TITUS
Svan Chrestomathy
Part No. 55
Previous part

Text: 51b 
Page of edition: 50 
Line of edition: 1 
ბ


Line of edition: 2       და̈რს ი ჰა̄ვდა̈რს შვანა̈რ ნა̈პო̄ლა̈რხა̈ნქა, ქვინლჷმგენა̈̄ლხა̈ნქა, ლჷცხა̈ნქა, მჷცხიხა̈
Line of edition: 3    ნქა, ა̈თუხა̈ნქა, ზჷსყა̈რხა̈ნქა ი იშგახა̈ნქა იმჴერდახ მო̄შ-მო̄შდ.
Line of edition: 4    ლიც ლახე ნა̈ბოზს ტებდი ლი, ეჯას ჰა̄ვდა̈რ ხოხალ. ლახე მაზვა̈ბ ნა̈ბოზს
Line of edition: 5    მჷცხი ლი, ეჯას მე̄რმა ლადა̈ღ და̈რ ხოხალ. ლახე ლიც ნა̈ბოზს შჷლი, ეჯასი და̈რ
Line of edition: 6    ხოხალ.

Line of edition: 7       ნა̈ბოზს ლახე ზჷსყა̈რ მასა̈რდ იჴა̈̄ფჲე̄ლხ ი გვა̈მიდ ა̈რიხ, ეჯას მე̄რმა ლადღი
Line of edition: 8    ჰა̄ვდა̈რ ხოხა. ქა̈რი მა̈ზგუვა̈̄რს ლახე ასვა̈რ ლა̈̄თშვ ხოშა̄მ ხოკვშეხ, ეჯას მე̄რმა ლა̈
Line of edition: 9    დღი ჰა̄ვდა̈რ ხოხა. ქორისგა ლახ კვა̈მ დო̄მ იგნი ი ქორ წყჷლჲა̈ნ ლი, ეჯას მე̄რმა
Line of edition: 10    ლა̈დღი და̈რ ხოხალ. კერი სგვებნე ლა̈ლსება ლახე ჩუ იკვმუნი, ეჯას ჰა̄ვდა̈რ ხოხა
Line of edition: 11    მე̄რმა ლა̈დღიშდ. ლემსგი მჷლა̄მ ი კვა̈მ ლახე ჟიბავ ესღრიხ, ეჯა მე̄რმა ლა̈დღიშდ
Line of edition: 12    მეგვა̄ლა̈̄ლ ლი. მე̄რა̈რ ლახე ქორისგა ხოფშირა ა̈რიხ ლა̈̄თშვ ი იჴა̈̄ფჲე̄ლხ,
Line of edition: 13    ეჯა მეჰა̄ვდარ ლი. ჟა̄ბრა ბიქვს ნა̈ბოზს, მე̄რმა ლა̈დღი ჰა̄ვდა̈რ ხოხალ, ჩვა̄ბრას --
Line of edition: 14    მე̄რმა ლა̈დღი და̈̄რ. მუჟჴვარი̄ლ ლახე ლადაღშვ "ჭვი̄ბე-ჭვი̄ბე"-ს ყჷლე, ეჯა
Line of edition: 15    აშთა̄რაღად მეჰა̄ვდარ ლი.

Line of edition: 16       მუჟჴვარი̄ლ ლახ ლადაღშვ "ტეპეტი-ტეპეტი"-ს ტული, ეჯას აშთარაღად და̈̄რ
Line of edition: 17    ხოხალ.

Line of edition: 18       ციცვ ლახე კერა̈̄ჲცახა̈ნ იბრა̈̄ლ ი ლაბრა̄ლჟი შდიმს ჩუ ხა̈ნჩჷდე, მეგვა̄
Line of edition: 19    ლა̄ლ ლი.

