TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 189

Text: 153

Line of edition: 27

153. ქორა̈შ ი ქა̈მი ლიმშავ

Line of edition: 28       თებურვა̈ლისგა მუს ჟი იმჯერ', ე̄ჩქას ქა ღრი მა̈გ დაბა̈რთე ი ხუნკვი̄ ლეჴნის
Line of edition: 29    ჩვადცვე. ეჩქანღო იშგან ლეშდბა̈რს ხაშდბა. ჲედ ა̈ქვში, ლახე მეგმა^̄̈ლ ლი
Line of edition: 30    მეზგე, ი მა̄დეი̄ აბჩი ნა̈ბოზდ. ნა̈ბოზს ჩიქე ზექ-მუგვა̈ლს ამა̄რე ი ღო ჩუ ხონუ̄ნა^̄̈ლი.
Line of edition: 31    მე̄რმა ლადღა̈რს ი ეჩქადი̄ ლამნგარხა^̄̈ნქა ი ლაჰუნწულა̄შხა̈ნქა ჰა̈ნწს ა̈ჲე̄სგიხ
Line of edition: 32    დაბა̈რთექა ი ჰუყვა̈რდ ჟი ხაგემხ აშხვ ა̈დგილჟი̄ნ. ლიჰუნწვი ქა იზგრ', ე̄ჩქად
Line of edition: 33    დაბა̈რი ჩუ იჩვფიხ ი ჟი იფკვი ი ლიჴნიე̄ლ იბნი მა̈რტისგა. მა^̄̈ნკვი ჰუყვა̈რს
Line of edition: 34    სა̈ვ-ჩა̈ვშ ქა ხოფხჟ̄რეხ სკვერდ დაბა̈რისგა. ეჩქანღო ლა^̄̈ხი̄რალშვ ჟი ხაფხჟ̄რეხ
Line of edition: 35    მეჰად დაბისგა ი ლიჴნის იბნეხ ღა̈ნწვიშვშ. ჯვინალდ ღა̈ნწვიშს ბერჟა̈ მკრა^̄̈ მქაფდ
Line of edition: 36    მიჭვი მკრა ხოსგურდა ი ბერგი მქაფდ ლაღვა^̄̈ნვი̄რ ხუღვა^̄̈ნდახ. ეშხუ მღნწუში
Line of edition: 37    ლი, ეშხვი ი ჲედ ჲო̄რი მბრგი ი ხოხვრა^̄̈ლ ლაწსხარარშვ (\\ ლაწსხარალშვ)
Line of edition: 38    ლაწისხს ესჭიმხ. ჩუ ნაჴანუნღო ჟი ილა^̄̈შიხ ი ღო ჟი იჭა^̄̈დიხ. ჩიდ მა^̄̈ნკვი
Line of edition: 39    კვეცან ი როგვ ალა^̄̈ში მა̈გ. ეჯჲა̈რს ხოშა ლიჰი ხაკუხ. ეჩქანღო უჰუნწვა ლახე
Line of edition: 40    ლიხ, ლეგვია̈ნ ჭმნა̈რს აქვთუნე მა̈გ ი ღო _ ლეფტიშვა̈რს. ლიჴნიე̄ლ ქა ისრულ',
Line of edition: 41    ე̄ჩქას ლა̄რა̄ლე ლილცე̄რა^̄̈ლის იჩო მა̈გ მა̈რტისგა ი აპრილისგა. ეჩქანღო ლელვინთ
Line of edition: 42    ზექი ლამა̄რას ი ლაქჩას ხა̄რ მა̈გ ი ჟ'ამა̄რე, მა^̄̈ ხაკუჩ, ეჯას. მაისისგა ფა̈ტვა-
Page of edition: 132 Line of edition: 1    რე ლიჴნიე̄ლ ლი. ფა̈ტვს ჲო̄რინ ხაკუ ჟი ლიჭა^̄̈დი. ჩიქე ნაჴანვუნღო ი ეჩქანღო ჟი
Line of edition: 2    ნალა̄შუნღო. ლეგვჲა̈ნ ჭმნა̈რსი̄ ერხი ფა̈ტვა̈რცახა̈ნ აჴნიხ. მა̈ისი ლიშთხა^̄̈ლჟი̄ნ
Line of edition: 3    დაბრე ლიჩო̄რა^̄̈ლის ი ლა̄რა̄ლე ლიკვცა^̄̈ნის ხაშდბახ. პა̈რპო̄ლდშიე̄რ ბა̈რი ლა̄რა^̄̈ლს
Line of edition: 4    ა̈ჭმე მა̈გ ი ახანახა ლი. ბა̈რი ლა̄რა̄ლე ლიჭმე ქა იზგრ', ე̄ჩქას ჭემს ქორთე ჴიდე
Line of edition: 5    მა̈გ ი ზურალა^̄̈რ დაბა̈რს აჟგნეხ. გვირკისგა ლახვა^̄̈ ლიჭმა^̄̈ლ იბნი ი ეჩხა̄ვ ესღრი
Line of edition: 6    მა̈გ ლა̈ჭმათე. ბარი ლა̄რა^̄̈ლ ესვა^̄̈ჲ მო̄მ ხუღვეხ, ეჯჲა̈რს ლახვხა̈ნ გარ ახღვეხ ჭემ ი
Line of edition: 7    მასა̈რდ ჭირ ხა̄რხ ღალ, ეჯღ' ე̄რე ლიჭმა^̄̈ლ, ლითჲე̄ლ ი ლიკლა̈ვჲე̄ლ _ მა̈გ ჩუ ლნჩდე
Line of edition: 8    ხა̄რხ აშხვჟი̄ნ. ნაკლაუნღო ნა̈ბოზს ჟ'ა̈ჲიხ ლახვთე ჴანა̈რს. მე̄რმა ლადა̈ღ
Line of edition: 9    სა̈ვს ჟი ილჯენიხ ი ა̈გითე ჴიდეხ. ეჩქანღო მღა̈ვს ჴიდეხ დაბხა̈ნ, აშხვ კალვს ჩვაკლა̈ვიხ
Line of edition: 10    ი ეჩქანღო ნა̈ბოზთე ლახვთე̄დ ესყახ ჴანა̈რ ჭამთე. ლიჭმა^̄̈ლუნღო ლითჲე̄ლ
Line of edition: 11    ლი ი ლიკლა̈ვჲე̄ლ. ალა ქ'ა̄ჰე̄სგი ენკანობა̈ თვე̄მი ლიშთხა^̄̈ლდ ი ხოშა ქახი̄ნ. ღვეშგმე
Line of edition: 12    პილს ფა̈ტვა̈რს ითი მა̈გ ი ეჯას ჩვამნთა̈ჟი. ზურალა̄რე გვეშ ლი ლიბა̄ბე, ლი ცხრლი,
Line of edition: 13    ლიკვდე̄ლი, ლიშყვდი ი ლილფრე, ეჩქანღო ლეგოჰდ ჟი ლიმა̄რე. მუჟღვერ
Line of edition: 14    მა^̄̈ჭვა̈რია̄ქ ლიხ ლეჰუნწი ი ეჩქანღო ჩუ ლეჴნი. ეჯჲარე ნაჴანუნღო ზექი
Line of edition: 15    ლიჴდეს იბნე მა̈გ ი ლელვინთ ზაქვ სგა იჴდე მა̈გ ქორთე, ერხი მუჟღვერ ი ერხი
Line of edition: 16    ლვინთისგა. ქრისდე̄ თვეისგა ლვინთ ლი, ი მუს ლახე მასა̈რდ ხა^̄̈ზ, ლიჰუნწის იბნე
Line of edition: 17    მა̈გ დაბა̈რთე. მა^̄̈ნკვი ზავლადღი ნაზორ ჰა̈ნწს ა̈ჲი მა̈გ ლამნგარა̈ლხა̈ნქა
Line of edition: 18    (\\ ლამნგარა̈რხა̈ნქა). ჰა̈ნწს ეჩი̄ზუმ ლუგვენ ხა^̄̈ზ შვა̈ნისგ', ე̄რე ჲარვ ზავ ლენე̄სგრიდ
Line of edition: 19    ხაჰვდი მა̈გ და̈ბს ჩუ მუ̄ჰუ̄ნწვის.

