TITUS
Svan Prose Texts II (Lower Bal)
Part No. 15
Previous part

Text: 15 
Page of edition: 13 
Line of edition: 6 
XV. მჷქაფიშ ლიტხე


Link to spto2g
Line of edition: 7       ბეჩვია̈შ ფუსდ ლჷმა̈რლი აშხვ დრო̈ვჟი სორთმან. ეჯის ხარდენა
Line of edition: 8    უსგვა ნაღვჟურგეზალ.

Link to spto2g
Line of edition: 9       აშხვ დრო̈ვჟი ბეჩვიჲსგა მა̈ჲდარობ ომჴედელი ი სორთმანიშ
Line of edition: 10    ლა̈ზგაჲსგაჲ მა̈იდ ხარენახ ფა̈მლის. სორთმანს ხაღვენა ლიმკეთ
Line of edition: 11    მჷჟალვა̈რცახა̈ნ ი ლახე მიჩა მაღვანისგა მა̈ჲდარობ ლჷმა̈რ,
Line of edition: 12    სორთმანს ოთთონა მიჩა ვა̈ზრა̈რდ მჷჟალთე ი მჷჟალვა̈რს ოხზჷზახ
Line of edition: 13    კვეცნემ ფექ. ალის ამეჩუ ჲეფდ ლჷმჴჷმრინხ, მარე მჷჟალვა̈რს ესნა̈რი
Line of edition: 14    კვეცნემ ფაქვდ კირ ოთნა̈ჩდახ ი ამიშ დია̈რს ჲერვა̈ჲ ლჷმზვებხ,
Line of edition: 15    ხაშრუნა. ამიშ ბედშვ დია̈რს ჩუ დეშ ლჷმზვებხ ი ჩი ჭვა̈და̈შ
Line of edition: 16    ჴურუჲსგა დირიშ ნა̈კვიშს ხაცყერნახ (ხაჩხინნახ) ი სორთმანიშცახა̈ნ
Line of edition: 17    ქა დეშ ლჷმკვიშნელიხ მაყალშვ.

Link to spto2g
Line of edition: 18       აშხუნღო სორთმანს გვი ლოჰოდა, ერე მიჩა ფა̈მლი მა̈ჲდარობჟიშდ
Line of edition: 19    ხოშა ლჷწხვავე ლჷმა̈რხ ი ლახჭვედნენა ვა̈ზრა̈რს: -- მა̈ჲ ესერ
Line of edition: 20    ამბა̈ვ ლი, დეჲ მა̈ჲდ ხოსგუვხ ი დეჲ ბიზა?

Link to spto2g
Line of edition: 21       ეჩქას ვა̈ზრა̈რდ ქოთბედავეხ ი ხა̈ქვეხ: -- ფუსდ, მჷჟალვა̈რს
Line of edition: 22    კვეცნემ ფაქვდ კირ ესერ ოთჩიდინახ ი ჲერვა̈ჲ ესერ ჩუ იზბიხ,
Line of edition: 23    დაგარშვ ესერ ადგა̈რი.

Link to spto2g
Line of edition: 24       სორთმანს ეჯჟ'ათვა̈შგდენა, ერე სამ ლეთ-ლადეღ ლაყვრახენჟი
Line of edition: 25    მად ოლგენელი. ეჩქანღო ოჰერა მიჩა უსგვა ნაღვჟურგეზალ ი
Line of edition: 26    ვა̈ზრა̈რ ი ხოქვა: -- ჲერვა̈ჲ ესერ მიჩა გეზლირ მჷჟალვა̈რცახა̈ნ
Line of edition: 27    ალ გვაშვ ჩოთწვერნეხ, ეჯის ლჷარობჟი ესერ ხომზირი ლიფუსდს.

Link to spto2g
Line of edition: 28       მერმოლუდ და̈რდმოშ ლა̈ჲმედეხ. მაჰრენე გეზალდ, თენგიზდ,
Line of edition: 29    ხა̈ქვე მიჩა ბაბას: -- ჯინემ ესერ ა̈ნთიშეს ბეჩვიჲსგა უსგვა მახეღვა̈ჟ,
Line of edition: 30    ეჯჲა̈რ აფხნეგდ ქავ ლახნებე ი ჯი ესერ იწვრი ალ გვაშვ.

Link to spto2g
Line of edition: 31       სორთმანდ ნა̈ბ ლახვემ. ეჯნემ ქა̈ნთიშ უსგვა მახეღვა̈ჟ ი სგა
Line of edition: 32    ლა̈ჲჴერნე ი აჩად.

Link to spto2g
Line of edition: 33       არცხელიშ ჭალა̈ჲთე ლეჟა აჩადხ, ეჩქას ხა̈ქვე თენგიზდ მიჩა
Line of edition: 34    აფხნეგა̈რს: -- ათხე ჯი ჟი როქუ ანბერკლეხ ი მჷჟალთეჲსგა ეჯჟი
Line of edition: 35    როქუ ადჲეხ ი შომა̈ჲ ესერ ლა̈ხჭვედდეხ, -- იმღა როქ ჯარხ
Line of edition: 36    ლჷბერკილ ამგვა̈რ ამსვალდ, -- მინდ ამჟოვ ხა̈ქვეხ: მიჩა ბაბას როქ ნა̈ქვს

Link to spto2g
Page of edition: 14 
Line of edition: 1    დემ ხეჩო ი ხეტხიელ ი ეჯღა ალი ლაჰვდითე როქ ლანემ ი
Line of edition: 2    ისგეშთე როქ ანჭირე, ერე ლა̈ნმარჯვად ამიშ ლაჰვდითე ლა̈ისგს.