Line of edition: 20       შდავლა̈რ ლახე ნა̈ბოზს ჟიხიქა იპვე̄რჲე̄ლხ, ეჯას მე̄რმა ლა̄დღი გვა̈̄ლი ხოხალ.
Line of edition: 21    ჯჷჭკა̈რ ლახ ნა̈ბოზს ქარვანშვ იპო̈̄რჲე̄ლხ, ეჯას მე̄რმა ლადა̈ღ ჰა̄ვდა̈რ ახჭიმ.
Line of edition: 22    მა̄ხე̄რა̈̄ მა̈ზგუვა̈̄რს ლახე ხოშა ხახე̄რი ტა̈ნ ლაყვრაისგა, ეჯა მეჰა̄ვდარდ ლი.
Line of edition: 23    მეგრად ლიშდვეს ი ლიფა̈ლთეს ლიგვა̄ლა̈̄ლ ხოხალ, ნეწვიდს -- ლიჰა̄ვდა̈რ.
Line of edition: 24    დიჲა̈რ ლახე ხოჩა̄მდ დო̄მ იჭი ლა̈მყინაისგა, ეჯა მეჰა̄ვდარდ ლი.
Line of edition: 25    ხამა̈რ ლახე ხორხვეცდ იყვნა̈̄ლხ ი უშხვა̄რ ხეცლა̈ვჲე̄ლხ ლაყვრას, ეჯას ჰა̄ვდა̈რ
Line of edition: 26    ხოხა.

Line of edition: 27       მა̄რა ლახე ლადაღშვ ხოშა ხა̈გდი ეჯას მე̄რმა ლა̈დღი ლიჰა̄ვდა̈რ ხოხა.
Line of edition: 28    ნა̈ბოზს ლახე აფხვა̈რ აშხუდ ყჷრყნიხ, ეჯას მე̄რმა ლა̈დღიშდ ჰავდა̈რ ხოხალ.
Line of edition: 29    დეც ლახე ნა̈ბოზს წჷრნი ლი ლეჟა̈̄ნ, ზაგრა̈რ წყჷლჲა̈ნ, ეჯას ლიგვა̄ლა̈̄ლ ხოხალ.
Line of edition: 30    გოჭა̈რ ლახე სურუს ხაჭყჷ̄ლიხ მინე დის ნა̈ბოზს, ეჯა მეჰა̄ვდარდ ლი მე̄რმა ლა̈დღიშდ.
Line of edition: 31    ნა̈ბოზს ლახე ა̈თუ გუნ ხოჭჭყჷნე ჩი̄, ეჯას ეში̄-ეში̄ ეჯ ლე̄თი ჰა̄ვდა̈რ ხოხალ.
Line of edition: 32    მე̄რა̈̄ლ ლახე ლეჟა̈̄ნისგა ლექვა ესღრიხ, ეჯას მე̄რმა ლადა̈ღ ლიგვა̄ლა̈̄ლ ხოხალ
Line of edition: 33    ი ლახე ლექვა̈̄ნისგა ლეჟა̄ვ ანღრიხ, ეჯა მეჰა̄ვდარ ლი, მარე ალა ლახე ჰამხა̈ნ
Line of edition: 34    ლი, ეჩქას ხოხალ ამჟი. მე̄რა̈̄ლ ლახე ჟიხიქა ლჷპა̄ნტად ესღრიხ, ეჯას აშთარაღად
Line of edition: 35    მე̄რმა ლა̈დღი გვა̈̄ლი ხოხალ. ცხვადვს ლახე ლემასგვხა̈ნქა ობა̈შ მჷჭკა̈მ ხეფვე̄ნთი
Line of edition: 36    ი ქა მა̄მ ხეღრენი, ეჯა მეჰა̄ვდარდ ლი. გვალისგა ლახე ქვინლჷმგენა̈̄ლ იჟვმირჲე̄ლხ
Line of edition: 37    ი ძგურბნიხ, ეჯა მეჰა̄ვდარ ლი. მებუ̈̄ლა̈რ ი შვა̈ლვა̈რ ლახე მჷჟ ხოყვრეხ
Line of edition: 38    ი იტბიდა̈̄ლხ, ეჯას ლიგვა̄ლა̈̄ლ ხოხალ. ლემესგ ლახე ეშ ჩქჷ̄ლთე ი ხოჩა̄მდ ჟი დო̄მ
Line of edition: 39    ხებდინი, ეჯას ლიჰა̄ვდა̈რ ხოხალ. მა̄რა ლახე ხა̈მვი̄რწვჲა̄ლვნე ი საჴსრა̈რს ი ლა̈ფშგა̈̄ლს
Line of edition: 40    ყურფუ̄ნ ხა̄რხ -- ჰავდა̈რ ხოხა. ჯვე̄დჲახა̈ნ ლახე გუ̄ლ ისმი, ეჯას ხოლა ლიჰა̄ვდა̈რ
Line of edition: 41    ხოხალ ი ეჩი̄ ნიშა̈ნ ლი. მეშხე მე̄რა̈̄ლ ლახე აშხვ ფოყთე ლუგვრუზად ი
Line of edition: 42    ჩუბავ იზელა̈̄ლხ -- სკარხალ ხოხა. ჭუნირ ლახე ჟი დო̄მ ისყი ი ხოლა ჰერ ხო̄ზ,
Page of edition: 51  Line of edition: 1    ეჯას ლიჰა̄ვდა̈რ ხოხალ. ჩა̈ნგ ლახე ლჷდა̄წყად ი ხოჩა̄მ ჰერჟი̄ნ ყჷლე, ეჯას ლიგვა̄ლა̈̄ლ
Line of edition: 2    ხოხა. ქვინლჷ̄მგენა̈̄ლ ლახე ნა̈ბოზს ქორთე დო̄მ ჴედნიხ, ეჯა მეჰა̄ვდარ ლი.
Line of edition: 3    ლემესგ ლახე ტყჷრსგნი ი ეჩხა̄ვ-ამხა̄ვ მჷჭკმა̈რს აკვა̄ნე, ეჯა მეჰა̄ვდარ ლი. მაზვა̈ბ
Line of edition: 4    ლახე ხოშა მჷცხი ი ხოჩა გა̈მა̈შ ლი, ეჯას ლიგვა̄ლა̈̄ლ ხოხა. მერბიე̄ლ ლახე იჟმირვჲე̄ლ
Line of edition: 5    ლა̈რბია̄ლჟი̄ნ, ეჯას ჰა̄ვდა̈რ ხოხალ ეში̄-ეში̄. მა̄რა ლახე გუნ ხა̈ქშჲა̄ლვნე
Line of edition: 6    ი ვო̄ბა̈შს იქშჲე̄ლ, ეჯა მეჰა̄ვდარდ ლი. ზჷსყი ზექა̈რ გარ ლახ ჯეღვე̄ნი ი ლემესგ
Line of edition: 7    ეში̄ ქა იჴსმელი, მეგვა̄ლა̄ლ ლი. ჩვეინისგა ნა̈̄ყუ̄ნ ლაფვაჟი̄ნ ლახე პე̄რვე, ეჯას
Line of edition: 8    ლიჰა̄ვდა̈რ ხოხალ. ლახე ხოხვრა ბეფშვილდ ნა̈ბოზს გუნ ლინე̄წვეს იბნე, ჰა̄ვდა̈რ
Line of edition: 9    ხოხალ.

