TITUS
Svan Chrestomathy
Part No. 64
Previous part

Text: 60 
Page of edition: 55 
Line of edition: 7 
60. მო̄შ-მო̄შ ჭათა


Line of edition: 8       ჭათა, იმვა̈ჲდ იშგნა̈̄გ, ეჩჟი̄ნ შვა̈ნსი̄ ჯვინალდ ი მახად ჩიგარ ლჷმა̈̄რ.
Line of edition: 9    ჭათა̈ჲ ხვა̈ჲ ლი, მარე ჲერხი̄ ჭათად სურუ ხაყვლუ̄ნიხ. ჲერხის ეჯღა̈̄ჲ, ჲერვა̈̄ჲ
Line of edition: 10    ლაჴვმი̄ მა̄რე ლი, ეჩი̄ ჭათა ხოლა̄მდ ხომჴერახ ლეჭთუნა̈̄ლს მასა̈რდ ხეფჷრთხ
Line of edition: 11    ილხ ეჩი̄ ლიხრინეს. ეჩჷნქა ლუძძუ̄რა ზურა̄ლს ი მეჩი მა̄რა̄ჲ დე̄მ ა̈ხრინეხ, ეჯღ'
Line of edition: 12    ე̄რე ეჯჲარე ჭათად გუნ ხაყვლუ̄ნიხ.

Line of edition: 13       ჯვინალდ ბაპა̈ ჭათადი ძღჷდ ხაყვლი̄ნდახ ამღა გუნ მეკვმად არდახ ი ბაპს ჟი
Line of edition: 14    დე̄მ ა̈ხრინახ.

Line of edition: 15       ჭათახ ამჟი̄ნ ა: და̈̄ვსუ ოთჭათვნა სი̄-ჲ ისგუ ლემკახე ი ქორა̈ მერდე მა̄რე მა̈გ!

Line of edition: 16       მა̈ლდია̈ნ ჯგჷრა̈̄გ მიჩა ჟეღა̈რსუ ჯაჭვა̈̄დი ი შვა̈ლას ნო̄მჟი̄ვ ჯიჴდე!
Line of edition: 17    სუნდუქ დეცეშ მიჩა მეფშვდა მა̈ზიგს ქა ნო̄მთე̄ვ ჯაქა̄ბუნე სი ი ისგვა ქორს!
Line of edition: 18    ლამა̈̄რია ჴვიდიშ გა̄ნთხა̈რს ი ასვა̈რსუ ჯიკუ̄ნკვე, დე̄მ ანღელდე̄დ ეჩქას!
Line of edition: 19    მა̈ლდია̈ნ ფუსნაბუა̄სდიშ წჷრნი ქელეფნი ლეჴშდა̈̄ნიდუ ა̈სყი ისგვ' ა̄სვა̈რს!
Line of edition: 20    თანღი თა̄რინგზელ ჭვეკიშ, კოჯა̈შ ი ლიცი ბედიშდუ ა̈სყი ისგვა გზა̄ვრობს!
Line of edition: 21    აფსა̄თ ი სოლომნ მინე ნალჟჷ̄რსვ ნო̄მჩიქქა̄ვ ისრეხ ისგო̄ვ ივალადა̈ღ!
Line of edition: 22    სოლომნ ფუსდ ი ჯგჷრა̈̄გ სი ი ისგვა ქვინლჷ̄მგენა ჭვე̄რ-ღვამლი ბედიშდუ
Line of edition: 23    ჯა̈სყიხ!

Line of edition: 24       ჲა̈ნ ლატლი̄შ თერა̈რსუ ჯიგნე ი ჯიცხკჷ̄რე ი ქა̄ვ ჯიწლო̄კე ობურ თე̄რა̈რს!
Line of edition: 25    ისგუ მახე̄რა ქა უჟაგ მა̈ზიგდუ ეჯსიპე̄ნა ი სგა̄ვ ჯა̈მჩი მიჩა მუფშვდე!
Line of edition: 26    ჲელ ლივჭმა̈̄ლ ლე̄თუ ჯატყცი მიჩა მჷლა̈მს ლეზგჷრჩუ̄ნ ლუმჭვმე ხესვდ, ეჩქა!
Line of edition: 27    ჩი̄ ხინ ი ხიად ხა̈̄ც, ეჩქას ისგვა ლა̈ზგაისგა ლა̈ლჭა̄ლ ლა̈კი̄ლჲა̄ლუ ლი!
Line of edition: 28    მეშხადუ იღფუ̄რა̈̄ლხ ისგვეჲ ისგვაღა ი დო̄სგ ლა̈კი̄ლჲა̄ლუ ხა̄რხ ისგვა ბედჟი!
Line of edition: 29    ლამა̈̄რჲა ბედს ი მარაქსუ აბა̄ქე ისგვა კიბდონა̈რისგა ი ლაშდღვალუ ჯა̄რხ დო̄სგ!
Line of edition: 30    ამი̄ ჰამა̈რდუ გარ ა̈მჴედე̄ხი სი ი ისგუ ლემკახე მა̄რე ი იშგენ ხოჩა ნო̄სამა̄ვ
Line of edition: 31    ჯათხე̄ნა!

