TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 90

Text: 70

Line of edition: 36

70. ქაშგარეშ ი შვანრე ლისყა^̄̈ლ

Line of edition: 37       ჯვინალდ ქაშგა̈რს ი შვანა̈რს მასა̈რდ ლიშჲა^̄̈ლ ი ფათრა̈კ ხა̄რახ უშხვა̄რ ნე̄სგა.
Line of edition: 38    ეჩხა̄ვ-ამხა̄ვ დაგრობი ხაჩ̄და̈ნვნახ. ეს აშხვთე ლმა^̄̈რ ხოფშირა ლდგა̈რ ი
Line of edition: 39    ეს მე̄რმათე, მარე ეჩხა̄ვ შვანა̈რ გარ ხა̈შგბა̈ნვნახ ქაშგა̈რს, ქვინლმგენა^̄̈ლს ი ჩა̄ჟა̈რს
Line of edition: 40    ხაღე̄შგა̄ლახ, ქაშგა̈რ დე̄მჩიქქა მოშ ლმბა̈დვნინხ შვა̈ნთე ლიჴედს. ეჯა მა̄დეჲ
Line of edition: 41    სა̈ვთე დეშ ლმჴა̈დვინხ ზავლადა̈ღ შვანრე მაყალვშ, ეჯჟი ლყა̄ლვე ხა̄რახ
Page of edition: 64 Line of edition: 1    შვანა̈რს, ჯვინალდ შვა̈ნისგა ხოშა ლტა̈ნ მა̄რა^̄̈ლ ხაჩ̄დო̄ლნახ. ეჯჲა̈რს გმირა̈რ სი̄
Line of edition: 2    ხატუ̄ლინახ ი ნართა̈რსი̄. ეჯჲა̈რე ჯიჯვა̈რ ლახე გვებნიხ ათხე ლაკლდამა̈რისგა,
Line of edition: 3    ეჩზუმვა̈რ ლიხ, ერე წაღვა̈ ჯიჯვა̈რს ნე̄სგაქა^̄̈ მა̄რა მუჭვედთეჟი̄ნ ხეხო̄ლიხ. ეჩნქა
Line of edition: 4    ხახლე̄ნახ ლქა̈ჩი მოშ ჟაგრა̈რ. ლახე თხუმჟი̄ნ მა̄რა ჩუ ნაქაჩუნღო ჯიჯვ ხაკლიე̄ნა,
Line of edition: 5    ჩეიშვ ხა̈ჩჲა^̄̈ნახ ჩუ ი ეჩი̄ ტკეჩა̈რს ხა̈სგვრინახ. ათხე და^̄̈ს ხოხალ ეჯ ხელობ.
Line of edition: 6    ამჟი̄ნ ჩიგარ უშხვა̄რ ხა̈ბკე̄ნა ქაშა̈გ, შვა̈ნ ი სა̈ვჲა̈რ უშხვა̄რთე ხა̈სმინა̄ლვნახ
Line of edition: 7    ი ჰა̈დურდ ხოშა̄მ ლიმსისგა̄რვს ხალა̄შუნახ უშხვა̄რ ნე̄სგა. ეჩის ქა̄მენჩუ̄ნ ქაშგა̈რს
Line of edition: 8    ჯოგორაშვ ხა̈ქვთუნახ სა̈ვჲა̈რ ქვინლმგენა. სგა ლმმახა̄ლვინხ შვანა̈რს ი კვეტო̄ლ
Line of edition: 9    ფასვღა ჩუ ხა̈ყდინახ, ეჩქანღო ქაშგა̈რს ხაყლო̄ნნახ, ერე ალ ჯოგა̈რ ესერ შვანა̈რს
Line of edition: 10    ოთქვითახ ი ჰა̈დურდ ხოშა̄მდ ხა̈შვმინახ ლემასგვ უშხვა̄რ ნე̄სგა შვანა̈რს ი ქაშგა̈რს.
Line of edition: 11    ლახე უფგოვშ იმე ლმლაკვინხ ქაშგა̈რ შვანა̈რს, შიშდ ჩუ ლმდაგვრინხ,
Line of edition: 12    ქა ლუმშყუჟუ̄რვინხ ლდგა̈რს ი ეჩჟი̄ნ ლეგვრევისგა ჩუ ლუმგორვინხ. ამკა̈ლიბდ
