TITUS
Svan Chrestomathy (I: Upper Bal): Part No. 100

Text: 79 

Line of edition: 36

79. მუშვგვილი ლირმი


Line of edition: 37       აშხვ ხოჩა̄მ მეუხვჲა̈რ მუვშგვილდ ლა̈თხვჲარჟი̄ნ ესნა̈უ ღვაშ აღგა̈რ. ადსკო̄რე:
Line of edition: 38    იმთე ლიე̄სგ' ე̄სერ ხეჩვე̄ნი ალ ღვაშა̈შ?" ხა̄̈ქვ ესნა̈რ მიჩა გვის. "ხვა̈ჲ ხა̈ნ ესერ
Line of edition: 39    ხა̄რ, მინე ლერდი გელახსან ყანსავშა დე̄სა ხოწვა. საუდ ესერ ხა̄რ ი ალ ღვაშ ესერი
Line of edition: 40    ხოჩა ძღვენ ი̄რი მუჟღვერ ლადა̈ღ", ანჴა̈დ ესნა̈რ ი ამჟი̄ნ ჩვემინ: ჟი ლა̈ჲცვე ღვაშ
Line of edition: 41    ი ახღვა მესტიათე. მიჯვრი̄შქ'ა̄ნღრი, ამჟი̄ნ ლახხვი̄დხ კა̄ლა̈რ ი ჴალდე̄შა̈რ ი ლა̈ხ-
Page of edition: 71 Line of edition: 1    ჭვედდახ: "იმთ'ე̄სერ ესღვა მიჩ ალ ღვაშ?" "იმთ'ე̄სერ ი მესტიათე. მინე ლერდი
Line of edition: 2    ყანსავშე̄რ გელახსანიშთე". "მინს ესერ ოთარშა ფუ̄თ'ე̄ჯღ ო̄თდაგრახ, ე ათხე ჯაფ რა̄ნა̈ლ
Line of edition: 3    ხე̄რახ ფუსდ, ა იმღა?" მუვშგვილს ლოხვტი̄ხა: "მინ მა̄რა̄̈ლ, გელახსან
Line of edition: 4    ესერ მიჩა დიჲე ნარდა̈ვ ლი, მუხვბე ხა̄რ. ხვა̈ჲ ხა̈ნ ლი, ერე დე̄სა ხოწვა ი ეჯღ'
Line of edition: 5    ე̄სერ ხოჴდვ ა̄ლ ღვაშს, ადო ჯაფრა̄ნრე ლიფუსდ ესერ დეჲ ხა̈კვდა ივალადა̈ღ ი დეჲ
Line of edition: 6    ხეკვდენი! "

Line of edition: 7       ოხვჩ̄დხ ესნა̈რ ამეჩუ̄ნ ლიცვა̄̈ლ ი ალ მუვშგვილ ჩვადირმხ ი ღვაშ ქ'ო̄თღეხ.
Line of edition: 8    ალა უშგულდ ა̈დკვიჰ ესნა̈რ ი კა̄ლ-უშგულს ლიყა̄̈რიე̄ლ ახჩ̄დახ უშხვა̄რ ნე̄სგა.
Line of edition: 9    ამჟი̄ნ ავგულრე გეგის ათხა̄რა: "მინ ესერ ლალე̄ზია̈რ ლიხ, მინ ნომა̄ვ ლა̈ხხვა̈ტხ
Line of edition: 10    უშხვა̄რ, ლეჟა̄ვ ესერ ა̈ნჰერხ ყანსავშა მა̄რე ი გვეშს ესერ ჩვადსიკთიხ უშხვა̄რ
Line of edition: 11    ნე̄სგა". ლექვ'ო̄თჭირახ ყანსავშე̄რდ ი ეჯჲარე თათარყან ა̈მჩედ ლეჟა. ახა̄რახ ლიმო̄როვ
Line of edition: 12    ი კა̄ლს ი ჴალდეს წორა̈ ხნსგ' ა̄თქვეცახ, ეჯღ'ე̄რე ხოშილ შგურა̄̈რ ლმა̄̈რხ
Line of edition: 13    ი სოფლი ჯილი ლიგჭაღა ხა̄რახ ტე̄ვა. ანჴა̈დ ესნა̈რ თათარყან ყანსავშა ი ხნსგა
Line of edition: 14    ლეჴდე გვეშ მიჩნე̄მ ა̈დჴიდ, ეჯღ'ე̄რე "მინე გუ̄ღ ე̄სერ ხა̄რახ ლიცვა̄ლ". კა̈ლა̈რხა̈ნქა
Line of edition: 15    ი ჴალდე̄შა̈რხა̈ნქა მინე ნარმა̈ვ მა̄რა უსგვა̄მ მა̄რე̄მი მა̈ღვრ' ა̄თქვეცა.
Line of edition: 16    ალჲა̈რდ ესნა̈რ წორა̈ ხნსგაჲ ღვეშგდ ლახტიხხ უშგულს ი თვით ფირვი̄ ქა
Line of edition: 17    ლახვე̄მხ.

Line of edition: 18          მესტია




Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.