TITUS
Svan Chrestomathy
Part No. 62
Previous part

Text: 58 
Page of edition: 54 
Line of edition: 14 
58. ლიჰურჲა̄ლვ


Line of edition: 15       ჰე̄რვა̈ჲს შვანა̈რ ეჯკა̈ლიბ მეჩი ზურა̈ლს ხაყლახ, ჲერვა̈̄ჲ ქა მეკვჰე ლა̈სვ გუნ
Line of edition: 16    მჷჭთად ი ლიმა̈ჩვ ლადა̈ღ ი მიჩა ლისი̄მაქ მა̄მ ხეშყა̈დ ალ ზურა̄ლს მა̈გ ხავცხუნ ი
Line of edition: 17    მა̈გ ხამბჟჷნ. ლახე მა მახე გვეშ ქა ხესმოლდა, ეჯა მა̈გხოლა ხოხალდა ი გუ ხა̄დ,
Line of edition: 18    ერე ხოხვრა̈̄ლ უშხვა̄რ ხოლა̄მ ნომ ხა̈ჩვმუნე̄ნხ ი რიგა̈ბჟი̄ნ ლჷმჷრდე̄ლესვხ. ალა
Line of edition: 19    ტკიც ლ', ე̄რე მახე მეჩის დე̄მ ხო̄ჯრა̈ვი, ოდე თველთე̄სგა დო ჴედნი ი ამჟი̄ნ ალა
Line of edition: 20    ხასდიკ, ეჯღ' ე̄რე თველ ჟი ლუსუ̄რე ხა̄რ.

Line of edition: 21       ჰე̄რვჲად მეკვჰე ზურა̄ლ ეჯკა̈ლიბ ლა̈სვ, ერე ჲესვა̈̄ჲ ნა̈̄თი მო̄მ ხორდა, ჯა გარ
Line of edition: 22    ლა̈სვ ი ლიმა̈ჩვჟი̄ნ ლიჭთუნე ხემთქვა̈̄ნ ჩი̄მიშ.

Line of edition: 23       ამჷნქა ჰე̄რვჲად ლჷჭშხე ლა̈სვ ეჯკა̈ლიბ თე̄მი ი ეჯ თე̄მი მა̄რე, ჲესვა̈̄ჲ ხოლა
Line of edition: 24    ნა̈სგიდვ ხა̄დ. ხოლა ნა̈სგიდვ ჲესვა̈̄ჲ ხა̄დ, ეჯას ეჯკა̈ლიბ მირ ხუღვ' ე̄ თე̄რა̈რისგ',
Line of edition: 25    ე̄რე ჩი ჟ'აჟვმე. ამის ყჷლეხ შვანა̈რ ი გაცხა̈ჲდ, ჩუ ხეჯრავა̈̄ნხ ხოლა თე-ჲ ჰა̈ყბა
Line of edition: 26    ალა ხოლა̄მ თე̄მიშ ი ჰა̈ყბა̄ მუფშვდა მა̄რა ჰერვჲა̈ს ხაყლახ.
Line of edition: 27    ალ ლიჰურჲალვს ეჩნუვშ ა̈ცხირდახ, ერე ლახე ხოლა თე̄მი მა̄რე ხოჩა̄მ ლესგდი
Line of edition: 28    ქვინლჷმგენა ქა ხეწდენდა, ეჩქას ეჯ ქვინლჷმგენე ლიჯჯგჷნეს იბნა ი ვეფ-ვეფს
Line of edition: 29    ხატყა̈ცდა. ალ ლუჟვმა ქვინლჷმგენა აჯაღჷდ ხოლა̄მ თე̄მი მა̄რე̄მი ლიფა̄შგვე̄, ლი სლა̄მა̈̄ლ
Line of edition: 30    ი ლიჭვდი̄დ ხაშიდდა. ამკა̈ლიბ ხოლა̄მ თე̄მი ჰე̄რვიჲა მა̄რე ქა ხოთრო̄ნდა
Line of edition: 31    ჩი̄ ი ეჯ მა̄რა ქა ხეწდენდახ, ეჯ წამჟი̄ნ ხაყლახ: "მა̈დილუ ხე̄რი ი ხოჩა̄მ თანჟი̄ნუ
Line of edition: 32    ლოხვსგიდა მიჩა ქვინლჷმგენა!" ეჩჷ̄ნქა დი̄ნას, ქა უწვი̄ლას, ლახე ლეთშვ ზისხ
Line of edition: 33    აწხვა̈ვდა, ეჩქა ჩუ დე̄მ ხევჟუნო̄ლდა, ქორისგა ნა̈̄თი მახეღვა̈ჟდ გვეში ლა̈სვ, მარე
Line of edition: 34    ჩუ და̈̄რ ხოშდჷნ, ამი̄ ბა̈დშვ მიჩ გუმა̄რა ხა̄დ ი ლახე დო̄რ ხეთხო̄ლდა, ეჩქას ლუ ჟო̄რე
Line of edition: 35    ნესყა იკა̈დდა ი ამნოვშ ჩუ იცხვო̄რა ლუსვა̈რს ი ნიჩვა̈რს, მარე ეჩჟი̄ნ, ერე
Line of edition: 36    ლაწევს ხოლა̄მდ მა̄მ ხეთნო̄ლდა. ამის მე̄რმა ლადა̈ღ ჯა ქა დეშ იკვშა ი ჰე̄რჲა ზუ
Line of edition: 37    რა̄ლს ხაბრა̈ლდა.

Line of edition: 38       ალ ლიბრა̈ლის ხვა̈ჲ ლამო̄როვ-ლასო̄როვ ხაფსა შვა̈ნისგა ი ობა̈შინ დაგრობმუყვი
Line of edition: 39    ხოჰა.


Line of edition: 40 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.