TITUS
Svan Chrestomathy (I: Upper Bal): Part No. 155
Text: 130
Line of edition: 12
130. ლილა̄ტუნა̄̈ლ ი დაგრობ
Line of edition: 13
ლილა̄ტუნა̄̈ლ, ალა ჩიგარ მრე̄ს ლა̈სვ ი ჯვინალდი ლმა̄̈რლი. აშხვ მახაღვა̈ჟს
Line of edition: 14
ესნა̈რ ხალა̈ტ აშხვ მეზგე̄მი დი̄ნა. ალა ჩი̄ ჩუ ხახლე̄ნა ი ღვეშგმე პილს გარ ოთკვი̄ჰახ
Line of edition: 15
დი̄ნა̄̈ ქორშა̈რს. ამი ლაჯმილას ი ნა̄̈თია̈რს საერთოდ ჩი̄ ხასდიკხ მინე ჰასშვე̄მი
Line of edition: 16
ლილა̄ტუნა̄̈ლ ი ლახე ტარესვ ხოჴდენიხ, ეჩქას ზურა̄ლა ლელა̈ტს ლეყა̈რდ დე̄მის
Line of edition: 17
აზა̄რეხ ი ლახე სგა ხებჭა̄̈ნი დი̄ნა მახაღვა̈ჟს, ეჩქას ხოშა ლაღა̈ლს დაგრობ ხეფსი.
Line of edition: 18
ღო ალ დი̄ნა̄ჲ ესნა̈რ სგა̄ჲ ლახბიჭა̄ნე̄ნა ალ მახაღვა̈ჟს ი გუნ ლასკო̄რათე̄სგა
Line of edition: 19
ლმა̄̈რ მეშყდე, მარე იმ იჩომდა. აშხვ ზავ ელმყ ჰლიშ ლადა̈ღ ალ მახეღვა̈ჟი
Line of edition: 20
აჩა̈დ ამხა̄ვ. ამეჩუ̄ნ არიხ ესნა̈რ ი ლენჯა̄̈რ მურგვა̈ლ მა̈გ ლმა̄̈რდ. ალ მახაღვა̈ჟს
Line of edition: 21
ქა ხეწა̈დხ, ეჩქას ჟ'ანვა̈ზრეხ ეჩი̄ დაგრა.
Line of edition: 22
ჰლიშ ლადა̈ღ ლგრათე ლითოფ ლა̈სვ ლუშნუ თოფარშვ. ალ მახეღვაჟი ქა
Line of edition: 23
ლახსგურდა ლგრათე ლათოფს, ეჩქას ანჴა̈დ ესნა̈რ ლბჭა̄ნე დი̄ნა̄̈ ჯმილ, ლა̈ჲკაჩე
Line of edition: 24
თვეფ ი ჯაჭა̈რისგა ხაჴიდ მბჭა̄̈ნის. ქა ნა̈სკინვ თვეფი ცხვი ესნა̈რ უმბილდ
Line of edition: 25
მე̄რმა მეზვბელს ათხვი̄დ ი ერქდა ჩუ ადგანხ ამეჩუ̄ნ. უმბილდ ლედგა̈რია̈ ქორშა̈რდ,
Line of edition: 26
მა̈ჲ საკვრელ ლი, გუნ ა̈დვა̈შგდეხ ი ჩიგარ ხედრა̄ლხ მდგა̈რის ლედგა̈რიდ,
Line of edition: 27
მარე დე̄მე მოშ იდრენდახ, აშხვჟი̄ნ ა̈ცხირხ ესნა̈რ, ერე ბა̄ზი მდგა̈რი ლატლის
Line of edition: 28
ა̈რი ი ხაკუ, ერე ანჴეს ქორთე. ანჴა̈დხ ლედგა̈რია̈ ნა̄̈თია̈რ, ოთდარჯეხ სოლა̈ ლექვე̄რისგა,
Line of edition: 29
ლახა̄სდხ ამექა მდგა̈რი ი ჩვადგა̈რხ.
Line of edition: 30
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
