TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 111

Text: 89

Line of edition: 38

89. ბევა ჩხვიმია̄ნ

Line of edition: 39       ჯვინალდ აშხვ დრევჟი̄ნ ოთარშ' ა^̄̈მჩედხ აფხზე̄თი ლახვა̈რთე ქვინლმგენე̄მიშ
Line of edition: 40    ი მა̈ნცინი ლაღე̄შგა̄ლთე. ობა̈შ გლეხა̈რ ოთჴერნახ ი აშხვდ ბევა ჩხვიმია̄ნი
Line of edition: 41    ხა̈ნჴრინახ ფა̈რხა̈ნ. ეჯა, ბევა ჩხვიმია̄ნ, ფა̄ლე̄დ ლმზიგ ი ნა̈პოლა̈ ნინ სგა ხასმო̄ლნა.
Line of edition: 42    ესღრიხ ესნა̈რ ი ბა̄ზი ცხეკისგა ჩვა̈დსადგვმა^̄̈ნხ. ამეჩუნ ისგდმეცლე წიფრა
Line of edition: 43    ხა̈გნენა, ამეჟი̄ნ ნა̈პო̄ლა̈რ ხა̈გნე̄ნახ ი აშხვ ნა̈პო̄ლს ხო̄ქვა მე̄რმა ნა̈პო̄ლდ: "ნა̈ტლავ
Page of edition: 77 Line of edition: 1    ესერ ეჯას ხერ' ე̄, ერვა^̄̈ჲ ალ წიფრახა̈ნქა ფიჩქს ი ბანდრი̄ლს ჟ'ანსყე̄ნე".
Line of edition: 2    ალ' ე̄სნა̈რ ბევას ქა ხასმდა. ანჴა̈დ ბა̄ზი ი ალ წიფრა^̄̈ ნა̈ცლუვა̈რხანქა ფიჩქ ი ბანდრი̄ლ
Line of edition: 3    ჟ'ანტა̄ბე ი ჩვა̈დშხვინ ამეჩუ̄ნ. ამხა̄ვშა^̄̈ლიდ ქ'ა^̄̈ხდო̄ლ ეჩქას ა̈გითე ჴიდე.
Line of edition: 4    მიჩ' ა̄ფხნეგა̈რ ხაყლეხ ესნა̈რ: "ჯა მა̄რე, მა̈ჲა̄ქ ესერ ხა̄რ ამზუმ ჯვე̄დიახა̈ნ ფიჩქიშ
Line of edition: 5    ი ბანდრი ლიქფი. ა̈გის ესერ დეშ ანტა̄ბი̄სა?"ბევას ლოხვტი̄ხა:"ამგვა̈ჲ ხოჩა თვალა̈შ
Line of edition: 6    წიფრ' ე̄სერ დე̄სა ხა̄გ მინეშმყ. ლახლატ' ე̄სერ ალ წიფრას ხოჩა ჭადრია̈ნ
Line of edition: 7    ესერ ლი. ღვ' ე̄სერ მა̈ჲ ხოჭირ ალჲარე ა̈გითე ლე̄სგიღა?"

