TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 119

Text: 96

Line of edition: 24

96. მეჩი მეთხვჲა̈რი ნა̄მბვა̄ლ

Line of edition: 25       ლითხვჲა̈რ მაჩე̄ნე მუჟღვერ ლი. ეჩქას ნა̈თხვჲარე ხოლგვარა̄ჲ ლი ი ლენღეშტი̄ჲ
Line of edition: 26    ქა ლნღეშტე ხა̄რ. ამღა ხოშა ლაღა̈ლ მეთხვჲარა მუჟღვერთე ითხვჲა̈რხ, მარე
Line of edition: 27    ობა̈შინ, ლახე ღვაშა̈ ბა̈რგს ხვიმცხედ ლვინთისგა, ეჩქას დეშ ხვაჭკრნედ ი
Line of edition: 28    ღურიდ ეჯჲარე ლაცხა̈პთე ი სგა ლა̈ჭბიდა^̄̈ნთე. ლა̈ჭბიდა^̄̈ნ ქვაბა̈რ ობა̈შ ხა̄რ კოჯა̈რს
Line of edition: 29    ი ლა^̄̈თშვ ეჩე̄'სგ' ა^̄̈რიხ ლაყვრად ღვაშა̈რ. ფიშრა̄მინ მიზნა ღვაშრე სადგვემთე̄სგა.
Line of edition: 30    სგა^̄̈ნჩუ̄ნ კინკო̄ლშვ ჟი გვეში ლი. აშხვ ა̈გის ლაყვრა ხა̄რხ ი ეჩეჩუ̄ნ წყილჲა̈ნდ
Line of edition: 31    მსყე ხა̄რხ მინე სადგვემ. სგა^̄̈ნჩუ̄ნ ეჩჟი̄ნ ტებდი ი ა̈თუ ჩუ ლ', ე̄რე ლვინთისგა
Line of edition: 32    ლემესგ მა̄მ ხაკუჩ მა̄რა. ლადაღვშ ღვაშა̈რ ქა ჴედნიხ, მუსს ა̈ფხრიჭვიხ, ეჩხა̈ნჟი̄ნ
Line of edition: 33    ჟ'აწვე̄ნეხ ჭყივა̈რს ფრის ი ეჯას იზბიხ. ერხი სავა̈ტ კოჯა̈რქა̄ჲ ითშიხ შუკვს
Line of edition: 34    ი კოჯა̈რქა ფრი მოლა̈რს ჭყივა̈რშა̄ლ იჩეხვხ.

