და იყო ერი მდრტჳნავ ბოროტად წინაშე უფლისა, და ესმა უფალსა და გულმწყრალ იქმნა რისხვით. და აღატყდა მათ შორის ცეცხლი უფლისა მიერ და შეჭამა კერძოჲ რაჲმე ბანაკისაჲ.
და ღაღატ-ყო ერმან მოსეს მიმართ; და მოსე ილოცა უფლისა მიმართ და დასცხრა ცეცხლი.
და ეწოდა სახელი ადგილისაჲ მის `მოცეცხლვა', რამეთუ აღატყდა მათ შორის ცეცხლი უფლისა მიერ.
და აღრეულსა მათ თანა გულმან უთქუა გულისთქუმაჲ და დასხდეს და ტიროდეს, და ძენი ისრაელისანიცა ტიროდეს და იტყოდეს: ვინ მაჭამოს ჩუენ ჴორცი?
მოვიჴსენენით თევზნი, რომელთა ვჭამდით ეგჳპტეს მედად, და აჭურსა და ნესუსა და პრასასა და ხახუსა და ნიორსა.
ხოლო აწ სული ჩუენი დადნების, არარაჲს გარნა მანანაჲს მიმართ ხოლო თუალნი ჩუენნი.
ხოლო მანანაჲ იყო, ვითარცა თესლი ქინძისაჲ, და ხილვაჲ მისი, ვითარცა ხილვაჲ მყინვრისაჲ.
მიმოჰვლიდა ერი და შეჰკრებდა და დაჰფქვიდეს მას წისქჳლითა და მოჰგლიდეს ფილითა, შეაგბობდეს მას ქოთნითა და იქმოდეს მას ყუერბეულებად. და იყო სიჰამე მისი, ვითარცა გემოჲ, ვითარცა გამორჩეულისა ზეთისაჲ.
და ოდეს გარდამოვალნ ცუარი ბანაკსა ზედა.
და ესმა მოსეს მტირალთაჲ მათ ერობისაებრ მათისა, თითოეულისაჲ კარსა ზედა თჳსსა, და გულმწყრალ იქმნა რისხვით უფალი ფრიად და წინაშე მოსესსა იყო ბოროტ.
და თქუა მოსე უფლისა მიმართ: რაჲსათჳს განაბოროტე მსახური შენი? და რად არა ვპოე მადლი წინაშე შენსა დადებად რისხვაჲ ერისაჲ ამის ჩემ ზედა?
ნუ მე მუცლად ვიღეა ყოველი ესე ერი, ანუ მე ვშვენ იგინი, Page of ms. Ga: 126r რამეთუ მეტყჳ მე: აღიხუენ იგინი წიაღსა შენსა, ვითარცა აღიქჳს მგრკჳნველმან მწოარი ქუაყანად მიმართ, რომლისა ვეფუცე მამათა მათთა?
ვინაჲ ჩემდა ჴორცი საცემელად ყოვლისა ამის ერისა? რამეთუ ტირან ჩემ ზედა, მეტყუელნი: გუეც ჩუენ ჴორცი, რაჲთა ვჭამოთ.
ვერ ძალ-მიც მე მხოლოსა ტჳრთვად ერი ესე. რამეთუ ფიცხელ არს ჩემდა სიტყუაჲ ესე.
და უკუეთუ ესრეთ მიყოფ მე, მომაკუდინე მე მოკლვით, უკუეთუ ვპოვე წყალობაჲ შენ მიერ, რაჲთა არა ვიხილო განბოროტებაჲ ჩემი.
და თქუა უფალმან მოსეს მიმართ: შემიკრიბენ მე სამეოცდაათნი მამაკაცნი მოხუცებულთაგან ისრაელისათა, რომელნი შენ მაგან უწყნი, ვითარმედ იგინი არიან მოხუცებულნი ერისანი და მწიგნობარნი მათნი, და მოიყვანენ იგინი კარვად წამებისად და დადგენ მუნ შენ თანა,
და გარდამოვიდე და ვიტყოდე მუნ შენ თანა, და მოვიღო სულისაგან, რომელ არს შენ ზედა, და მივსცე მათ ზედა და შეგეწეოდიან შენ თანამომართებასა მას ერისასა, და არა გეტვირთნენ იგინი შენ მარტოსა
და ერსა ჰრქუა: უბიწო იქმნენით ხვალისა და ჭამეთ ჴორცი, რამეთუ სტიროდეთ წინაშე უფლისა, მეტყუელნი: ვინ მაჭამოს ჩუენ ჴორცი? რამეთუ კეთილ იყო ჩუენდა ეგჳპტეს შინა. და მოგცეს თქუენ უფალმან ჴორცი ჭამად.