Line of edition: 8       მე̄რმა ლადა̈ღ ანგა̈ნხ ჟი ი აჩა̈დხ აფხზეთი ლახვა̈რთე. ამეჩუ̄ნ მასა̈რდ ოთღეხ
Line of edition: 9    ესნა̈რ ქვილმგენე̄მი ჯვეგ, ჩა^̄̈ჟი ჯლყ ი დაჴლა̈შ ი ღველჲა̄ქა ჯვეგა̈რ ი ლა̈ჲბინეხ
Line of edition: 10    ღვეშგ(\\ ღვეშგდ) ლიტეხ. ქ'ა̈ხა̄სდხ მეშხრა წიფრას. ამეჩუ̄ნ ბევად ფიჩქ ი ბანდრი̄ლ
Line of edition: 11    ჟ'ა̈ნკიდ, ჟი ლა̈ჲცვე ი ანღრი ჯა̄ჲ. ჩა^̄̈ჟი ჯლყს ესნა̈რ კვაჩხა̈ჲ სა̄ბლიდ ხონჴრი
Line of edition: 12    ი ამის შუკვჟი̄ნ ჟ'ა̈ფხა̈შ. მიჩა დიდ ლახთრტნ' ე̄სნა̈რ ღვეშგმა̄ვ: "ქა̄ვ ა̈ნკიდა,
Line of edition: 13    იმ ესერ ხესე̄დურჲე̄ლ ღვეშგმა̄ვ". სა̄ბელდ ლახტიხ: "ალ ჯლყი̄ ნა̈ბდნჲე̄რ'
Line of edition: 14    ე̄სერ მიჩ გარ ხა̈ცვ ჯაჭა̈რჟი̄ნ ი ჟ'ე̄სერ ახფეშა. მინს ესერ მა̈ჲ ხოჭირხ, იმნა̈რ ა̈ხფეშნიხ,
Line of edition: 15    ჯაჭა̈რჟი̄ნ ესერ მამგვეშ ხა̈ცვხ ი ჰა̈რიდ ანღრიხ".