Line of edition: 35       ობა̈შ ხოშა ი ხოჩა ღვაშ ი კვიცრა ხორდა ჯვინალდ შვანე კოჯა̈რს ი ლახვს.
Line of edition: 36    ერსკნა̈რ ცხეკს ა̈რიხ. მეთხვჲა̈რ ლახ ქა ღრდა ლა̈თხვჲართე, ჰა̈რიდ დე̄მჩიქქა ტეხენდა,
Line of edition: 37    ეჯა̄ჲ ლუშნუ თოფშვ, ადო ბერდანა^̄̈ლ ი ამკა̈ლიბ იმ' ა̄რდახ ჯვინალდ. ათხე
Line of edition: 38    მასა̈რდ ა̈ნმრხელდა^̄̈ნხ ი ძვირდ გარ ხეთხნი მეთხვჲა̈რ ღვაშა̈რს ი ერსკნა̈რს.
Line of edition: 39    ერხი აშხვ ნაგზა̄ჲ ხვა^̄̈ჲინ ირა̄გეხ ლა̈თხვჲარს, მარე ჰა̈რიდ ტეხნიხ. ჯვინალდ მახა
Line of edition: 40    დოშდვლა̈რჟი̄ნ ნა̈თხვჲარა^̄̈ლ სგიმს ხაცხნახ ი ეჩქას ერვა^̄̈ჲ ხოჩა̄მ ლადრა̈ჯს ჟი ისყე̄ნა,
Line of edition: 41    ეჯას ნა̈ბოზს ნა̈თხვჲარ ა̄ხღვა^̄̈ნ ქორთე. ხიჲადუ̄ლ ღვაშა̈რ, ხოშა ჴერჴია̈ნ ლიხ.
Page of edition: 84 Line of edition: 1    მა̄რე დე̄მ ა̈ნღლ' ე̄ჩქა მრა^̄̈მჟი̄ნ ითშიხ შუკვს, ჲარვ ღეთ საჯენს ისკნეხ აშხვ ბაჩვხა̈ნქა
Line of edition: 2    მე̄რმათექა. ჭიშხი ცხას იმვა^̄̈ჲ სგა ხა^̄̈თლეხ მოშ, ეჩეჩუ̄ნ ჩიჲა^̄̈გჟი იმა̈რგხ ი ქა
Line of edition: 3    ღრიხ, ობა̈შინ მუჭვა̈რსი იმურჯი̄ნეხ ლა̄ზჟი̄ნ. ობა̈შ მა̄რე ლდვაშე̄ლი ღვაშრე
Line of edition: 4    ლა̈ჭმინა̄ლჟი̄ნ, მარე სგა ხემთქვ', ე̄ჩქას ქა დე̄მჟი მოშ ხაყიჩ, ეჩჟი̄ნ ხა̈მთქვახ
Line of edition: 5    ლაჭმინა̄ლჟი̄ნ აქ ლიჭმი̄ნე, ერე ათხე̄ჲ მამბაჟ: იმჟი̄ნ ღურდა̈ს ეჯკა̈ლიბ ა̈დგილა̈რქა.
Line of edition: 6    აშხვ ლადა̈ღ ლოხვა̈ზრედ უშხვა̄რ მი-ჲ ნიშგვეჲმყი სამ მახაღვა̈ჟდ (ეჯჲა̈რ
Line of edition: 7    ღალ ათხე ლდგა̈რ ლიხ). ლოხვა̈ზრედ უშხვა̄რ მე̄რმა ლადა̈ღ ლირჰა^̄̈ლთე ღვაშა̈რთე
Line of edition: 8    ლი̄ზი. ლვინთ ლა̈სვ ი აშ ნიცხნ, იმვა^̄̈ჲ ხემთქვა^̄̈ნხ ღვაშრე ბა̈რგ. ლა̈ხჭვედდად
Line of edition: 9    უშხვა̄რ: "ურწყულ როქვ დამ და^̄̈რ გვირია ქორს" ი და^̄̈ს ნირდა. მე̄რმა ლა̈დღიშდ
Line of edition: 10    პა̈ჲმა̈ნ ოსკიბდ შლა̈ჲ ბაჩვმყ. ბა̄ზი ლეზზა̈რ ა̈ხვნაყედ, სგე̄სვდედ გუდრა^̄̈ლთე,
Line of edition: 11    თვით ბოთლიკ ნათხუმ ჰარა̈ყ შუნდ ლოხვიედ ი ლირჰა̄ლე ონას ჩვა̈თვყვაბა^̄̈ნდ
Line of edition: 12    იმვა^̄̈ჲ მესკბე ნა̄დ, ეჩეჩუ̄ნ, ა̈ხვმა̈ზრედ აფხსა̄თ ი სოლომ, ლა̈ხვბინედ ლი̄ზი
Line of edition: 13    ი ისგლადაღვ ესღვრიდ. და̈რი მა̄მ ნა̄რ გუნ ხოლა. ამეჩუ̄ნ ჟ'ა̈ხვშვემდ, ლეზვებ
Line of edition: 14    ა̈ხვკიდდ ი ჩვა̈თვდი̄რა^̄̈ნდ. ლა̈ხვბინედ ლი̄ზი ი ბა̄ზი ქვა^̄̈ბთე̄სგ' ო̄ნჩა̈დდ. ამეჩუნ
Line of edition: 15    ლემესგ ა̈ხვიშვედ, დი̄რა̈რ ჟ'ა̈ხვტებდა̄ლედ, ეშხუ ბოთლიკ ნათხუმ ჟი ლოხვმა̈ზრედ.
Line of edition: 16    ბა̄ზი ჩვა̈თვხარჯა^̄̈ნდ ი ჰარა̈ყი ჩუ ლოხვი̄შდ, ლირჰა^̄̈ლთე ოთვა̄გა̈ნდ ჟი ლა̈კვცირთე
Line of edition: 17    ი ჟი̄ჲ ა̈ნმე̄რა^̄̈ნ, მარე ნა̈ჲ მა̄მ ოფაშდ ამღა ი ესღვრიდ ი ესღვრიდ. აშხვ შნ
Line of edition: 18    მე̄რე ქა ლა̈ხღა̈რ ზაგა̈რს, ეჩქას ლა̈ხვსგიდად ი ნიშგვეჲ ჟიქა̄ნ ზაგა̈რჟი̄ნ ღვაშა̈რ
Line of edition: 19    ესვწვე̄ნედ. ესვჩოქვევ ჩუ ი ოხვაფშვდ შიშდ თვეფ. მე̄რმა^̄̈ლდი̄ ამჟი̄ნ ჩვემინხ ი
Line of edition: 20    ორი ღვაშ ქ'ო̄ხვსგვეჯნედ, მარე ალჲა̈რდ ჩუშა^̄̈ლიდ მუს ა̈ნჟოღა̄ნეხ. ა̈ხძგვა̈ბ ქა
Line of edition: 21    ჟა̈ჰ ი მა̈გ სგა ლა̈ნპურტი̄ნე. მი მა̄მგვეშ მაშყიდ ეჩქანღვე̄შ, იმჟი დო ა̈მფხირჭვეხ
Line of edition: 22    მუსხა̈ნჟი̄ნ. ესნა̈რ ეშხუ ნიშგვეჲ აფხნეგ ქ'ო̄ხვსა̈დ ი სოფელ ადბა̈ჟნე. სოფელ
Line of edition: 23    ქ'ა̄ლფადა^̄̈სლი ი ჟ'ოხვფხირჭვად ნა̈ჲ. მი ქვინ ლა̈მტა̈ხ, აშხვ აფხნეგს მა̈შკ ხა̄დ მეკვშე,
Line of edition: 24    მე̄რმა _ თხვიმ ი ამჟი̄ნ ანჲეხ ა̈გითე საკარცხვშ. ღვაშა̈რი ჟ'ახხვი̄დხ ესნა̈რ ი
Line of edition: 25    ეჯჲა̈რი ანჴიდხ ა̈გითე.

Line of edition: 26          მესტია

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.