TITUS
Svan Chrestomathy
Part No. 34
Previous part

Text: 34 
Page of edition: 35 
Line of edition: 35 
34. ბოფშრე ლა̈შდრა̄ლა̈რ


Line of edition: 36       შვანისგაჲ ხოხახ ბოფშა̈რს ლიშდრა̄ლ, იმჟი̄ნ იშგნა̈̄გი ბოფშა̈რს:

Line of edition: 37       1. მირმიქე̄ლა. ბოფშა̈რ ჟი ინზო̄რა̈̄ლხ, ეშდღეთ მურგვალდ ჩუ იგნიხ
Line of edition: 38    ი ტოტა̈რს უშხვა̄რ ბარჯა̈რქა ხადე̄სგიხ. მე̄რმე ეშდ ჟი ხეკა̈̄რჩხიხ ალჲა̈რს ი ბარჯა̈რჟი
Line of edition: 39    ჟი ხეგნიხ. ალჲა̈რი ტოტა̈რს უშხვა̄რ ბარჯა̈რჟი ხადე̄სგიხ, ერე ჩუ ნომა ანშყეხ.
Line of edition: 40    ეჩქანღო ჩუბეშა̈რ ლისიპს იბნეხ ი იღრა̈̄ლხ: "ქე̄ილა̄, ქე̄ილა̄, ჟ' აჲ ლაჯსიპვნი,
Page of edition: 36  Line of edition: 1    ჩუ̄ჲ ლაჯკვა̄ნე , ო̄რი მჷრმიქე̄ლა!" ალჲა̈რს ჟიბეშა̈რ ხოცა̈̄დიხ: "ქე̄ილა̄, ქე̄ილა̄,
Line of edition: 2    დეშ ლანსიპვნიდ, დეშ ლანკვა̄ნედ, ო̄რი მირმიქე̄ლა!" ამჟი̄ნ იშდრა̈̄ლხ ეზა̈რ ხა̈ნს.
Line of edition: 3    ეჩქანღო ჩუბეშა̈რ ქა ხოქდენიხ, ჟიბეშა̈რ ჩუ შჷ̄დნიხ ი ხვა̈ჲ ლი̄ცვ ხეფსი.

Line of edition: 4       2. ლილთო̄ბა̈ლ. ბოფშარ, ოშვა̈̄ჲ დო ი̄რახ, ჩუ იყვლუ̄რა̈̄ლხ ჲარვდ,
Line of edition: 5    ხჷნსგა -- აშხვთე ი ხჷნსგა -- მე̄რმათე. ალჲა̈რს ჩი ცჷ̄ჴემდა̈რ ხუღვეხ ი ჩუ სგურხ აშხვ
Line of edition: 6    ა̈გის. ზუგვი ძირისგა ნიშა̈ნ ხო̄გხ ი ეჩხა̄ვ ცჷჴემდა̈რს ხა̈ფშვდეხ თვითო̄ლაჟი̄ნ ხერასშვ.
Line of edition: 7    ქა ლესრე ერვა̈̄ჲ ლი, ეჯას ქა მჷსრე ჟი ლესგვრე ხა̄რ ბარჯა̈რჟი̄ნ ი ქა ლეი
Line of edition: 8    სუმინ.

Line of edition: 9       3. ლიშნეგალ. ბოფშა̈რ ჩუ ყველნიხ ჲარვდ. ეშხუ მიჯვრა ხუღვეხ ი
Line of edition: 10    ამის თვითო̄ლაჟი̄ნ ხა̈ფშვდეხ ნიშა̈ნს. ქა ლესრა ჟი ლესგვრე ხა̄რ ბარჯა̈რჟი̄ნ ქა
Line of edition: 11    მჷსრე.

Line of edition: 12       4. ცხირი ლიჭი̄რხი. ბოფშა̈რ აშხვ ა̈დგილჟი̄ნ ლა̄რაისგა ჯო̄დი ცხირს
Line of edition: 13    ჩუ ხოსვემხ ეჩჟი̄ნ ჩუბა̄ვ, ერე თხვიმილდ ვედნილდ გარ ხოწვა ჟი. ეჩქანღო მინ
Line of edition: 14    ქახიქა ისგვრიხ, გაჩა̈რ ხუღვეხ ი იბნეხ ლიშდრა̈̄ლს.

