TITUS
Svan Chrestomathy (I: Upper Bal): Part No. 63
Text: 48
Line of edition: 6
48. პანშვირ
Line of edition: 7
პანშვირს ხოჩა მეზგე ი ჲედ ხოჩა ბედიშ ხეხვ-ჭა̈შ ლუხორშა̄ლ ჟახაღა ი ლიმ
Line of edition: 8
ზრღა იჩომდახ. შომვა̄̈იშდ პანშვირს ხემურჯა̄ლხ, ეჩქა̄̈შიშდ ჴანა̈რს ა̈ჲსენდახ,
Line of edition: 9
ოშვა̄̈ჲ ხეკფო̄ლხ, ეჩშელდს, ლეჰრა̈ყის ჩვაჰრა̈ყდახ. ლაღობ ლახ ხო̄გა̈ნხ. თვის
Line of edition: 10
ამა̄რახ რა̈ნგია̄ქდ, ფექს ლენყად ჟ'ამა̄რახ ი თა̈შს ჟ'ანზო̄რახ ამ ლა̈დღიშდ. ქორ
Line of edition: 11
ლახე იჩომდა, ქორა̈შ ლა̈სვ ალა მა̈გ, ლახე ეშხვი ბა̈რგ გარ იჩომდა, ეჩქას ქორ
Line of edition: 12
ზექ-მუგვა̈ლ̄ნქა დე̄მგვაშ ხა̈წვა̈ნდა ი მა̈გ ლეთხუმდ ხა̄დხ ლემა̄რე მუჩვემ ხეხვ
Line of edition: 13
ჭა̈შს. პანშვირ ლადა̈ღ სგვებნა̄ვ ჴანრეშ ი ხამრე მჲსენის ა̈წიჰდახ. ალჲა̈რს ჰარა̈ყს
Line of edition: 14
ხათრახ, ეჩქანღო ჟი ხა̈მზრდახ ჴანა̈რს პანშვრი (\\ პანშური) მუჩვემი ნა̈შდობა
Line of edition: 15
ხან ი ეჩქანღო ჩვა̈ჲსენდახ, ჩვაშდბუნახ, ჩვაკა̄̈დდახ ი სგა ხაგა̈მდახ კარდლა̈რთე̄
Line of edition: 16
სგა. კარდლა̈რ ქა̄მენჩუ̄ნ ლ̄გა̈ნხ კალვისგა, ადო ქორისგა დეშ სკ̄დენხ. ზურალა̄̈რს
Line of edition: 17
ხოშა ქაბბა̈რ ქა მნა̈ყ ხა̄დხ სგვებნა̄ვ ი ნეცინ დიჲა̈რს გარ ანყახ ი ნეცვნი̄რს
Line of edition: 18
ამა̄რახ ტაბგა̈რჟი̄ნა̈შდ. ეჩნქა მა̄̈ნკვი̄ ლენცლობჟი̄ნა̈შდ კუბდ̄რა̈რს ანყახ ი ქა
Line of edition: 19
მ̄ჭანღო ქორშა̈რ, ზა̈რვლა̈რ ი წდჲა̈რ ჩუ იდჲარა̄ლხ. ნა̈დჲარობენ მტსნ̄რას
Line of edition: 20
ხოთო̄ნახ სოფელთე ი ეშვა̄̈ჲ ლიწსი ხაკფნხ მეზგა, ეჯჲა̈რს ქ'ა̄̈წიჰდა. ნა̈ბზა̈ დვრ
Line of edition: 21
ევთე მა̈გ ჴედენდა ლწსე. ლემა̄რთიე ჟი ლმა̄რე ლა̈სვ მა̈გ, ტაბგა̈რს ქ'ა̄და̄წყაუშ
Line of edition: 22
ლეღვა̈რს ქორთ'ა̄̈ჲა̄̈სგდახ, ლა̈ჲსა̄ლე თხუმა̈რს სპა̈ნქ'ა̄ჭარვახ ი ლეტვრა̄̈ლს ხალწ
Line of edition: 23
ენდახ მუჭვა̈რჟი̄ნ. ამ დვრევჟი̄ნ ჯვინელ ლუშნუ ბაპა̈რი ჴედენდახ, პანშვრი მუჩვემ
Line of edition: 24
სგა ხესგვრო̄ლდახ ტაბა̈გს. ბაპა̈რ ეშდჲო̄რი ღეთ ლა̈სვხ აშხვჟი̄ნ. იჭა̄რვო̄ლდახ
Line of edition: 25
ქა, იბნახ ქვინი უხვა̄ნტად ზეპრი ლიყლეს. იმ დო ყლახ, მა̄მ ხოხალდახ მინსი̄.
Line of edition: 26
ეჩქანღო ხა̈ლხ ჩუ ისგვრო̄ლდა ქა̄̈მ, თვით ხოშა̄მ დიჲა̈რს ი ლემზრა̈რს ხოდა̄̈სგ
Line of edition: 27
დახ ი ეჩეჟი̄ნ ლაგფა̈რს ლეღვიშ. ჰარა̈ყ ი რა̈ნგ იმვა̄̈ჲჟი ჲა̈ს ხეკვა̈დ, ეჩჟი̄ნ ხუღ
Line of edition: 28
ვა̄̈ნდა ჩი. ნა̈ბოზს ნამსა̈დვს მა̈გ კალთა̈ჲს იჭვე̄ნდა ი ა̈გითე ღრდახ.
Line of edition: 29
მესტია
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