Line of edition: 20       ლილგუჰე̄რის მუჟღვერ ი ლვინთისგა იჩომ მა̈გ, ოდე ლცა̈რ ჟი დო იკვრემიხ
Line of edition: 21    ი მა^̄̈ჲ ესამა ლეგვეჰ შუნ ხუღვე ქა ლეხა̈მთექა, ჩი̄ აშხვჟი̄ნ იგვეჰ მა̈გ ი კიბდონა̈რისგა
Line of edition: 22    ჟი იშხვნიხ გომა̈რისგა. ქუნე გვეშ ი სა̈ხ, ესვა^̄̈ჲ ხოწივ ი ქვერწლა̈რ, ალჲა̈რ,
Line of edition: 23    ხოშა ლაღა̈ლს მა̈გ მუჟღვრეში̄ერ იჩვმინიხ. ქრისდე̄ თვეისგა ი ქვა̈ხი̄სგა ხოშა
Line of edition: 24    ლაღა̈ლ მა̈გ ა̈ზქი ი ზექ ახღვე ქორთე. ლა̈ქვიშ ლახე ლი, ქვიშაჲ ჴიდე მა̈გ,
Line of edition: 25    ესვა̄ჲ ხაწხ. ლეჩფ̄რა^̄̈ლი ესვა^̄̈ჲ ხა̄რ ქვილმგენა^̄̈ლ, ეჯას ქრისდე̄ში თვეჩიქდ ა̈ბრაჲა̈ლი
Line of edition: 26    მა̈გ ლა̈ჩფათე. აშთქა ფირვი ნა̈ჩვფი̄რ ღუნ ლი, ჴა̈ნი ნაკნჩხიე̄რ _ აშხვ ზავ
Line of edition: 27    ჲარვ ქვილმგენე̄მი ლიჩფე.

Line of edition: 28       ამჟი̄ნ ხაშდბა ზავა̈შ ი ზავა̈ ნე̄სგა მუშვა̈ნ. ლახე ტარესვ ხოჴდენი, ზა̈ნთე ღრი
Line of edition: 29    ლა̈ქმათე ი ეჩხა̈ნ ნა̈ქიმ ახღვე.

Line of edition: 30          მესტია

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.