Line of edition: 10       ლახე ლა̈̄თშვ ბეფშვ ხოჩა̄მ გუჟი̄ნ ა̈რი ი ეჩჟი̄ნ ჩუ იყვნა̈̄ლ, და̈რ ხოხალ. მჷრშკა̈ლ
Line of edition: 11    ლახე ქა ირშკინეხ ლამჷრშკელხა̈ნქა, ეჯა ლიგვა̄ლა̄ლე ნიშა̈ნ ლი. ღობრე
Line of edition: 12    რა̈შგობ ლახ ლი, ეჯას გვა̈̄ლჲანობ ი ხოჩა დარობ ხოხალ. ბუზუ̄ლ ლახე გუნ დო̄სდ
Line of edition: 13    ღჷრი ლამშიათე, ეჯას ეჯ ლა̈დღი და̈რ ხოხალ. გიმხა̈ნჟი̄ნ ლახე ვერთქლ ანღრი,
Line of edition: 14    ეჯას ლიგვა̄ლა̈̄ლ ხოხალ. შდავლა̈რ ლახე გვიანდ გარ ღჷრიხ მინე ქუფვა̈რთე̄სგა,
Line of edition: 15    ეჯა მეგვა̄ლა̄ლ ლი. მა̄რა ლახე შდჷმრა̈რ ხაღვდა̈ნ ლა̈̄თშვ, ეჯა მე̄რმა ლა̈დღიშდ
Line of edition: 16    ჰა̄ვდა̈რს ა̈ნშა̈ნი.


Line of edition: 17 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.