და ესე სიტყუანი, რომელნი წარგზავნნა იერემია წინაჲსწარმეტყუელმან იერუსალიმით მოხუცებულთა მიმართ განსახლებისათა Page of ed. 1709: 99a და მღდელთა მიმართ და ცრუ-წინაჲსწარმეტყუელთა და ყოვლისა მიმართ ერისა, ეპისტოლე ბაბილონდ მიმართ განსახლებისა და ყოვლისა მიმართ ერისა, რომელნი განსახლნა ნაბუქოდონოსორ იერუსალიმით ბაბილონდ.
შემდგომად გამოსლვისა იექონია მეფისა და მეფიაჲსა და საჭურისთა და მთავართა იუდაჲსთა იერუსალიმით და ყოვლისა აზნაურისა და ჴელოვნისა და პყრობილისა იერუსალიმით.
ჴელითა ელეასან, ძისა საფანისითა, და გამპრია, ძისა ქელკიაჲსითა, რომელნი წარავლინნა სედეკია მეფემან იუდაჲსმან მეფისა მიმართ ბაბილონისა ბაბილონდ მეტყუელმან.
ესრეთ თქუა უფალმან ძალთამან, ღმერთმან ისრაილისამან, განსახლებასა ზედა, რომელი განისახლა იერუსალიმით ბაბილონდ.
იშენეთ სახლები და დაემკჳდრენით და დაჰნერგეთ სამოთხები და ჭამენით ნაყოფნი მათნი.
და მიიყვანენით ცოლნი და შვილ ისხენით, ძენი და ასულნი, და მიიყვანენით ძეთა თქუენთად ცოლნი. და ასულნი თქუენნი მისცენით ქმართა, და შვნენ ძენი და ასულნი, და განმრავლდით მუნ და ნუ შეჰმცირდებით.
და იძიეთ მშჳდობად ქუეყანისა, რომლისა მიმართ განგასახლენ თქუენ მუნ, და ილოცევდით მის ძლით უფლისა მიმართ, რამეთუ მშჳდობასა მისსა შინა იყოს მშჳდობა თქუენი.
რამეთუ ესრეთ თქუა უფალმან ღმერთმან ისრაილისმან: ნუ აღგარწმუნებენ თქუენ ცრუ-წინაჲსწარმეტყუელნი თქუენი, შორისნი თქუენსა, და ნუ აღგარწმუნებედ თქუენ მისანნი თქუენნი, და ნუ ისმე[ნ]თ ძილის-შორისთა თქუენთასა, რომელთა იძილის-შორისებთ თქუენ.
რამეთუ ცრუთა გიწინაჲსწარმეტყუელებენ თქუენ იგინი სახელითა ჩემითა, არ მიმავლინენ იგინი, თქუა უფალმან.
რამეთუ ესრეთ თქუა უფალმან: ოდეს ეგულების სრულ ყოფაჲ ბაბილონს სამეოც Page of ed. 1709: 99b და ათსა წელსა, ზედმოვიხილო თქუენდა და დავადგინნე თქუენ ზედა სიტყუანი ჩემნი კეთილნი მოქცევად თქუენდა ადგილისა ამის მიმართ.
რამეთუ მე უწყი გულის-სიტყუაჲ, რამეთუ მე ვარ და ვსიტყუავ თქუენ ზედა, თქუა უფალმან გულისსიტყუასა მშჳდობისასა და არა ძჳრთა მიცემად თქუენდა ამათ სასოებაჲ კეთილი.
მხადოდით მე და ხჳდოდით, და ილოცეთ ჩემდამო, და ვისმინო თქუენი.
და გამომიძიეთ მე და გეპოვო თქუენ, რაჟამს მიძიოთ მე ყოვლითა გულითა თქუენითა.
გამომეცხადო თქუენ, თქუა უფალმან, და მოვაქციო ტყუეობაჲ თქუენი და შეგკრიბნე თქუენ ყოველთაგან წარმართთა და ყოველთაგან ადგილთა, სადა განგთესენ თქუენ მუნ, თქუა უფალმან, და მოგაქცინე თქუენ ადგიდ, ვინაჲ განგასახლენ თქუენ მიერ, თქუა უფალმან, და მოგაქცინე თქუენ ადგილსა ამას, ვინაჲ-იგი წარგტყუენენ თქუენ.
რამეთუ სთქუთ: დამიდგინნა ჩუენ წინაჲსწარმეტყუელნი ბაბილონს.
რამეთუ ამათ იტყჳს უფალი მეფისა მიმართ, მჯდომარისა საყდარსა ზედა დავითისსა, და ყოველსა ზედა ერსა, დამკჳდრებულსა ქალაქსა ამას შინა ძმათა თქუენთა, არა განსრულთა თქუენ თანა განსახლებასა შინა.
ამათ იტყჳს უფალი ძალთაჲ, ღმერთი ისრაილისაჲ: აჰა მე განვავლენ მათდამი მახჳლსა და სიყმილსა და სიკუდილსა და მივსცე მათ, ვითარცა ლეღუნი სუარი მისნი, რომელნი არა იჭამნენ სიჯერკულისაგან.