Link to spto2g
Line of edition: 3       აფხნეგა̈რდ ამჟი ჩვემინხ ი შომა̈ჲ მჷჟალთეჲსგა სგათჰიეხ ი
Line of edition: 4    მჷჟალვა̈რ ჟ'ა̈ნზორანხ ი სორთმანიშ ა̈ნიდ ამჟი ქა ხა̈ქვეხ, გუნ
Line of edition: 5    ათჷმბაჟჷნხ, ერე ამგვა̈რ ამსვალდ სორთმანდ ლეჰვდიდ ქა̈ნცხვა̈ნინე,
Line of edition: 6    მარე სორთმანიშ ნა̈ქვ მად ადჟომეხ ი უსგვა მარე ლჷთიშ მახეღვა̈ჟ
Line of edition: 7    სოფელხა̈ნქა ახტყუბეხ ბეჩვილა̈რს ი უსგვა, ტვიბერს ჯვეგს
Line of edition: 8    ესერ ხაჭიმხ, ეჯჲა̈რუ ლა̈ჲჴერნეხ ი ქაფიშვთხ ეჯჟი.

Link to spto2g
Line of edition: 9       ტვიბერს ლალგენხენქა მერმე უსგვაი სგა ლა̈ჲჴერნეხ ი აჩადხ
Line of edition: 10    ჟეგმა̈შ თანა̈ღს. ეჩხენჩუ სგიმა̈რთეჲსგა სგაჩადხ. ეჩქას მიჩა აფხნეგა̈რ,
Line of edition: 11    ბეჩვილა̈რ, თენგიზს სგვებინჩუ ჩუ ლუშგურანე ხად ი ეჩა
Line of edition: 12    ბედშვ ჩვესგურდახ, ეჩქას თენგიზდ მჷჟალვა̈რს ხა̈ქვე: -- მინს ესერ
Line of edition: 13    ეჯღა̈ჲოვ ლოხჟინდახ ი ჟოვ ანფუშდურეხ, ალიმა̈გ მახეღვა̈ჟს იმთე
Line of edition: 14    ოთჩედნ' ესერ.

Link to spto2g
Line of edition: 15       ბეჩვილა̈რდ ა̈დსისტკეხ ესნა̈რ მახალშვ, მარე მჷჟალვა̈რდ მად
Line of edition: 16    ჩვემინხ ი ჟ'ანფუშდურეხ.

Link to spto2g
Line of edition: 17       თენგიზს ბეჩვილა̈რ ეჯჟი ლუშგურანე ხად, ერე უსგვა მჷჟალვა̈რ
Line of edition: 18    ლჷჩხვტარად ლა̈ჲსგურეხ ი მერმე უსგვა მჷჟალვა̈რ თენგიზს ლახსგურეხ
Line of edition: 19    კჷრკა̈ნდ. შომა̈ჲ ნენცელ ა̈ნკიდხ ი თენგიზდ გუდ აჴიდ,
Line of edition: 20    ბეჩვილა̈რდ თვით მჷმჟა̈ლს სგა ხა̈ფხეჭხ ი ჩუქვან ა̈ნდეხ. თენგიზდ
Line of edition: 21    უსგვა მჷმჟა̈ლ სგა ლა̈ჲტოტვე ი ნაბრაჴა̈რ ლექვა იყირ მა̈გ ი ამჟი
Line of edition: 22    გვა̈რიშდ ეშდჲორი მჷმჟა̈ლ ჟი ლა̈ჲბერკლეხ ი სგვებინ ლა̈ჲკვა̈რხ
Line of edition: 23    ლაჰვდითე. ლექვა ადჲეხ ქაშა̈გ ლექვა ი ქაჰო̈დხ მა̈გ ი ეჯჲა̈რე ნაფა̈სვ
Line of edition: 24    ჯვეგ ეჯზუ ფიშირ ლჷმა̈რხ, ერე ჯვეგი ლაშჷლდანა̈რთეჲსგა ლიჴდალდ
Line of edition: 25    ჩუ დემეგმოშ ოთშჷლდანახ. ეჩეჩუ ჰაკვა̈დ ქა უშდიხა ხარენა, ეჩქას
Line of edition: 26    შიხრას ჯგჷრა̈გიშ სვიფისგა თხვიმ ჟი ლჷზურგვა̈ნ ლჷმა̈რ.

Link to spto2g
Line of edition: 27       სორთმანს გვა̈მიდ ათხიდენა ი ლახედალ ოთჩვემნა. ბეჩვი-ლეჩყა̈ნ
Line of edition: 28    მა̈გ სგა ხოწჰა ი ეჯ ლეთ ლიმხოშ მიჩა ლჷარობჟი მაჰრენე
Line of edition: 29    გეზალ თენგიზიშდ ესმეზრა ი ნა̈ჴიდ ჯვეგხენქა თვით ვოხუშდ
Line of edition: 30    გიცა̈რ მეზგემ ქუნჟი ხოშჩქვარა, ეჩჷნქა მჷჴდად ლოჰოდა.

Link to spto2g
Line of edition: 31       ამჟი გვა̈რიშდ ოთწორა მჷჟალვა̈რცახა̈ნ თენგიზს.


(თენგიზ დადეშქელიანი. მაზერი. ვ.თოფურია. 15.VIII.1927)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.