TITUS
Svan Chrestomathy (I: Upper Bal): Part No. 206
Text: 167
Line of edition: 29
167. ქვინლმენა̄ლე ლიჲქიმვ
Line of edition: 30
მუშვა̈ნ მა̄რა ლახე ლიჲქიმვ იმშა ხაწხნ, ეჩქას ა̈ქიმს ხეშმო̄ლდა ი ეჯა ხეჲქიმა.
Line of edition: 31
ქვინლმგენა ლახე მა ხეყრენდა, ეჩქას ა̈ქმა̈რნქაჲ ფიშირს ხოხალდა ალჲარე
Line of edition: 32
ლიმშედა̄̈ლ ი ჲერხი ეჩჟი̄ნ ლხა̈ლ ი ხოჩა ში̄მიშ ლა̈სვხ, ერე ჟ'ა̈ჰდურახ ქვინლმგენა̄̈ლს.
Line of edition: 33
ამჟი ლრა̄̈ქვედ:
Line of edition: 34
1. ჴა̈ნ ლახე ქა იბა̄̈ლო̄ლდა, ეჩქას წირხშვ ლიჭმუ̄რჲა̄ლვნანქა მლდრას
Line of edition: 35
ხათრახ ი ეჯა ჩუ ლიჴვა.
Line of edition: 36
2. მჴფია ლახე ხა̄დ ჴა̈ნს ჭშხა̈რს, ეჩქას, ეშხუ ნუკვი მელვ ლი, ეჩას ჩვაყალდა
Line of edition: 37
ი ქილჩა̈რ უშხვა̄რ ნე̄სგა სგა ხოყუ̄ბა, ეჩქანღო ჩუ ხოჭვე̄ნდა. სამ აფა̄ნუნღო
Line of edition: 38
ნალჯაშუნს ქა ხა̈ფშგა. ფხულოვშ ხობნა ქილჩა̈რ ნე̄სგა ლიფხრიკვის ი ქა ხო კვა̄ნა
Line of edition: 39
მეგჭა მრა̄̈მს.
Line of edition: 40
3. ლახე მიჭვ ხეყვჩენდახ ლაყრჲა̄ლჟი̄ნ ქვინლმგენა̄̈ლს, მა̄ლა̈ თუსს ხა̈შდახ
Line of edition: 41
ი ჩუ ხოჭვე̄ნდახ.
Line of edition: 42
4. ჩა̄̈ჟს ლახე ჯაჭა̈რ ჟი ხეტყვფენდა, ფრი ტეფს ი ბარღვს აყა̈ლდახ ი ეჯას
Page of edition: 146Line of edition: 1
ხა̈შდახ მეტყვფაჟი̄ნ. ეჯა ქა ხაჟგენდა მეტყვფა. ეჩნქ' ა̄ჯაღ ჯერა̈ბსი ხა̈შდახ ი ეჯა̄ჲ
Line of edition: 2
ხოჩა ხა̄დ. ლახე თე̄რა̈რ ხოქმა ჩა̄ჟვ, ეჩქას მა̄̈ნკვი ჩუ ხოტბნახ ი ეჩქანღო ნენზი
Line of edition: 3
მაშა̈ნს ხაცვმენდახ ქა̄მენქა _ კილვა̈რქა _ ი ჩუ ხოჭვე̄ნდახ. ეჯასი ხოჩა̄მდ იმჴერდა
Line of edition: 4
ჩა̄̈ჟ.
Line of edition: 5
ლახე ჩა̄ჟვ ხა̈ჴვშუნა, ეჩქას მლდ̄რაისგა მეტხა ლგრა̄̈ლს ხარტყუნახ ი ქა
Line of edition: 6
ხეჟგო̄ლდა.
Line of edition: 7
5. ლახე ღველჲა̄ქს მა̈ჲნაღ ხორდა, ეჯას სგიმთე ა̈ჲა̄̈სგდახ, ეჯას ხათრახ ი
Line of edition: 8
ჟ'აჴვჩევდახ.
Line of edition: 9
6. ფირვ ლახე ზისხვშ ლიშგის იბნა, ეჩქა ჩილეღვქა გუნ ჟი მეტხა ლჯიმ
Line of edition: 10
მარწვენს ხაცვმენდახ.
Line of edition: 11
7. ქვინლმგენა ლახე ქაყვრევდახ ი ეჩქანღო ყურნა̈რ ჩუ ხეშჲო̄ლდა, ჲერხვა̈
Line of edition: 12
ცილს ხობუ̄რღვახ.
Line of edition: 13
8. ღუნვა̈რს ლახე ტიშ ხერდვნო̄ლდახ, თუთნი კელრე ნანკოშდშვ ასტღუნახ
Line of edition: 14
ი ხოჩა ხა̄დხ.
Line of edition: 15
ი ლახე დაჴა̈რს ხვარს ხოჴდენდახ, ეჩქას ფისა ი გოგირს ჩუ ლნჩდა ხოხჯნახ.
Line of edition: 16
10. ხამა̈რს ლახე ყაყბვირ ხეზგუნო̄ლდახ, ეჩქას ჴა̈რზლი ძირს ხორკინახ ყიჲა̄̈ლჟი̄ნ
Line of edition: 17
ი შდმრა̈ლჟი̄ნ.
Line of edition: 18
11. ჴა̈რზილს ბოფშა̈რსი ხორკინახ, ლახე ყაყვბირ არდა ბოფშრეშ ი ქა დე̄მ
Line of edition: 19
ხეჭყრო̄ლდახ.
Line of edition: 20
12. ჩა̄̈ჟს ლახე ოფა ხა̄დ ჭიშხს, ეჩქას ასალშვ ჟი ხოჭი̄რხდახ ჩუქვა̄ნ ფოლს
Line of edition: 21
ი ჟაგა̈რს ხადა̄̈სგდახ.
Line of edition: 22
13. ჴა̈ნ ლახე ხოლა̄მ გუჟი̄ნ არდა ი ქმრა̈რს შიდა, ეჯას ჟი ხოლგენდახ ქა
Line of edition: 23
უჰდუნაჟი̄ნ.
Line of edition: 24
14. გიცა̈რ ლახე ჭვა̈დვა̈რს ხეყრჲა̄ლ, ეჯას მტს ხაბრა̈ლდახ ი მუჭვა̈რქა
Line of edition: 25
ზისხს ხოკა̈დდახ.
Line of edition: 26
15. გოჭა̈რს ქა ნაყვროუნღო ყურნარე ნარდვთე ტტს ხოყუ̄ბახ ი ეჩქა ჩუ
Line of edition: 27
დე̄მ ხემტა̄ნო̄ლდახ.
Line of edition: 28
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