Line of edition: 15       გა̈ჩა̈ ლიკვა̄ნეს ობა̈შ შვიმიშ ხაკუჩ ლეჩვმად. აშხვ შვიმს ჩუ იჩომ ბეფშვ, ეჩქას
Line of edition: 16    მე̄რმა იბნე ი ამჟი̄ნ, ოდე დო იჩვე̄რი. ეჩქანღო მე̄რმე იბნე ი ეჯა იშდრა̈̄ლ ჩუ
Line of edition: 17    ლიჩო̄რა̄ლა̈̄ლვ.

Line of edition: 18       გა̈ჩ ლი ლეკვა̄ნე ჩიქა ტაფ შივშ, ეჩქანღო თვითო̄ლაჟი̄ნ ფხულა̈რ ლიხ ლეხრესი
Line of edition: 19    ი ეჩჟი̄ნ, ღო თხუმურულ, ეჩქანღო კუპური, ღო პილშვ ლიკვა̄ნე, ეჩქანღო
Line of edition: 20    შდჷქშვ ლიკვა̄ნე, ნებგვაჩუ̄ნ ლითხპი̄ნე ი ეჩჟი̄ნ ლიკვა̄ნე. ამის ჩი̄ ქ'ა̄სრულეხ,
Line of edition: 21    ეჩქას სერ ეშ ხათგჷნეხ ტოტშვ გა̈ჩს ი ლიჩო̄რა̄ლა̈̄ლვ ხათგჷნე. ეჩქანღო ცერი
Line of edition: 22    ნაზიმს ჟი იზმი ცხირთე̄სგა. ეჩქანღო მე̄რმე იბნე ი ეჯაჲ ამჟი იჩომ, ღო მე̄სმეჲ ი
Line of edition: 23    ოშვა̈̄ჲდ ი̄რიხ, მა̈გ ქა იხრესჲელხ. ჲერვა̈̄ჲ მა̈̄ნკვი სგა̄დჰე̄სგი, ეჯას მა̄მ ხა̄რ ლეჭი̄რხი
Line of edition: 24    ცხირ, ჲერვა̈̄ჲ ღვეშგემეპილდ სედნი ი სგა დოშ ადჰე̄სგი, ეჩის ხა̄რ შდჷქარშვ ლეჴფე
Line of edition: 25    ცხირ, მარე სურუ გარჯ ხოჴდენი, ცხირ ჩუ̄ბა̄რ ხოსვა ი შდჷქარშვ ლეგ ლეგდური
Line of edition: 26    ხა̄რ.

Line of edition: 27       5. ლიჩხჷტა̈̄ლ. ჲორი ბეფშვ ჟი ინზო̄რეხ ჩხჷტა̈რს, ჩუ ილთობა̈̄ლხ ი
Line of edition: 28    ჲესვა̈̄ჲ ხუნკვიდ ხეხო̄ლა, ეჯა იბნე ლიჩხჷტა̈̄ლს.

Line of edition: 29       შიყვილთე̄სგა სგა იჰრე ჩხჷტა̈რს ი ჟ'აკვა̄ნე ჟიბა̄ვ. ეჩქანღო შის ქა̄მენ ხოხლინე.
Line of edition: 30    ეჩეჟი̄ნ ჩუ მა̈̄ სედნიხ ჩხჷტა̈რ, ეჯჲა̈რს ჟი იშჷლდა̈ნიხ. ლახე ტველ ი ტველ
Line of edition: 31    ლიხ, ეჩქას მა̄მ გვეშ ხეხო̄ლიხ. ლახე ყად ხეჩდა, ეჯა ეჩი̄შ ლი. ამჟი̄ნ იხრესჲე̄ლხ.
Line of edition: 32    ჟი ხეფშენიხ, ეჩქას ნანზო̄რ ჩხჷტა̈რს ქა იშჷლდა̈ნიხ, ესვა̈̄ჲ ხოფშირა ხუღვე, ჲედ
Line of edition: 33    მა̈ზუმვა̈ჲ ქა ხოსა̈რ, ეჩზუმ ტიკ ხო̄ზ მე̄რმა.
Line of edition: 34    მა̈ზუმვა̈ჲ ქა ხოსა̈რ, ეჩზუმ ტიკ ხო̄ზ მე̄რმა.

