sentence: d    agnī́ṣómābʰyāṃ tvā júṣṭaṃ prókṣāmi \
Sentence: e    dáivyāya kármaṇe śundʰadʰvaṃ devayajyā́yai yád vó śuddʰāḥ parājagʰnúr idáṃ vas tác cʰundʰāmi \\

Verse: 14 
Sentence: a    śármāsi \
Sentence: b    ávadʰūtam̐ rákṣó vadʰūtā árātayaḥ \
Sentence: c    ádityās tvág asi práti tvā́ditir vettu \
Sentence: d    ádrir asi vānaspatyáḥ \
Sentence: e    grā́vāsi pr̥tʰúbudʰnaḥ práti tvā́dityās tvág vettu \\

Verse: 15 
Sentence: a    agnés tanū́r asi vācó visárjanaṃ devávītaye tvā gr̥hṇāmi \
Sentence: b    br̥hádgrāvāsi vānaspatyáḥ \
Sentence: c    sá idáṃ devébʰyo havíḥ śamīṣva suśámi śamīṣva \
Sentence: d    háviṣkr̥d éhi háviṣkr̥d éhi háviṣkr̥d éhi \\

Verse: 16 
Sentence: a    kukkuṭò si mádʰujihva íṣam ū́rjam ā́ vada tváyā vayám̐ saṃgʰātám̐-saṃgʰātaṃ jeṣma \
Sentence: b    varṣávr̥ddʰam asi \
Sentence: c    práti tvā varṣávr̥ddʰaṃ vettu \
Sentence: d    párāpūtam̐ rákṣaḥ párāpūtā árātayaḥ \
Sentence: e    ápahatam̐ rákṣaḥ \
Sentence: f    vāyúr vo ví vinaktu \
Sentence: g    devó vaḥ savitā́ híraṇyapāṇiḥ práti gr̥bʰṇātv áccʰidreṇa pāṇínā \\

Verse: 17 
Sentence: a    dʰŕ̥ṣṭir asi \
Sentence: b    ápāgne agním āmā́daṃ jahi níṣ kravyā́dam̐ sedʰa \
Sentence: c    ā́ devayájaṃ vaha \
Sentence: d    dʰruvám asi pr̥tʰivī́ṃ dr̥m̐ha brahmaváni tvā kṣatraváni sajātavány úpa dadʰāmi bʰrā́tr̥vyasya badʰā́ya \\

Verse: 18 
Sentence: a    ágne bráhma gr̥bʰṇīṣva \
Sentence: b    dʰarúṇam asy antárikṣaṃ dr̥m̐ha brahmaváni tvā kṣatraváni sajātavány úpa dadʰāmi bʰrā́tr̥vyasya badʰā́ya \
Sentence: c    dʰartrám asi dívaṃ dr̥m̐ha brahmaváni tvā kṣatraváni sajātavány úpa dadʰāmi bʰrā́tr̥vyasya badʰā́ya \
Sentence: d    víśvābʰyas tvā́śābʰya úpa dadʰāmi \
Sentence: e    cíta stʰordʰvacítaḥ \
Sentence: f    bʰŕ̥gūṇām áṅgirasāṃ tápasā tapyadʰvam \\

Verse: 19 
Sentence: a    śármāsi \
Sentence: b    ávadʰūtam̐ rákṣó vadʰūtā árātayaḥ \
Sentence: c    ádityās tvág asi práti tvā́ditir vettu \
Sentence: d    dʰiṣáṇāsi parvatī́ práti tvā́dityās tvág vettu \
Sentence: e    divá skambʰanī́r asi \
Sentence: f    dʰiṣáṇāsi pārvateyī́ práti tvā párvatī vettu \\

Verse: 20 
Sentence: a    dʰānyàm asi dʰinuhí devā́n \
Sentence: b    prāṇā́ya tvā \
Sentence: c    udānā́ya tvā \
Sentence: d    vyānā́ya tvā \
Sentence: e    dīrgʰā́m ánu prásitim ā́yuṣe dʰāṃ devó vaḥ savitā́ híraṇyapāṇiḥ práti gr̥bʰṇātv áccʰidreṇa pāṇínā \
Sentence: f    cákṣuṣe tvā \
Sentence: g    mahī́nāṃ páyo si \\

Verse: 21 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    sáṃ vapāmi \
Sentence: c    sám ā́pa óṣadʰībʰiḥ sám óṣadʰayo rásena \
Sentence: d    sám̐ revátīr jágatībʰiḥ pr̥cyantām̐ sáṃ mádʰumatīr mádʰumatībʰiḥ pr̥cyantām \\

Verse: 22 
Sentence: a    jánayatyai tvā sáṃ yaumi \
Sentence: b    idám agnéḥ \
Sentence: c    idám agnī́ṣómayoḥ \
Sentence: d    iṣé tvā \
Sentence: e    gʰarmò si viśvā́yuḥ \
Sentence: f    urúpratʰā urú pratʰasvorú te yajñápatiḥ pratʰatām \
Sentence: g    agníṣ ṭe tvácaṃ mā́ him̐sīt \
Sentence: h    devás tvā savitā́ śrapayatu várṣiṣṭʰé dʰi nā́ke \\