... არცა ორთა, Page of ms. Ga: 126v არცა ხუთთა დღეთა, არცა ათთა დღეთა, არცა ოცთა დღეთა,
ვიდრე თთჳსსა დღეთამდე შჭამდეთ, ვიდრემდის გამოჴდეს პირჩთაგან თქუენთა და იყავნ თქუენდა ნაღველ, რამეთუ ურწმუნო ექმნენით უფალსა, რომელი არს თქუენ შორის და სტიროდეთ წინაშე მისსა, მეტყუელნი: რად ჩუენდა გამოსლვაჲ ეგჳპტით?
და თქუა მოსე: ექუსასთა ათასეულთა მკჳრცხლთაჲ არს ერი, რომელთა ვარ მე მათ შორის, და შენ სთქუ: ჴორცი მივსცე მათ და ჭამდენ თთჳსა დღეთა?
ნუ ცხოვარნი და ზროხანი დაეკლნენა მათ და კმა-ეყვნენ მათ?
და თქუა უფალმან მოსეს მიმართ: ნუ ჴელი უფლისაჲ არა კმა-ეყოსა? ეგერა სცნა, უკუეთუ მოგეწიფოს სიტყუეაჲ ჩემი ანუ არა.
და გამოვიდა მოსე და თქუნა ერისა მიმართ სიტყუანი ესე, და შეკრიბნა სამეოცდაათნი მამაკაცნი მოხუცებულთაგან ერისათა და დაადგინნა იგინი გარემოჲს კარვისა.
და გარდამოვიდა უფალი ღრუბლითა და იტყოდა უფალი მისსა მიმართ. და მოიღო სულისაგან, რომელი იყოს მის ზედა, და დადვა სამეოცდაათთა Page of ms. Ga: 129r კაცთა ზედა მოხუცებულთა. და ვითარცა Page of ms. Gb: 54r განისუენა მათ ზედა სულმან, და წინაჲსწარმეტყუელებდეს, ხოლო არღა შესძინეს მერმეცა.
Page of ms. Ga: 129v და დაშთეს ორნი კაცნი ბანაკსა შინა: სახელი ერთისაჲ ელდად და სახელი მეორისაჲ მოდად. და განისუენა მათ ზედა სულმან. და იგინი იყვნეს აღწერილთაგანნი და არა მოვიდეს კარვად და წინაჲსწარმეტყუელებდეს ბანაკსა შინა.
Page of ms. Gb: 54v და მიმსრბოლმან ჭაბუკმან მიუთხრა მო\სეს Page of ms. Ga: 130r და თქუა, მეტყუელმან: ელდად და მოდად წინაჲსწარმეტყუელებენ ბანაკსა შინა.
მიუგო ისო ნავესმან, წინაშემდგომმან მოსესმან, რჩეულმან მისმან, და ჰრქუა: უფალო მოსე, დააყენენ იგინი.
და ჰრქუა მას მოსე: ნუ ჰმეშურობა შენ ჩემდად? და ვინ მომცეს ყოველი ერი უფლისა წინაჲსწარმეტყუელად, რაჟამს მისცეს უფალმან სული თჳსი მათ ზედა?
და წარვიდა მოსე ბანაკად, იგი და მოხუცებულნი ერისანი.
და გამოვიდა სულისა მიერ და გამოაწიაღა მწყერმარჴილით ზღჳთ და მიჰფინა ბან\აკსა Page of ms. Ga: 130v ზედა, გზასა დღისასა ამიერ და გზასა დღისასა იმიერ, გარემოჲს ბანაკისა, ვითარ ორ წყრთა ქუეყანისაგან.
და აღდგა ერი ყოველსა დღესა ხვალისაგან და შეკრიბეს მწყერმარჴილი; მცირედისამან -- ათი კოროსი, და განაჴმნის თავთა თჳსთათჳს განაჴმობანი გარემოჲს ბანაკისა.
და ჴორცი ჯერეთ იყოღა კბილთა ქუეშე Page of ms. Ga: 131r მათთა პირველ ვიდრე მოკლებისა, და უფალი განრისხნა ერსა ზედა და დასცა უფალმან ერსა წყლულებაჲ დიდი ფრიად.
და ეწოდა სახელი ადგილისაჲ მის `სამარე გულისთქუმისაჲ', რამეთუ მუნ დაჰფლეს ერი გულისმთქუმელი.
და `სამარებისაგან გულისთქუმისა' წარიტრა ერი იგი ასიროთდ, და იყო ერი ასიროთს.
