TITUS
Svan Chrestomathy (I: Upper Bal): Part No. 157
Text: 132
Line of edition: 1
132. ბაბში ი ჭიტი
Line of edition: 2
ბაბში ი ჭიტი ეჯკა̈ლიბ ქვით ლმა̄̈რხ, ერე მა̈გ ჰარყრს ლგნე ხა̄რახ ლა̈ქვთა̈რს
Line of edition: 3
ბაბში̄ ქორ ათხე ჟი მეხვტე ლი ი მე̄რმა ხუღვე, ჭიტის გეზლა̈ გეზლი̄რი ჩუ
Line of edition: 4
ოთსა̈დ.
Line of edition: 5
აშხვჟი̄ნ ესნა̈რ ბაბში̄ს ქორისგა ლე̄ღა̈ბ მა̄მ ხორი. მიჩა ხახვენ ხა̄̈ქვ: "მა̄̈ჲ ესერ
Line of edition: 6
ხეშდენი̄ხ აღბიე̄რისგა ლე̄ღა̄̈ბურდ? "ეჩი̄ ღედ ესერ ნომმა̄ვ ხა̄რ". ან̄გა̄̈ნ ესნა̈რ
Line of edition: 7
ვებილე̄თ ი აჩა̈დ მლახთე. ამეჩუ̄ნ აშხვ ხეხვ-ჭა̈შს ესნა̈რ მახელზიჰ ტა̈ხ ქა ხორიკხ
Line of edition: 8
კა̈ვჟიხ. ლა̈ხცა̄დ ესნა̈რ ქორთე̄'სგა ბაბში, ჟ'ა̈ნკიდ ალ ტა̈ხ მურგვალ, სგ'
Line of edition: 9
ე̄სდე ბიდთე̄'სგა ი რიჰდ ა̈გით' ა̄ნჴიდ.
Line of edition: 10
ალ ბაბში ესნა̈რ ალჲა̈რშე̄რემ ნიბა̄̈შინ ლმა̄̈რ ი მე̄რმა ლადა̈ღ ესნა̈რ ალჲა̈რშე̄რემ
Line of edition: 11
ლეღვი ნა̈ქვიც ოთზზეხ. ალჲა̈რს ხოხახ, ერე ლეღვ მა̄მ ხერდი ბაბშის. ბაბშიდ
Line of edition: 12
ხა̄̈ქვ ესნა̈რ ლეღვი მჴდა: "სგა̄ვ აჩა̈დ ქორთე ი ჟი̄ვ ა̈ნწვე̄ნე მიჩა ლე̄ღა̈ბ, მინეშდ
Line of edition: 13
ხოდრა ლე̄ღა̈ბ ესერ ჰემმა ხერდი. მინე ლეღვი შ'ე̄სერ მა̄მ ხაკუჩ მიჩ".
Line of edition: 14
სერ მე̄რმაჟი̄ნ ესნა̈რ ჯა-ჲ ჭიტი აჩა̈დხ აჯაღ ლა̈მახვა̄ლთე. ა̈დმა̈ცხეხ აშხვ მეზგაისგა
Line of edition: 15
ტახი ფელკა̈რ გარ მა̄დე ი ჴანა̈რი. ჭიტი ციცვშა̄ლ ლმა̄̈ზ ლანგვლიისგა,
Line of edition: 16
მე̄რმე და̄̈რ მოშ. ანჴა̈დ ესნა̈რ ჭიტი ი სგ'ა̄ჩა̈დ ლანგვლიისგა ი გვალისგა ჴანა̈რ უშხვა̄რ
Line of edition: 17
ნე̄სგა ჩვადყურდა. ალ ქორა̈ ზურალა̄̈რ ესნა̈რ ირბიე̄ლხ ი მეყულფა̄̈ შელდ
Line of edition: 18
ქუთვარე ნა̈ჩდუნ ქა ლუნჩუდნა̄ლე ხა̄რხ. ანჴა̈დ ესია̈რ ჭიტი ი სემი თა̈ში ნა̈ჩდუნ
Line of edition: 19
ქ'ო̄თქვით, სგ'ა̄დჲე გვალთე. ჲო̄რი ყვაბ ბაბშის ათბიშ' ე̄სნა̈რ ლანგვლიქა ი ეშხუ
Line of edition: 20
მიჩნე̄მ ლალე̄მ ი ჴანა̈რ უშხვა̄რ ნე̄სგა ჩუ̄დ ადყურდა. მერბიე̄ლ ირბიე̄ლ ესნა̈რ.
