TITUS
Svan Prose Texts II (Lower Bal)
Part No. 155
Previous part

Text: 155 
Page of edition: 296 
Line of edition: 27 
CLV. ლიქნოვა̈ლ ი ჴაცობ


Line of edition: 28       ლეგმერდე ლაქნოვალს ლახ ისგა ხებკენივ, სოფელ ისგა
Line of edition: 29    ინჭურივ. მექნოვა̈ლს შილისგა ლეტვრა ხაჰვდივხ, ჩუ ლას დეშ იგჭა,
Line of edition: 30    ისგა ხესგვრივხ ი, მიჩი ისგა ხაბორგვნახ, ეჯჟი ჩუ ხოყდა̈ნივხ.

Line of edition: 31       ეშვი ფა მექნოვალა რაგა̈დს იბნახ. ეჩქას ეჩეჩუ მერდა სჷმანს
Page of edition: 297  Line of edition: 1    ქიმს წა̈მ ჲერვა̈ ლასვხ, ეჯჲა̈რ, მა̈ ლა̈თიალ ხადხ, იგჭახ, მექნოვა̈ლს
Line of edition: 2    ეჯღა̈ი დემ ხა̈სგდინვნახ.

Line of edition: 3       ლაქნოვალჟი ლიჭვდელი ხემთქუნხ. ეჩხენ-ამხენ მინე-მინე ლჷდგარუა̈შ
Line of edition: 4    ლაქუნს ხეჭვდალხ, მოდეი ამაბუასდა̈შ შვიდბასი ფიშირ ხეჭვდალ:
Line of edition: 5    "მექნოვა̈ლ ეშდჲარვ ზავა̈შს ესერ ისგდინე" ი მეჭვდელს
Line of edition: 6    ხა̈ცხრუნივ, ხოჩამ ემგვაშვ აცხრინა, მარე მექნოვა̈ლს ხამჭინდ რაგა̈დ,
Line of edition: 7    ჰედ ლჷსპად რაგდივ, მოდეი ჰედურდ დემ. მიჩეშხენ ლახა ჟახალჷმდაღ
Line of edition: 8    ჲა̈ს ხეთხელივ, მუჰვნა̈რის ხასდიკჷნ. ღეშდ მესედიშ ირივ
Line of edition: 9    ა სოფლიშ მა̈რემ ლითხელი, ხოჩამდ და̈ს ხებჟჷნ: ე ლვთხელია̈შ
Line of edition: 10    დაგრად ხაყლუნივხ.

Line of edition: 11       ვობა̈შ მექნოვა̈ლ ღეშდ მესედს აშგურანა: "ღეშგიმხენ ხოჩამდოღვ
Line of edition: 12    ა̈ხჭამხ, ხოლა კათხ-ტაბა̈გ ჲესვა̈ს ესერ ახჭემა, ეჯი ეჯაბუასდ მა̈გ ესერ
Line of edition: 13    ხოლამდ ი საბრალდ ა̈რი. მიჩა ღეშდ მესედდ ხოლამდოღვ ნომა ადურდუნე".
Line of edition: 14    ა̈ლი ჭირსუფა̈ლს გუთე ხოზივ ი ლჷდგა̈რიშ ქუნ. მა̈ შვა̈ნს წეს ლასვ, ეჯის ქა
Line of edition: 15    დემგვაშვ ხა̈კლინა.

Line of edition: 16       ჲერხი მექნოვა̈ლს ხოლა ლიქნოვა̈ლ ხად. დაგრას ისგა ხებაკ ი
Line of edition: 17    ჩუ დემ იდგა̈რივ. ამკა̈ლიბჟი ყა̈რა̈შ ლიფშგე ლასვ წეს. ლაქნოვალ
Line of edition: 18    ქორა̈შ ყა̈რს ნენსგაჟი ჟი ხოკადვხ ი ეშიაშ ა̈დისგვხ, ყა̈რა̈შ ლიფშგე
Line of edition: 19    ეჯნა̈რ ხოშხონხ. ამკა̈ლიბ მექნოვა̈ლ სურუ ნაცოდდ ხებჟჷნხ:
Line of edition: 20    "ქვინ ესერ ეჯღა დემ ხოზი ქა" ი ქა კეჰნივ სოფელლისგა. ჲა̈ს
Line of edition: 21    ხოჟრივ, მარე ხოფშირა, მეჰერ ეჯღა̈ჲ, ლაჭთა̈რდ ა̈დისგვ.