Line of edition: 32       მჷჴფიაშუ აჯმამე̄ნა ისგუ ჭჷშხა̈რ ი ქა უჟაგვ მა̈ზიგ ნო̄სა̄ვ აჯღერა შიჲა̈რქა!
Line of edition: 33    ისგვა გვის ი გუნჩვენჩხს მეშხე ციცვა̈რუ ხაგვრახ ი ჟი̄ვ ოხკო̄და ცხა̄რა̈რთეჟი!
Line of edition: 34    ჩუ̄ვ აჯჭუ̄ჭე̄ნა ი აჯდეთხლე̄ნა ლესგი ქჷპა̈რ ი კუთხულა̈ჲ ხოლა̄მდ ხოლა̄მ ა̈გის!
Line of edition: 35    ლჷგრაშა̄ლუ აჯხეპა ისგუ გვი̄-ჲ გუნჩვენჩხ ი თე̄მი წალ სგა̄ვ ლაჯფუკვე̄ნა
Line of edition: 36    ივილა̈დღიშდ!

Line of edition: 37       ალ ჴანა̈რ ისგვა კუბსუ ლახბჷდახ მეკვშდად ი ეჩქანღო ისგვა კონჩხა̈რჟი̄ნ
Line of edition: 38    ლეჲსენი̄ვ ლიხ!
Page of edition: 56  Line of edition: 1    ჩა̈̄ჟ ისგუ ნა̈ბჭკუნუ ლი ისგვა საფლა̈ვჟი̄ნუ იკვჩხჲე̄ლ მეკვშდად. ფისრა̈ჲ!
Line of edition: 2    ფისე̄მი ტომბხა̈ნქა ნომმა̄ვ ა̈მჴედე̄ლი ისგვა ლითვა̄ლეშ ი ლიწსა̄ლე ლე̄თ!
Line of edition: 3    ისგვა თე̄რა̈რს, ნიჩვა̈რს ი ტა̈ნს ჲელჲა̈ მჷლა̈მუ ხეკჷრვა̄ლე დო̄სგ!
Line of edition: 4    ამჟი̄ვ აჯთქომე̄ნა ლიზგე-ლირდე ი თე̄მი დოშდულ ამი̄ ნათქვმიე̄რა!
Line of edition: 5    ჯგჷრა̈̄გ წინალდ ი წირკამა̈ლდუ ჯაბლო̄კეხ სი ი ისგვა ლიზგე-ლირდეს!
Line of edition: 6    ალ მეპე̄რუნა̈̄ლ მიჟილდ აგეჭს ა, ეჩქადუ გარ ამგეჭე̄ლი ისგუ ლა̈დაღ!
Line of edition: 7    ქრისდე ფუსდ ქა ლჷთა̈ვს ჟი̄ვ ჯიშთხეხ ი ლეთვენის ნო̄სა̄ვ ჯიწსეხ!
Line of edition: 8    ისგუ ნაჯგჷრვ ნაფა̄ნვ ისგვა ლჷდგარუს ფისე̄მი ტო̄მბდუ ლახზაზახ!
Line of edition: 9    დო̄ს ხოწვე̄ნს ი ხომჴერე̄ნს, ეჯკა̈ლიბ მა̈ზიგუ აჯთანე̄ნახ ი ქავ ოთხვია!
Line of edition: 10    მა̈ლდია̈ნ ჯგჷრა̈̄გ მიჩა ცხვი̄მიშ ი ხანგრი ბედიშდუ ჯასყე̄ნე მეკვშდად!
Line of edition: 11    და̈̄რ ჯანწა̈მ, მარე ღე̄რბათ ნო̄მჩიქქა̄ვ ლახჷმწამა სი ი ისგუ ლირდე!
Line of edition: 12    ისგუ შდჷქა̈რ ხოლა̄მ მა̈ზიგშუ ლაჯმამე̄ნახ ი მჷტრე ბედიშდუ აჯსყე̄ნახ!.
Line of edition: 13    ისგვა შდჷმრა̈რს, მა̈ლდია̈ნ ღე̄რბე̄თ ხოლა̄მ მა̈ზიგშუ ჯილცჷყნა̈̄ლი!
Line of edition: 14    ეჯკა̈ლიბ ბედ ი ლირდე̄ვ აჯჰე̄ნ' ე̄რე ისგვა ჯიჯვა̈რს ისგოვშ ხიჴშდა̈̄ნდე̄დ!
Line of edition: 15    ხოლა უჯა̈რ ი მებუ̈ლა̈რუ ჯაცხჷრპანახ ამაბუა̄სდ ი ეჩაბუა̄სდ!
Line of edition: 16    ისგუ დაბა̈რ ი ნაჴანვ-ნალა̄შვ ხოლა̄მ მჷტრეშ ი მუღუ̄ლარე ბედიშუ ლიხ!
Line of edition: 17    ამზავიშ ჟ'ა̈ჯჰი̄დ, მარე ზავიშდ ორ ჩუქვა̄ნუ აჯჰე̄ნა ი დეცე რჷჰის ნო̄ვ
Line of edition: 18    ხა̈წდად!