Line of edition: 13    დაგრა, მა̈ჲ საკვრელ, შვანა̈რს ხოშა ხავშგედე̄ნახ ი მინი̄ ეჩჟი̄ნ ლმშდაბვინხ ქაშ
Line of edition: 14    გა̈რს, შომვა^̄̈ჲ ჩუ ლმდაგვრინხ. სა̈ვჲა̈რ ეჯღა ლმლა̈ძღვნინხ შვანა̈რს ი ქაშგა̈რს,
Line of edition: 15    ერე სა̈ვჲა̈რს ხოშა ლაღალ ქაშგი გიმ გარ ხუღვეხ ლა̈ჭმად ი ლაკვმაშდ. ამე̄სგა ქაშ
Line of edition: 16    გა̈რ ბეგა̈რს ხაკა̈დდახ, ფუსდშა̄ლ ხასგურდახ სა̈ვჲა̈რს თხუმჟი̄ნ ი ეჯღა ხა̈სსგნ
Line of edition: 17    დახ გუნ. აშხუნღო ჩეფელევშა ვა̈რგ ი ქაშგი უზდენ ალყვაბე̄ლიხ ჩუ ი ახა̄რახ შორ
Line of edition: 18    შვანეშ ი ქაშგი ლისყა̄ლე ბედჟი̄ნ. მქშა̈გ ესბეცა ჩეფელევშე̄რ ვა̈რგს: "მა̈დილუ
Line of edition: 19    ესერ ხე̄რა ი ჟი̄ვ ანსათხე იმვა̄ლეჟი̄ნ მინეშ ი შვანრე ლისყა^̄̈ლ. ამის ესერ ჰე̄მჟი მოშ
Line of edition: 20    ასხათი, სურუ ლემდა გვაშვ ესერ ესდინე ქაშგი ბედჟი̄ნ. ჩეფელევშე̄რ ვა̈რგს იმედ
Line of edition: 21    ხო̄ქვა. ალ ვა̈რგ ოთარშა ნიბა^̄̈შინ ლმა^̄̈რ ი ობა̈შინ ლმჴა̈დვინ შვა̈ნთე მიჩა ლა̈დჲარლე
Line of edition: 22    ლაწა̈დთე. ან̄გა̈ნ ესნა̈რ აშხვ ლადა̈ღ ი ქ'ა̄ნჴა̈დ შვა̈ნთე ი სგ' ა̄ჩა̈დხ მიჩა
Line of edition: 23    ლა̈დჲართე. ალჲა̈რდ, მა̈ჲ საკვრელ, მასა̈რდ ა̈დხი̄დეხ ნიბა^̄̈შინა̈ ლიწედ ლა̈ჲსა^̄̈ლ ათ
Line of edition: 24    ზიჰვნეხ მიჩა შნშვ ეჯღ', ე̄რე უსურმა̈ნ ქრისდია̈ნი ნა̈სა̈ნვ ლა̈ჲსა^̄̈ ლეღვს დე̄მ იზბი
Line of edition: 25    ი ძღდ დიდებულ ხინ ოთჩვემნახ. აშხვ ლადა̈ღ მიჩა ბიძა̈ჲ ოთარს ხა^̄̈ქვ: "იმღ'
Line of edition: 26    ე̄სერ დო̄მ ისყა^̄̈ლხ ჩუ მინ ი ქაშგა̈რ. დეშ ესერ ხაბჟახა ბიზდ ალამა̈გ ხოლე̄მი ლიჩვემ
Line of edition: 27    უშხვა̄რ ნე̄სგა. სერ ესერ ნუკუ ანჴიდხ, ადო ამჟ' ე̄სერ შომვა̄ლე უშხვა̄რ ლა̈ხკედნიხ
Line of edition: 28    ი სა̈ვჲარე ლეხჲა̈დდ ანსყე̄ნეხ თხუმ, ეჯჲა̈რ ესერ უშხვა̄რ ნე̄სგა ხოსმი̄ნეხ
Line of edition: 29    გარ ი იშგანღ' ე̄სერ დე̄მღა ფეშნიხ. გვივ ლახვე̄მ ი ხოჩა̄მდ ჰე ხოჴდენდე̄დს მიჩა
Line of edition: 30    ლი̄ქვ, ჩუ̄ვ ესერ ა̈დსყა^̄̈ნხ".