Line of edition: 35       6. ლიყანსგურა̈̄ლ. დი̄ნა̈ლ ი ჭყინტა̈რ ჩუ ყველნიხ ჲარვდ ი ჩუ ილთობა̈̄ლხ.
Line of edition: 36    ეჩქანღო ყა̈̄რს აკვა̄ნეხ. ყა̈̄რ ლჷ̄ტა̄ბე ლი ეჯკა̈ლიბდ ერე აშხვხა̈ნ ში̄მი
Line of edition: 37    ლაგვდირ ხა̄რ. ყა̈̄რს ნე̄სგაჲსგა აშხვ ფოყხა̈ნ ჯვა̈რ ხა̄გ. ალას ქუთ ხაჟხა. მე̄რმა
Line of edition: 38    ფოყხა̈ნ მა̄მგვეშ ხა̄გ ი ამის კვახ ხაჟხა.

Line of edition: 39       ეშხუ ნაღა̈ლ "ქუთს" ილკვჰე ი მე̄რმე ნაღა̈ლ -- "კვახს". ყა̈̄რს ეშხუ ლა̈სპუნუშ
Line of edition: 40    ჟ'აკვა̄ნე. ეშხუ ნაღა̈̄ლ ტუ̄ლი: "ქუთა̈ ლა̈მზჷრ ქუთ ჩვემნ ჟიბა̄ვ, ქუთ,
Line of edition: 41    ქუთ, ქუთ! "

Line of edition: 42       მე̄რმე ნაღა̈̄ლ ტუ̄ლი: "კვახა ლა̈მზჷ̄რ', ათხე კვახობ ლი ი კვახ ხა̈ყრ ჟიბა̄ვ.
Line of edition: 43    კვახ, კვახ, კვახ! "
Page of edition: 37  Line of edition: 1    ხედვა̄ლე ლულკვჰე ჟიბა̄ვ ხეყრენი, ეჯა ლი მჷბნე ლიყა̄ნსგურა̄ლა̈შ. ამჩუ
Line of edition: 2    ჟ'ასყე̄ნეხ ჰაგულდშვ მა̄დხვა̄ჲ ფათქჷლდს. ალას ხაჟხა გარდჷლდ. ეჩე̄სგა დე̄სგიხ
Line of edition: 3    ყა̄ნსგვს. ყა̄ნსგვ მეკვშდა ზექხა̈ნქა მექვცე ლი ი აშხვ პილხა̈ნ ლუჭვი̄ლშტ ხა̄რ.
Line of edition: 4    ამეჟი̄ნ მეყა̄ნსგურა̈̄ლ ყა̈̄რს ხატყცი. ყა̄ნსგვ ჟი შყედნი, ეჩას ჩუქვა̄ნჟი̄ნ აჯაღ ყა̈̄რს
Line of edition: 5    ხატყცი მეყა̄ნსგუნა̈̄ლ ი ოშვა̈̄ჲდს მოშ ლა̈ჲყვასგე, ეჩშელდ ხეშჷლდი. მე̄რმა ფას
Line of edition: 6    კალთჲა̈რ ი ფაყვა̈რ ხუღვე ლა̈რმინა̄ლდ. ლახე ყა̄ნსგვს ჟი ირმიხ, ეჩქა მეყა̄ნსგუნა̈̄ლ
Line of edition: 7    ლუჩო̄რე ლი, ლახე დოშ, ეჩქას აჯაღჷდ იყა̄ნსგუნა̈̄ლ, ოდე ჩუ დო იჩვე̄რი,
Line of edition: 8    ეჩქად. ეჩქანღო მე̄რმე ხეცა̈̄დი. სამ ნა̈ყირვჟი ლახე დოშ აკვა̄ნე ჟიბა̄ვ ყა̄ნსგვს
Line of edition: 9    მეყა̄ნსგურა̈̄ლ, ეჩქასი ლუჩო̄რელი. ამჟი̄ნ ქა იხრესი ეშხუ ნაღა̈ლ, ეჩქანღო მე̄რმე
Line of edition: 10    ფა ხეცა̈̄დი ი ამჟი̄ნ იჩო ეჯა̄ჲ. ჟი ხეფშენიხ, ეჩქა ხომჷრხელდა̄მ ეჩშელდ ტიკ
Line of edition: 11    ხო̄ზ ე, ოშვა̈̄ჲდშვ ხოფშირა ხუღვე მე̄რმა.