Line of edition: 19       მუშუნდვები, ლა̄შდიღვ ვერ, ხოჩე̄მი მე̄ქვი̄სგ ი მჷკეთ-მა̈გ ჟი̄ვ აჯშდეხა სი!
Line of edition: 20    ქათლა̈რ ისგვა ქვინი ნა̈ტხუნუ ლიხ ი ხოლა̄მ ა̈გისუ ეჯწჷხე̄ნა დაგრობ!
Line of edition: 21    ალ ჟეღ ისგვა ლეჲდუ̄ნისუ იზბი ი ამი̄ ბოჯა̈ ჰამა̈რდუ გარ ა̈მჴედე̄ლხი!
Line of edition: 22    მინდვერს ესღჷრდე̄დ, მეხი ბედიშუ ხი, თანა̈ღს ესღჷრდე̄დ, ჟა̈ჰი ბედიშუ
Line of edition: 23    ხი, ცხეკს ესღჷდე̄დ, და̈̄ვრეშ ი ნა̈დრარეშ ი წევრარე ბედიშუ ხი, ლახვა̈რს ესღჷრდე̄დ,
Line of edition: 24    კოჯა̈ ბედიშუ ხი, ლჷცქ' ე̄სღჷრდე̄დ, ჭვეკი ბედიშუ ხი. ქორისგა ხარდე̄დ,
Line of edition: 25    ჟი̄ვ ეჯრეღვა, ჩუ მა̄ჲ ჯირდე̄დს ქვინლჷმგენე, მა̈გ თხე̄რა̄ლე ბედიშდუ აჯსყე̄ნა! ჰი̄!
Line of edition: 26    ეჯგვა̈რდუ ანტიხ, იმვა̈̄ჲთ' ე̄სღჷრდე̄დ ეჩხა̈ნ, ერე მა̈გ და̈თქლიფა̈̄რდ ლჷგნე
Line of edition: 27    ჯა̈̄ც ზისხშვ!