Line of edition: 31       ოთარდ ლახტიხ ესნა̈რ: "მიჩ ესერი ჩუ ხოცხა, მარე ხოჩა ნე̄სგა მეზ' ე̄სერ
Line of edition: 32    და^̄̈რ ხაყახ. ეჩნქ' ე̄სერ ბა^̄̈ლნჟი̄ნა̈ შვა̈ნდი ჟი ლემჴერა^̄̈ვნე ლი. ეჯჲა̈რ ესერ ი მინ
Line of edition: 33    ყვაბდ ა̈თსყო̄ლიხ ქაშგა̈რს". "ნე̄სგა მე̄ზიდ ესერ ჲაღო ჯ'ე̄სგენი ი მიჩნე̄მ ხა̈ლხუ
Line of edition: 34    ა̈ნყვაბე."

Line of edition: 35       ადზზეხ ესნა̈რ ბა^̄̈ლნჟი̄ნ მა̄რე ი ჟ'ახმეჴრა^̄̈ვნეხ, ერე "ჰემმ' ე̄სერ ხოცხახ,
Line of edition: 36    ღვ' ე̄სერ ჩვასყე̄ნეხ მინს ი ქაშგა̈რს". ბა^̄̈ლნჟი̄ნა̈ ჴევ ესნა̈რ ჩვა̈დნა̈ზო̄რა^̄̈ნ. ახა̄დხ
Line of edition: 37    ლახორ ი ჩვასკიბხ ლისყა^̄̈ლ. ქ'ა^̄̈ნთიშხ ეშდჲორი მა̄რე ი ჟ'ანმა̄რეხ სა̈ვთე მე̄ზიდ.
Line of edition: 38    ჩვადშგურა̄ნეხ. ერე "ლიმო̄როვ ბახსანსუ ახა̄დხ ი ქაშა̈გთე ნომა̄ვ აჩა̄დხ. ეჩნქა
Line of edition: 39    ჰ' ე̄სერ ა̈დჴდახ სა̈ვჲა̈რდ მინე ნა̈ქვთია̈რვი ფასა̈რ ქაშგა̈რთე, ხოჩა, მა̄დ' ე̄სერი
Line of edition: 40    ქა̄ვ ოთუ̄შხეხ მა̈გ სა̈ვჲა̈რს". ალ ეშდჲორი მა̄რე ლექვ'ა̄ნჴა̈დხ ბეჩვითე ბა^̄̈ლნჩვი̄შ
Line of edition: 41    დი ეშდჲორი მა̄რ'ა^̄̈ნთიშ. ლოხვჴერდახ უშხვა̄რ. სგვებინ ჩეფელევშა ვა̈რგ
Line of edition: 42    ესჟოღდა ი ოთარ ი ამჟი̄ნ სგ'ა̄ჩა̈დხ ბახსანთე̄სგა. ამეჩუნ ბახსნა̈რდ სადგვემ ოხვ
Line of edition: 43    მა̄რეხ ი ხოჩა̄მ ხა̈რჯს ხოსყე̄ნახ შვანა̈რს ვოდ ეჩ'ა̄რდახ. ქაშა̈გთე̄ჲ ბა̈ჟინ ჩვემინხ

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.