Line of edition: 12       7. კელიკაჩხოშ ლი̄ზი. ჭყჷნტა̈რ აშხვ ა̈გის ჩვა̈ნშა̈ნიხ. ეჩქანღო
Line of edition: 13    ჩუ ილთობა̈̄ლხ. მე̄რმა ლჷნშა̈ნ ა̈დგილხა̈ნქა ეშხუ იბნე კელიკაჩხუჩ ლი̄ზის ი მა̈ნკვი̄
Line of edition: 14    ლჷ̄ნშა̈ნ ა̈დგილდ სუმინ ქა ლეცხეპ ხა̄რ. ლახე დოშ ხეცხპენი, ქა ხეყჩენი. ეჩქანღო
Line of edition: 15    მე̄რმე ხეცა̈̄დი ი ამჟი̄ნ იხრესჲელხ. ხედვა̈̄ჲ ფა ქა ხა̈სრე, ეჯა ხაკუჩ ერე მე̄რმე̄მ
Line of edition: 16    ჟი ლა̈̄ჲსგურას ბარჯა̈რჟი̄ნ ი სუმინ ქ'ა̄ხცხჷპას ლჷნშა̈ნ ა̈დგილა̈რს ჟი უშვმინად.

Line of edition: 17       8. ლიფაყუნა̈̄ლ. ბოფშა̈რ ჟი ინზო̄რა̈̄ლხ. აშხვ ხოლა̄მ ნაფყურას
Line of edition: 18    ნა̈ვნარშვ ჟ'ასყე̄ნეხ ფუ̄რთო̄ გოვა̈რდ. ეშხუ ბეფშვ ჩუ იგნი ლუკუ̄ნკვად ბაჩვცახა̈ნ
Line of edition: 19    ი შიყ ვეშგმა̄ვ ხა̄რ. მე̄რმე სგა ხექა̈̄ლ ი ტვეტს ხატყცი ჯაჭა̈რჩუ̄ნ ი ლა̄ტვთე
Line of edition: 20    ყერ. ფაყვ ლეყერს ხუღვე: ჟი ისპუნი ი მეჭვმა, მჷყერს, ქა ხა̈ფშვდე. ქა ლახე
Line of edition: 21    მოშ ხატყცი, ეჩქას ლეყერს ხა̄რ ლეგნე, ლახე დოშ, ეჩქას ჯა̄დ ლი ჩუ მეგნე. ეჩქას
Line of edition: 22    მე̄რმე ბეფშვ ხექა̈̄ლ, ეჯაჲ ტვეტს ხატყცი ი ქ'ა̈̄სკნე. ამისი ხა̈ფშვდე ფაყვს ჩუ
Line of edition: 23    მეგნე. ამჟი̄ნ იხრესჲე̄ლხ ბოფშა̈რ. ესვა̈̄ჲ ხოფშირა̄მინ ხეხოლა ლიგნე, ეჩას ხვა̈ჲ
Line of edition: 24    ნა̈ყირვ ღალ ხენზვე̄რი ჯაჭა̈რჩუნ. ჲერვა̈̄ჲ ხოშა ენა̈სლი, ეჯა ქა იქდენი ბუ̄რთის.


Line of edition: 25 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.