Line of edition: 28       იმვა̈̄ჲ ხიშხმუ̄ნე ი ხითკა̈რი, ეჯ'ე̄ჯკა̈ლიბდუ ეჯჴედა სგა̈̄ნჩუ̄ნ, ერე ჟ'აჯბჷთქეს
Line of edition: 29    ისგუ ნაზობ-ნათუნ ქა ნომმა̄ვ აჯ'ჴი̄ჩა ი სგა̈̄ნჩუ ბაპა̈ ჟა̈გდუ ეჯსიპე̄ნა!
Line of edition: 30    იმვა̈̄ჲღენ ხიჰა̄რტყვა̈̄ლ, ნომმა̄ვ ლა̈ჯმამა სერ ი ალა მა̈რგიმიშვდუ ეჯჴედა!
Line of edition: 31    მჷპჷნტილა̈ვი̄ვ ჯა̄რ ი ტრა̈კდ ი ბოჯდუ ოთგენა ხოშა̄მ ღე̄რბათ!
Line of edition: 32    ჯგჷრა̈̄გ მიჩა ცხვისუ ჯატყცი ჟიქა̄ნჩუ̄ნ, ერე ზისხ ეშ ჯიჩხრჷნე̄დს!
Line of edition: 33    ლა̈დი̄ ნაშხმუ̄ნ ქა ნომმა̄ვ ა̈ჯჴი̄ჩა ი ჟი̄ვ აჯშდება სგა̈̄ნჩუ̄ნ!
Line of edition: 34    იმვა̈̄ჲღენ ა̈თთხანა̈ნ ჰერყა̈ლს, ეჯზუმუ ა̈ჯთაკრ', ე̄რე ჟ'ესქვეცე ლეზობ!
Line of edition: 35    ბა̈ჭკვდ ი თხა̈რდუ ესგენე̄ნა აშხუნღო, მა̈ჲ ჟი ლა̈ტხა მა̄მ ჯა̄რ!
Line of edition: 36    აშხუნღო ეჩჟი̄ნუ ესშურე̄ნა ალ ლეთრ', ე̄რე პინტოლდ ათე̄გენ!
Line of edition: 37    ბჷლა̈ჲდ მჷგნადუ ეჯჴედა, იმვა̈̄ჲ ღენ ათა̈̄გნ ამის ი ქჷთხჷ̄ლდუ ა̈მრეღვ ხი!
Line of edition: 38    ალა ს'ა̈ჯწუ̄ხვა̄, ამჟი̄ნუ აჯწუ̄ხვე̄ნა ლიზგე-ლირდე, ისგვა ივალადა̈ღ!
Line of edition: 39    ქა ლჷღჷ̄ფშე მირ ხი ალამა̈გ ნაყუ̄ბ ი აშხუნღო ჟი̄ვ ეს' ე̄სცქეფა!
Line of edition: 40    იმვა̈̄ჲ ღენ ხიშყვი̄რანა̈̄ლ, ეჯგვა̈რდუ ხიშყვი̄რანა̈̄ლ, ერე ქა დო̄რ ჯეწეს!
Line of edition: 41    ლაშვა̄ლდუ ა̈მსედე̄ლხი, სი ლეხპე, ი შვა̈ნ მა̈გ შავსუ ჯა̈შდე.
Line of edition: 42    ყო̄რქა ლეძეგვინად მა̄დ ჯაყა ი ნო̄ჲ ჯაყა̄ვ ივალადა̈ღ!

Line of edition: 43       ჩიჲა̈̄გ ი ჩიგარ ქიქა̈̄რ ი ბუჰა̈̄რუ ხი ისგვა ლაცლაცახა̈ნ!
Page of edition: 57  Line of edition: 1    ხოლე̄მი ლატა̈ხდუ ა̈მსედე̄ლხი ი იზდო̈რუ ლაჯჩეფა ჴადვისგა!

Line of edition: 2       ჩიჲა̈ ლასე̄ნტყვა̄დუ ა̈მსედეხი, ჰა̄ლ ჩუ მესდე ხი, ამჟი!

Line of edition: 3       ბაპსვირუ აჯგვარე̄ნა გასვა̈ლქა ი ქა ნომა̄ვ ახსედა ეჯ ხოლა̄მ მა̈ზიგს!
Line of edition: 4    ისგვა გვის ი ყვიჟა-პერშვდას მა̈ჲნუღუ ახგვარე̄ნა ი ქა̄ვ ოხვშდი̄ხა!
Line of edition: 5    ლა̈ჭჷრდიგა̄ლდუ ა̈მსედე̄ლი ისგუ გვეშ ი ზა̈ჲდიშ ორისგა̄ვ აჯჰე̄ნა!
Line of edition: 6    ლჷხა̈რდუ ალტჷტნე̄ლხი სგა̈̄ნჩუ ი ეჯჲარე ბედიშდუ ალსყე̄ხი!

Line of edition: 7       ქა მჷლჲა̈̄სგვნა მა̈ზიგდუ ეჯჴედა ისგუ ნაზობ-ნათუნ ი ჟი̄ვ ესბეჴვა!
Line of edition: 8    ეჯგვარუ ა̈ჯშკი̄ხანალ', ე̄რე ღო ისგვა ლაცლა̈̄ ჰარა̈კ აჯჴეს მეკვშდა ხა̈ნისგა!


Line of edition: 9 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.