Verse: 23 
Sentence: a    mā́ bʰer mā́ sáṃ viktʰāḥ \
Sentence: b    átamerur yajñó tamerur yájamānasya prajā́ bʰūyāt \
Sentence: c    tritā́ya tvā \
Sentence: d    dvitā́ya tvā \
Sentence: e    ekatā́ya tvā \\

Verse: 24 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    ā́ dade dʰvarakŕ̥taṃ devébʰyaḥ \
Sentence: c    índrasya bāhúr asi dákṣiṇaḥ sahásrabʰr̥ṣṭiḥ śatátejā vāyúr asi tigmátejā dviṣató badʰáḥ \\

Verse: 25 
Sentence: a    pŕ̥tʰivi devayajany óṣadʰyās te mū́laṃ mā́ him̐siṣam \
Sentence: b    vrajáṃ gaccʰa goṣṭʰā́nam \
Sentence: c    várṣatu te dyáuḥ \
Sentence: d    badʰāná deva savitaḥ paramásyāṃ pr̥tʰivyā́m̐ śaténa pā́śair yò smā́n dvéṣṭi yáṃ ca vayáṃ dviṣmás tám áto mā́ mauk \\

Verse: 26 
Sentence: a    ápāráruṃ pr̥tʰivyái devayájanād badʰyāsam \
Sentence: b    vrajáṃ gaccʰa goṣṭʰā́nam \
Sentence: c    várṣatu te dyáuḥ \
Sentence: d    badʰāná deva savitaḥ paramásyāṃ pr̥tʰivyā́m̐ śaténa pā́śair yò smā́n dvéṣṭi yáṃ ca vayáṃ dviṣmás tám áto mā́ mauk \
Sentence: e    áraro dívaṃ mā́ paptaḥ \
Sentence: f    drapsás te dyā́ṃ mā́ skan \
Sentence: g    vrajáṃ gaccʰa goṣṭʰā́nam \
Sentence: h    várṣatu te dyáuḥ \
Sentence: i    badʰāná deva savitaḥ paramásyāṃ pr̥tʰivyā́m̐ śaténa pā́śair yò smā́n dvéṣṭi yáṃ ca vayáṃ dviṣmás tám áto mā́ mauk \\

Verse: 27 
Sentence: a    gāyatréṇa tvā cʰándasā pári gr̥hṇāmi \
Sentence: b    tráiṣṭubʰena tvā cʰándasā pári gr̥hṇāmi \
Sentence: c    jágatena tvā cʰándasā pári gr̥hṇāmi \
Sentence: d    sukṣmā́ cā́si śivā́ cāsi \
Sentence: e    syonā́ cā́si suṣádā cāsi \
Sentence: f    ū́rjasvatī cā́si páyasvatī ca \\

Verse: 28 
Sentence: a    purā́ krūrásya visŕ̥po virapśinn udādā́ya pr̥tʰivī́ṃ jīvádānum \
Sentence: b    yā́m áirayam̐ś candrámasi svadʰā́bʰis tā́m u dʰī́rāso anudíśya yajante \
Sentence: c    prókṣaṇīr ā́ sādaya \
Sentence: d    dviṣató badʰò si \\

Verse: 29 
Sentence: a    prátyuṣṭam̐ rákṣaḥ prátyuṣṭā árātayaḥ \
Sentence: b    níṣṭaptam̐ rákṣo níṣṭaptā árātayaḥ \
Sentence: c    ániśito si sapatnakṣíd vājínaṃ tvā vājedʰyā́yai sáṃ mārjmi \
Sentence: d    prátyuṣṭam̐ rákṣaḥ prátyuṣṭā árātayaḥ \
Sentence: e    níṣṭaptam̐ rákṣo níṣṭaptā árātayaḥ \
Sentence: f    ániśitāsi sapatnakṣíd vājínīṃ tvā vājedʰyā́yai sáṃ mārjmi \\

Verse: 30 
Sentence: a    ádityai rā́snāsi \
Sentence: b    víṣṇor veṣyò si \
Sentence: c    ū́rje tvā \
Sentence: d    ádabdʰena tvā cákṣuṣā́va paśyāmi \
Sentence: e    agnér jihvā́si suhū́r devébʰyo dʰā́mne-dʰāmne me bʰava yájuṣe-yajuṣe \\

Verse: 31 
Sentence: a    savitús tvā prasavá út punāmy áccʰidreṇa pavítreṇa sū́ryasya raśmíbʰiḥ \
Sentence: b    savitúr vaḥ prasavá út punāmy áccʰidreṇa pavítreṇa sū́ryasya raśmíbʰiḥ \
Sentence: c    téjo si śukrám asy amŕ̥tam asi \
Sentence: d    dʰā́ma nā́māsi priyáṃ devā́nām ánādʰr̥ṣṭaṃ devayájanam asi \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.