TITUS
Svan Chrestomathy (I: Upper Bal): Part No. 175
Page of edition: 122Line of edition: 1
ხა̈ნჩდეხ ლკლავა მღა̈ვს, მარე ლიმშვნეს იბნეხ, ეჩქას ჲედ ნა̈ლი ნა̈ქვიცს ხონხენიხ
Line of edition: 2
ითქს ი ჲედ ბერჟა̈ იშგან ნა̈ქვიცს. ამის ეჯღა იჩოხ, ერე ბერაჟშა̄ლ ესერ ბგი
Line of edition: 3
ი̄რა ითქ. ლაშყვედჟი̄ნ ლიც ლახე ჟიბა̄ვ იკო̄დე ხოდრა̄მ ითქს, ეჯას მა̄̈ნკვი ფიშვდეხ
Line of edition: 4
ქა ღვებხა̈ნქა ი შდა̄შვ ჲგემხ. ამის ხაჟხა ყიჯბა̈რ. ყიჯბა̈რს ჩუ ლფრანღო,
Line of edition: 5
ქა იგვეჰხ ჲედ ლეჰრა̈ყი ლევრა̄̈შითე̄'სგა ხა̈ნჩდეხ ი მა̄დეი ლამნას ხოთ̄თხეხ ი
Line of edition: 6
ეჩას ხა̄მნეხ. ფა̈ტვა̈ ლაშყვედჟი̄ნ ხოდრა ითქ მა̄̈ჲ ხეჩდა, ეჯას ჟიბა̄ვ იკო̄დე ლიც,
Line of edition: 7
ამისი შდა̄შვ იხნიხ ღვებხა̈ნქა ი შდა̄შვ აფრეხ. ამის ხაჟხა გოწვა̄̈რ, მარე ამ გოწვა̄̈რს
Line of edition: 8
ლეზობდ იჴმა̈რიხ: იცხრას ხა̈ნჩდეხ ი ეჩჟი̄ნ ქა იგვეჰხ. ამის დი̄რი ნა̈ჩდუნდ
Line of edition: 9
იჴმა̈რიხ ი ეზერ გა̈მა̈შ ლი, ლახე თა̈შ ხეჩდა მა̄დხვა̈ჲ. სუგვა̈რ ხაჟხა ეჯას ე, ლახე
Line of edition: 10
ლაკლა̈ვჟი̄ნ შდა̄რა̈რს ქა იყვჩუ̄რეხ ერხი კელა̈რ. ეჯა ლამშვენჟი̄ნ ჟიბა̄ვ ჴედნი ი
Line of edition: 11
ამის ლანგავშ ქა ხა̈ყვლეხ ი აშხვ აგის დე̄სგიხ ლალჩა̄̈ მუხვირისგა, ლიკლა̈ვი̄ ქა
Line of edition: 12
ნაზგრნღო ალ ნაყვაბ სუგვა̈რს ჩი აშხუდ აკლა̈ვიხ ი ეჩქას ქა ნაყვჩუ̄რ შდა̄რრე
Line of edition: 13
ითქ ჩუ მა̄მ იცვდი. ამისი შდა̄შვ იშყვდიხ, აფრეხ ი ქა იგვეჰხ, ეჯღ'ე̄რე სუგვა̈რს
Line of edition: 14
მა̈გ ნუკვი შდა ხეჩდა: კვეცნა̈შ, ჭმნა̈შ, მანა̄̈შიშ, ქირსა̈შ, როგვა̈შ ი იშგან ნამშიშ.
Line of edition: 15
ამის, მა̈ჲ საკვრელ ლი, ფექი მა̄მ ხერი აშხვ ნუკვი ნამშა̈ჲშა̄ლ ი ხოდრა ფერიშ
Line of edition: 16
ი გა̈მაშ ხეფსი.
Line of edition: 17
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