Line of edition: 16       ფირვი ჯვეგს ესნა̈რ კვაჩხა̈ჲ ღუნულდ ხონჴრიხ, ღველჲა̄ქა̈შ ი გიცრი ჯვეგს _
Line of edition: 17    კვაჩხა̈ჲ ჟინღლდ ი ალა̈რსი ჟ'ა̈ხფა̈შხ. მინე დილა̄რუ ხატუ̄ლიხ "მა̈ჲ ესერ ესგაფე̄ნახ
Line of edition: 18    მინს გარ! ქა̄ვ ლა̈ჲბა̄ჴხ ი ჯვეგცახა̈ნუ ანღრდახ, ადო ჩვესერ ა̈სდენიხ ი ნადირ
Line of edition: 19    ადცლ̄რიხ". "მინს ესერ ალა მა̈გ ჯვეგი ნა̈ბდნჲე̄რი ჯაჭა̈რჟი̄ნ ხა̈ცვხ ი ჟ'ახფეშახ.
Line of edition: 20    მინს ესერ მა̈ჲ ხოჭირხ სური̄, ჰა̈რიდ ესერ ანღრიხ ი იმნა̈რ ესერ ა̈ხფეშნიხ".
Line of edition: 21    ალჲარეშ ი სა̄ბლი ლი̄მბვა^̄̈ლ ქა ხასმდა ბევას ი თე ლა̄ჲე ალ სა̄ბელთე, ღუნთე
Line of edition: 22    ი ჟინაღთე. ოთარშა ი მინ' ა̄ფხნეგა̈რ ქ'ა̄ნჴა̈დხ ესნა̈რ შვა̈ნთე ი ჯვეგ ბევას ათყულუ̄რა^̄̈ვნეხ.
Line of edition: 23    ამის ესნა̈რ ათხად: "ჯ'ე̄სერ ჩვადყულუ̄რი ჯვეგს, მარე მიჩეშდ ესერ
Line of edition: 24    დე̄მგვაშ იყვლე, ეჯღ'ე̄რე ობა̈შ ხოჩ' ე̄სერ ხაშყიდ ოთარშე̄რხა̈ნქა, ობა̈შ ნა̈მშედა̄ლვ
Line of edition: 25    ესერ ხა̄რხ ი ალჲა̈რხა̈ნქ'ე̄სერ ნა^̄̈თის მა̄მა იყვლე. ჰემმ' ე̄სერ ა̈ხკა̈ფიხ, ჯ'ე̄სერ კვაჩხა̈ჲ
Line of edition: 26    სა̄ბლიდს, კვაჩხა̈ჲ ღუნულდს ი კვაჩხა̈ჲ ჟინღლდს ჟი ხასკიბ". ამის გარ დე̄მ
Line of edition: 27    ხასკბეხ ოთარშა ი აჯაღ ხაჰვდიხ, მარე ალა ბევად მა̄დ ჩვემინ. ჯვეგ ჩ' ოთყულუ̄რე
Line of edition: 28    ჩი̄ ი მიჩ ალ სა̄ბლიდ, ღუნულდ ი ჟინღლდ გარ ხა̈ხვიდ". ალჲა̈რ ი ფიჩქ ი ბანდრი̄ლ
Line of edition: 29    გარ ადჲე მიჩა ქორთე. აჩა̈დ ხა̈ნ ი ალ სა̄ბელ, ღუნ ი ჟინაღ ეჩჟი̄ნ ჩვა̈დფიშრა^̄̈ნხ,
Line of edition: 30    ერე ჯლყს ი ჯვეგს ქა დე̄მთე მოშ ხოსპე ი გუნ ა̈დდიდრა^̄̈ნ, ეჩჟი̄ნ, ერე შვანისგა
Line of edition: 31    ეჯგვა̈რ მეზგე ი ეჯგვა̈რ ლკთილ ჩუ და^̄̈რ ლმა̈რდ. კეთილ ეშ ხა̈ფვინა ი ჩი
Line of edition: 32    ლეთ ლა̈ჲსას ლმზიჰვინ მიჩეშდ ი მუშგვრი̄შდ. მიჩა კეთილ ჩი̄თე ქა მეკვჰე ლმა^̄̈რლი
Line of edition: 33    შვა̈ნისგა ი მაშრ' ა̈დგილთეჲ ქ'ა^̄̈მკვეჰ. აშხვჟი̄ნ ესნა̈რ მესტიათ' ა̄ნჴა̈დ მუშგვრიდ
Line of edition: 34    მიჩა მეხვბარა̈რ ხერგია̄ნა̈რთე. ხერგია̄ნშაი ეზერ მეზგე ლმა^̄̈რხ, მარე ბევა^̄̈შთე
Line of edition: 35    ლა̄ზ ეჯჲა̈რს მა̄დე ი იშგანვი̄ და^̄̈ს ხა̄რა შვა̈ნისგა. ბა̈ზ, ე̄სნა̈რ ხერგია̄ნშა სურუ
Line of edition: 36    ხოჩა̄მდ ესხვი̄დხ ამის. მე̄რმა ლადა̈ღ ესნა̈რ იბრა^̄̈ლ ქა^̄̈მ. ამჟი̄ნ კვინჩდ ლა̈ჲბინე
Line of edition: 37    ლიჭვე̄ჭე. ბევა ქ'ა^̄̈დბარა^̄̈ნ ესნა̈რ ი ეჩქას ხა^̄̈ქვ მიჩა მეხვბარა̈რს: "ლეთ' ე̄სერ მიჩა
Line of edition: 38    ქორს ჟ'ახბდა ი ჩვალშიხე̄ლი, ალ' ე̄სერ ხო̄ქვ' ა̄თხე კვინჩს მიჩეშდ ა". ამჟი̄ნ
Line of edition: 39    ესნა̈რ ბა̈ჟინი ანჴა̈დ ლექვა^̄̈ნისგა ი ქ'ა̄ნმბავე ლიშხი. ბევა ლა̈ხჭვედდ' ე̄სნა̈რ: "ფიჩქ
Line of edition: 40    ი ბანდრი̄ლ ესერ ალშიხე̄ლიე მა̄ ჩუ?" "ეჯჲა̈რ ესერ დე̄სა". ჲაღვ' ე̄სერ დიდა̈ბუ
Line of edition: 41    ხა̄რ ღე̄რბათ, ამღ'ე̄სერ მა̄მ ხოჭირ". ი გაცხა̈ჲდ ეჩქანღო ხოჩა̄დი ლიზგე ხა̄რა ეჩქადი
Line of edition: 42    ნამსგიდინ.

Line of edition: 43          მესტია

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.