Beispieltext / Sample text

Aufnahme / Recording: Sonja Fritz & Jost Gippert, Tbilisi, 10.10.1984

Sprecherin / Speaker: Elena G. Kadagidze

Text:

თათაჲრ დუჲ დიკარ
Part 1
1  შუჲრჩოხ, დაჰ7 ლაჩ ჰ7ათხელუჩო̆ ხანახ ბელდურა დემეტრეს დეფცინ სოგო̆,
2  შირქი ვასო̆ ყონუნაჲნო̆ დუჲგოჰ7აჲნო̆,
3  ჟე ჰ7ალო და დახკენო̆ ლამუე,
4  სო ვასო̆, სონ მეზობლათ ჴენი ბაცბი ბაე,
5  ოშტუნ დაჟარ დარ მე ო დაჟრენმაქა ღოჭ ლალჲოერათხ ءურდენ, ჰ7ალ ლაჴჲიენო̆ აჰ7 ჲერწჲოერათხ, წურრაჲნო̆ ხი დათხანლათერე, ოჴუვ ცუ ჰ7ევალათრათხაჲნო̆.
6  რაკი შირქი ხი ცო დარაჲნო̆.
7  ცჰ7აჲნ ءურდენ, ბუღან ბალენაჲნო̆, არცო ჲევო̆... თათრივ დუჲ დიკენაჲნო̆,
8  დაჰ7 ჰ7აჭენეს ნაყგუჲჰ7აჲნო̆, ნატლაშ ჲაღჲანორ შირიქ დაკრენაჰ7აჲნო̆.
9  ტყობალადანორ, ო ნამ დაჰ7 ბარ დაბერტყადბაჲლნო̆ დაჟრეგოჰ7აჲნო̆, ბაყეϱ დუჲ დარ დიკენუჲნო̆,
10  დონ ახკურ სოგო ნაჟტარ ცერე უბრალო̆ დონე,

Part 2
11  კნათიგო̆ აჲლʻნასაჲნო̆ მე ქასტენთ, დუჲ ჰ7ალო̆ დახკდებათაჲნო̆,
12  აჭთებეგო დარ დუჲე, უჲსრენ ჰ7ალო̆ დახკდიჲენ, ნასტ, თეყეშ, ჰ7ერჩეშ, ბაკ ჩუ ლახკინ ე დუჲ,
13  სენკუჲნ დონ ბარ სოგო, შარე ჴოწო̆ ბედენ ჰ7ალო̆ ცო ბეფხბორას, ჴოწო̆-დჵივწ ბედენე ოჴუჲნ ხაჲϱნას, ო ბოფხბითნას ჰ7ალო̆,
14  ჴენი კნათი შუჲნ ბახენ, სო ტყუჲჰ7 ვასო̆ ვოუ̆გვისენო̆, მაქ ხაϱენეს დონნ, დაჰ7 კაϱ ვაჲხჩედოლინ ლაჴშირნა ქოკევ ჰ7ალო̆ ჴეფსინო̆ ჲოფსტ აკირ აჰ7უჲნო̆,
15  ნაზარლა ყელე ლეცბინას ნასტ, აჰ7 ვახნას ო შარჩომცინე, ღრატეხ დაჰ ვაჲლʻჩედოლინ დაჩო წივაჲნო̆ ბუღან ბალʻენ დონ,
16  შვებ ჲაჲლʻნასე, ჰ7აჭენეს ბუჲტბანორ დაჩო ცჰ7აცა-ცჰ7აცა დაფანტოდბაჲლნო̆ კნათი ჰ7ათხ მინდრეღდაჰ7ოე, ჯაგისან მეყერ ტყუჲჰ7 სე დონცინაჲნო̆,

