TITUS
Svan Prose Texts II (Lower Bal)
Part No. 100
Previous part

Text: 100 
Page of edition: 203 
Line of edition: 12 
C. და̈შდვა̈შ მახალ


Line of edition: 13       ჭუბერხენ ა̈მჭირეხ ი ხვარა̈შ ჴარჴისგ' ესერ ომჴედელი და̈შდვ.
Line of edition: 14    მერმა ლადეღ ლექვ' ოდვირ. აფხნეგ და̈რ მეკარქ ი მი გარ ოდვირ ლეჟა
Line of edition: 15    ჰოკრილა̈შ ტვიბ ლეჟა. ლექვცე მად ლჷთხილმარდ ქუთულთეჟი.
Line of edition: 16    მიჩა ნაზვ იმგვა ქა თერჷნ ი იმგვა დემეგ. ხვეჭმ, ხვეჭმ ი
Line of edition: 17    აშხუნღვე ჩვა̈მთვა̈ფ ნაზვ. ჩუ ხუგ ი კჷრკა̈ნდ გარ სვიპ. ლამად ჟიბავ
Line of edition: 18    თე ი ჟა̈ჴვრას ცილა̈რ ქა ლჷფენჩხურე ხად. აშთეჲსგა ისგ'
Line of edition: 19    ოდვირ. ლოხო გვი ი ა̈მის ათკარჩხენა. ამხენქა მერმა ჟა̈ჴვრათ'
Line of edition: 20    ოთსკინა, ღვე მესმათე ი ეშხუ კილომეტრ ი ხჷნსგამ მეგმა̈რქა გარ
Line of edition: 21    ომჩედელი ნაზვა̈შ ლა̈თვფაღა.

Line of edition: 22       ათხე ა̈მის გარ ხვაჭიმ. ამეჩუ ესპერა ქა ი მეგამხენქა, კჷნჯა̈ბს
Line of edition: 23    ფოქ ხარ, ამთეჲსგ' ოთსკინა, მუსვ ჟიქამშხენჩუ ჩოხშიდა ი ფუნთქვირ
Line of edition: 24    ისგოთხვაჲა.

Line of edition: 25       მეჲსგა, ლაჯვიჰთეჲსგა, ხვეჭყჷლელ, მარე დემშვ ანჴპდ ქა.
Line of edition: 26    ჩვა̈დბურა̈ნ სერ ი ონჴვედ ი ხვატ ოხვიქჩ. ეჯის მჷბიდ მჷხირ
Line of edition: 27    ლოხცვივ ი ისგოთქვიჭ, მარე ისგაშხენ მამაგვეშ წვა. ათხე მია̈ჲ
Line of edition: 28    ისგოდვირ ლაჯვიჰთეჲსგა. დემეგიდ წვა. ამჟი ლამად თე ი მერმა
Line of edition: 29    ფოყთე ჴურუ ხარ ი მჷხირ ეშთე ოსსიპ ჟი, მიჩა ლელყვირს ჟ'ოხბიდინ.
Line of edition: 30    ლა̈ჲბინე ლიყული ი ხვატს ი მჷხირს ქა ლა̈მბიშდივ. ეჩხავ-ამხავ
Line of edition: 31    აშიდ მა̈გ ი მუბვირისგ' ამცვირ. ეშხუ ქა ლოხოთლ, მარე
Line of edition: 32    დემეგ ათხვიდ: -- ა, მუქვნია, ქაიჯ ნომ' ანჴე, ოდო მეშხე
Line of edition: 33    ლადეღიჯ ჯარ!

Line of edition: 34       ი ღოშდ ი ღოშდ გარ ონღვრი. ყორჷლდთექა ქონჭვედ ი და̈შდვ
Line of edition: 35    დემეგ ანჴა̈დ ქა. ქა̈მ ეჯჟი მუწკვირტ ლი, ერე ფხულა დემეგ ხარ
Page of edition: 204  Line of edition: 1    თეთე ლა̈ისგ. გუნ მჷცხი მად. ისგა ლუკვრემე მად ჩაფჷლ, ზჷთჴა̈რ,
Line of edition: 2    სახშვირ, მარე ლა̈იდიჯ ჩუ ხვიდგაროლნი, ეჯღაჲ ჟია̈ჯ ხვინჟა̈რი
Line of edition: 3    ა̈მიშ ლალა̈ჩს. ამჟი ჲორი საღა̈თ ქაჩა̈დ ი ფიცხ-ფიცხ მესმი. ათხე
Line of edition: 4    გუდ ონჴვედ, ერე აღრი ქა პირველდ. ვოხუშდ მინუტ ადრინა,
Line of edition: 5    ეჯჟი თხვიმ ქა ლაჲქვიჭე ყორქა. ეჯგვა̈რ ი ეჯგვა̈რ ესყვილ, ერე
Line of edition: 6    შდჷქა̈რდ აშ აჩჴეჩხ.

Line of edition: 7       ათხე ისგა ხვა̈ძგრ თეფიშ სტვირ ნანღლა̈შისგა ი ქაჲ ლოხოთლ
Line of edition: 8    ი ქაჲ აშყა̈დ თეფ ი და̈შდვი ქათსიპჷდ ამექა. სერ მჷხრა̈რს ოსა̈ფხჭ
Line of edition: 9    ი ჟ'ოხბიდინ ი ჩოდვირ. ქინქილ გარ ხოწვა̈ნდა, მუს ჟიქაქა
Line of edition: 10    უშხვა̈რ ლახტეხა. პრატჷლდ მუღვანდა, ა̈ლი ოთაბ კინჩხს ი კაჩკაჩჩუ
Line of edition: 11    გარ ჩოხთირინ ჰოკრილა̈შ ტვიბთე. ეჩეჩუ ჩოცურ ი მი ფოქთ'
Line of edition: 12    ოდვირ. მერმა ლადეღ ლეჟა ლოხვეტხ ი ქოთტუმირ.


Line of edition: 13 
ხაბჟი ჩხვიმიანი. ღეშდერი. მ.ქალდანი. 21. ვიიი 1956



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.