Line of edition: 21
ხეწა̈დ ნა̈ჩდუნვა̈რს ი მუნჩუდნა̄̈ლს ლა̈ხჭვედდა: "შელდს ესერ იმღა ხაკლიხ ნაჩდუნვა̈რს?"
Line of edition: 22
"ეჯ' ე̄სერ იმჟი̄ნ ლი?! მიჩ ესერ მა̈გ ქ'ო̄ხვნა̈ჩდუნა̄ლა". "ჲაღვ' ე̄ ხა̈
Line of edition: 23
მა̈ჲ ლ'ა̄ლა̄, შელდს ქა ხაკლი?!" ოხჩ̄დხ ესნა̈რ სერ ალჲა̈რს ლიცვა̄̈ლ ი ხია̄̈რ როფდ
Line of edition: 24
ლახგენე̄ნახ უშხვა̄რ. მა̄მა სერ ი ბა̄ზი ჩვა̈დვახშმა̄̈ნხ, ჩვადუ̄ჟდახ, მა̈გ ეჩქას ესნა̈რ
Line of edition: 25
ან̄გა̈ნ ჟი ჭიტი, ადკარე ჩუ ყო̄რა̈რ, მაჩე̄ნე ჴა̈ნ ჟი ლა̈ჲფიშვდ ი ქ'ა̄ნჴიდ ქა̄̈მთე.
Line of edition: 26
ლა̈ხტახ ეჩქანღო ი ტა̈ხი ფელკა̈რი ჟი ლა̈ჲცვე ი ეჯჲა̈რი ქ'ა̄ნჴიდ ქა̄̈მთე. ლოხჴერდახ
Line of edition: 27
ესნა̈რ უშხვა̄რ ი რიჰდ ა̈გით' ა̄ნჴა̈დხ.
Line of edition: 28
აშხვჟი̄ნ ესნა̈რ აჯაღ ლოხჴერდახ უშხვა̄რ ბაბში ი ჭიტი ი აჩა̈დხ მლახთე.
Line of edition: 29
აშხვ მეზგა̈ისგა ბაბშის ლვერი ფელკა̈რ ოთმა̈ცხა̄̈ნ ი ეჩი ლიქვთერ ლახვა̈ზრეხ
Line of edition: 30
უშხვა̄რ ალჲა̈რდ. სგა ლა̈ხმუშგვარხ ესნა̈რ ალ მეზგა. ბაბში ქა̄̈მთ ა̄ჩა̈დ ი ლაჴვრამყ
Line of edition: 31
ოხღელი, ჭიტიდ ფელიკ ჟ'ა̈ნკიდ ი ლაჴვრაქა ლიბშე ხაკუჩ, მარე ქა დეშ
Line of edition: 32
ხასკდა. სგ'ა̄ნტა̈ხ ბაბში ი ჩუ̄დ ადყურდახ. ჭიტიდ ხა̄̈ქვ: "დეშ ახსკდა̈ი გეზალ,
Line of edition: 33
მა̈ჲ ესერ ჩვემინეს?" "ჩუვ ა̈დთ̄რ ისგდ ნაჭკორი გეზალ! მა̄მ ესერ ხოხალა?" ლა̈ ჲბინეხ
Line of edition: 34
ლიცვა̄̈ლ. ბაბშის ათხა̄დ: "ჯ' ე̄სერ ამი̄ცახა̈ნ მეგნე მა̄მ ლი" ი მუგვრიდ აჩა̈დ.
Line of edition: 35
ქორს ჩვადუ̄ჟდახ, ეჩქას ანჴად ჭიტი, ფელკა̈რ ჩვაჭკვერ ი ეჩჟი̄ნ ქ'ა̄თბიშე
Line of edition: 36
ბაბშის ლაჴვრაქა. ბაბშიდი ჟი ლა̈ჲცვე ი ა̈გით' ა̄ნჴიდ. მე̄რმა ლადა̈ღ ჭიტი დო̄სგ
Line of edition: 37
ანგა̈ნ, მა̈ინძელს მაჴვა̄მ ხა̄̈ქვ ი ა̈გით' ა̄ნჴა̈დ.
Line of edition: 38
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