Part 3
17  აჲფშნაϱღარ თედოლ ნაჟტარცერ აჰ7 ვახენეს, შალფურან კუჲჟ ვუჲტვანორ ჰ7ათხაჭაჲნო̆, თარმარლʻენ დატყობადინას ო დონეხ მე კაძიკ ეშდიჲენ გაგუჲნაჲნოე, ჰ7ათხ ტყოϱ თათრივ დუჲ დიკორაჲნო̆.
18  იორლო̆ ჩუ დეკდიჲენ ო დუჲ, ვაჲხნას ასაჲნო̆, ვახენეს, ჲალʻენ თოფე, ჴაϱენ ჰ7ანახჩონ, დადუჲდგრებადბა̆ლინ ოსიჰ7ე, დოინ დაჰ7მაყო̆ ბალʻინე̆, არივლახ დაჰ7ა ლაჭყბალინ თათაჲრაჲნო̆.
19  მაქ ბახკენ ჴენი კნათიე, ჴენ ას თოფ ცო ჴოსინგესაჲნო̆ - ალʻინ სოგო̆, დონ ჰ7ალო ხეხკრას იორცერღა, აჰ7ო ხეხკრასე თან წმიდგიორგიგო̆ ვუღრას, ლეტა სონ, ჴა თაბნივ ვაღოს ჰ7ონაჲნო̆.
20  კნათინ მაგრამ გებ ტელʻრას აჰ7 ოკფინავჰ7, ა7 ოკფინავჰ7აჲნო̆, ჴეფსორ სონ თათრივ, მაგრამ ცო ჴეϱირ სონაჲნო̆,
21  უჲსი̆ ბუჰ7ბიჲენეთხაჲნო̆, დაჰ7ა ჴაჩბინათხ ბანიϱაჲნო̆.

Part 4
22  დაჰ7 ბავბიჲენეთხ, შიიტǝ კი ვარალო̆, ჴოიტǝ კი ვარალო̆, ვარაჲნო̆.
23  კნათივ ქაჲრცხ დაჰ7 დაფხინჲევო, ფჰ7აჲრჩკაწივ, დალაბოვბალო̆ ობი, ლივნას მა დაფხოთაჲნოე, დაჰ7 დაფხინ.
24  გველხოკრისან ბატერ ოსი ბარწინო̆.
25  შილღეჩ დენი განჯერენ პრისტავ ვეϱენე̆, ალʻინ თხოგო̆ მე - ბაცბი, ღაზენ საქმ თაგჲინუჲშ, წეთǝ დინუჲში̆, მაგრამ დაჰ7 მოϱ მა ბაფხბორათაჲნო̆. ვუხ დორათხ, ცომ ალʻინგეთხე, ჰ7ათხ მენ ვარ შუგოჰ7აჲნო̆ ალʻინაჲნო̆. ჰ7ამივაϱ ალʻინ მე დემეტრ ვარაჲნო̆.
26  ას აჲლʻნასაჲნო̆ ჲეო... აი ჲეო, დაჰ7 მაყო̆ ლიბლეთ სონ კაცო, სოგო ეჴრინ ქორთო̆ მიჩუხ ბა, ჟე ლაუ̆მუ̆ და დახენო̆, ჟე დადოლ დუჲნ და სოგო, ე კოჟიგო ცჰ7აϱცომ და, ბა, კუჲჟი, აჰ7 კისრბადებალე̆ კაცო, ხარჯ ჲეϱჩე ჰ7ონ, ვუშ, ოჰა დაჰ7 ჲჴოს ჰ7ონაჲნო̆.
27  კოჟის ალʻინ ვუნდავუნ ცუჲნო̆, ჲევო̆. ჲე, ო რუსეგო̆ აჲლʻნათხე მე, აი კოჟი ვარაჲნო̆, ჩუ დაწერადვიჲენე̆ კუჲჟი̆, კოჟინ ხატაე̆ დეϱენ, სო მა ვასენა ვისენ.

---

Achtung: Dieser Text ist mit Unicode / UTF8 kodiert. Um die in ihm erscheinenden Sonderzeichen auf Bildschirm und Drucker sichtbar zu machen, muß ein Font installiert sein, der Unicode abdeckt wie z.B. der TITUS-Font Titus Cyberbit Unicode.

Attention: This text is encoded using Unicode / UTF8. The special characters as contained in it can only be displayed and printed by installing a font that covers Unicode such as the TITUS font Titus Cyberbit Unicode.

---

---

Copyright Jost Gippert , Frankfurt a/M 2001. No parts of this document may be republished in any form without prior permission by the copyright holder.