და დევნა-ვყო უკუანა მათსა მახჳლითა და სიყმილითა და სიკუდილითა და მივსცნე იგინი სარყეველად ყოველთა მეფობათა ქუეყანისათა და საფიცრად და განსაქარვებელად და სასტჳნველად და საყუედრელად ყოველთა წარმართთა, სადა განვთესენ იგინი მუნ.
მის წილად, რამეთუ არა ისმინეს სიტყუაჲ ჩემი, იტყჳს უფალი, მე განვავლინნე მათდა მონანი ჩემნი, წინაჲსწარმეტყუელნი, აღმმსთობმან და მიმავლ\ენელმან, Page of ed. 1709: 100a და არა ისმინეს, თქუა უფალმან.
და თქუენ, ისმინეთ სიტყუაჲ უფლისაჲ, ყოველმან განსახლვამან, რომელი განვავლინე იერუსლიმით ბაბიდონდ (15) რამეთუ სთქუთ: დაადგინნა უფალმან ჩუენ ზედა წინაჲსწარმეტყუელნი ბაბილონს შინა.
ესრეთ თქუა უფალმან ძალთამან, ღმერთმან ისრაილისამან აქიაბის ზედა, ძის კოლაჲსისა, და სედეკიაჲს ზედა, ძისა მაასისა, რომელნი გაწინაჲსწარმეტყუელებენ თქუენ სახელითა ჩემითა უსამართლოდ: აჰა მე მივსცემ მათ ჴელთა ნაბუქოდონოსორ მეფისა ბაბილოვნისათა, და მოწყჳდნეს იგინი წინაშე თუალთა თქუენთა.
და აღიღონ მათ ზედა წყევაჲ ყოველსა შორის განსახლებულობასა იუდაჲსსა ბაბილონს შინა მეტყუელთა: გიყავნ შენ უფალმან, ვითარცა უყო სედეკიას და ვითარცა აქიაბს, რომელნი განტაფნა მეფემან ბაბილოვნისამან ცეცხლისა მიერ.
ძლით უსჯულოებისა, რომელ ქმნეს იერუსალიმს შინა და იმრუშებდეს ცოლებსა მოქლაქეთა მათთასა და სიტყუაჲ გამოიცხადეს სახელითა ჩემითა ცრუჲ, რომელი არა უბრძანე მათ, და მე ვარ მცნობელი და მოწამე, იტყჳს უფალი.
და სამეაჲს მიმართ ელამიტელისა სთქუა.
ამათ იტყჳს უფალი ძალთაჲ, ღმერთი ისრაილისაჲ: მის წილ რამეთუ შენ წარსცენ სახელითა ჩემითა წიგნნი ყოვლისა მიმართ ერისა იერუსალიმს შინასა, არ მიგავლინებენ სახელითა ჩემითა და სოფონიაჲს მიმართ, ძისა მასესსა მღდელსა და ყოველთა მღდელთა, მეტყუელმან:
უფალმან მიგცა შენ მღდლად იოდაეს წილ მღდელისა ყოფად შენ ზედა-მდგომელად სახლსა შორის უფლისასა ყოვლისა კაცისა მწინაჲსწარმეტყუელებისა და ყოვლისა კაცისა მცბიერისა, რაჲთა მისცე იგი შესაწყუდეველად სინოხს და კატარრაკატსა მას.
და აწ რად არა შეჰრისხენით იერემიას ანათოთელსა, მწინაჲსწარმეტყუელებსა თქუენსა?
რამეთუ მოავლინა Page of ed. 1709: 100b ჩუენდა ბაბილონდ მიმართ მეტყუელმან: შორსღა არს ჟამი, იშენეთ სახლები და დაემკჳდრენით, დაჰნერგეთ სამოთხები და ჭამეთ ნაყოფი მათი.
და აღმოიკითხა სოფონია მღდელმან წიგნი ესე ყურთა მიმართ იერემია წინაჲსწარმეტყუელისათა.
და იყო სიტყუაჲ უფლისაჲ იერემიაჲს მიმართ, მეტყუელი.
მიავლინე ყოვლისა მიმართ განსახლვისა, მეტყუელი: ესრეთ იტყჳს უფალი სამეაჲს ზედა ელამიტელისა, მეტყუელსა: ვინაჲთგან გიწინაჲსწარმეტყუელა თქუენ სამეა, და მე არ მოვავლინე იგი, და მოსავ-გყვნა თქუენ ცრუსა ზედა.
ამისთჳს ესრეთ თქუა უფალმან: აჰა მე ზედ-მოვიხილო სამეას ზედა ელამიტელსა და ნათესავსა ზედა მისსა, და არა იყოს მისი კაცი მჯდომარე შორის თქუენსა ხილვად კეთილთა, რომელნი მე გიყვნე თქუენ, თქუა უფალმან, რამეთუ განდრეკაჲ თქუა ძჳნად უფლისა.