Line of edition: 22       მექნოვა̈ლს ლახა ქვინ ქა ხოზივ, ლჷდგა̈რს თერა̈რს ი პილა̈რს
Line of edition: 23    ჩუ ხონჭურახ ი ტებდიჟი ქაჭშხახ, ეჯჟი ქა იქხახ კეცხა̈შთე. ა̈მის
Line of edition: 24    ხოშა ლაღა̈ლ მესვფელ მა̈რე ი ზურალ იჩმუდ. აშ ქორა̈შ ი ისგა̈ხიშ
Line of edition: 25    ნა̈თი-ნა̈თსა̈ვ ლეზვრა̈ლ კილივ ი ლეღვჟმა̈რ იტენტურალ.

Line of edition: 26       ჴაცა ქა კეჰნივ შიშდ ი სოფელ ლიჴედს იბნა ლა̈ტენტურათე.
Line of edition: 27    ტეტიშ მჷრყინე მა̈გ ანღჷრდ, ზურალ ირივ ა ღვაჟმარე. ღვაჟა̈რ
Line of edition: 28    ფაყვა̈რს ყორჟი იკადვხ ქა ი ყორლისგა ტეტიშ ლა̈რყინოშვ ანლჷრდს,
Line of edition: 29    ჲეხვა̈რ ლა̈ლჭალშვ ჴედნივხ. სოფლიშ და̈რ სედნივ ჩუ უტენტურად.
Line of edition: 30    ამჟი ლასვ წეს შიშდ ნაქნოვალუნღვე.

Line of edition: 31       ლჷდგა̈რს ტეტიშ ურყინად და̈რ ცვირა. მეზგა მუგვრიდ ლახა
Line of edition: 32    ჲა̈რ ხოგან, მოლაღა გარ და̈რ ფეშნივ, ჩუ ეჯღა̈ი მა̈გ ჩუ იგვანა
Line of edition: 33    მა̈ნკვიშ ლა̈დეღ, ეჩქანღვე დემის ა̈ნჴდენივ ეჰე. მეზგა ლიჴედ ჲესვა̈ჲშ
Line of edition: 34    მოდე ხოცხონ, ეჯის გუდ ჴიდახ, ერე ლაჴად დიმეგ ხად.
Line of edition: 35    მოლა ნანხრევურ ჩუ დემ ა̈დტენტურისგვ, ეჯის მეზგე მენდროვდ
Line of edition: 36    ხეჭმენივ ი, შომა̈ მიჩ ესწჷხივ, გამს ხა̈ტხა.

Line of edition: 37       ხემა ღვაჟა̈რ, ეჯჟი ჲეხვა̈რი მოლა ფარ ხა̈ნს იტენტურახ, მა̈ხე
Line of edition: 38    მეჴედს ქა ხოქხენიხ, ზურალ ლეზვრა̈ლს ხეჩიდივ ი ღვაჟმარე ლეღვჟმა̈რს.

Page of edition: 298 
Line of edition: 1       ამჟი, ხემ' ეჯჟი ლაჴადშვ, ქორ ჟი იგერშლივ. უშხვრე ლა̈სგდის
Line of edition: 2    შიშდ და̈რ ტეხნივ ქა. ლჷდგა̈რს მიჩა წეს ხეკვად ი სოფელს ჩივშვ
Line of edition: 3    ლემა̈რჯვი ხად მეზგად.

Line of edition: 4       ლაგვანა̈შ ლარშენ შიშდ ხესყივ ი მოში-მოჭიშხ ლასვ სა̈ჭირო
Line of edition: 5    ეჩთე ლიქვისგ მერხალდს გარ ხეკვად. ვობა̈შ თხუმ ამთე ხაჭრა̈ჟივ:
Line of edition: 6    ჲა̈რ ლექვრა̈რე ლა̈სკეთის ხეგნივ ი ჲა̈რ ა̈ჲრაყა̈რთე ესმარალ.
Line of edition: 7    ქორლისგა ლისიპანა̈ლ ჲეხვრე გეშ ლასვ. ლექვრა̈რ ლას ლიგეჰს იბნახ,
Line of edition: 8    ქორს ჴიცრე ლიშდა̈ბ ი დირიშ ლინყე (ლირბი) იბნივ.

Line of edition: 9       ლჷდგა̈რიშ ფედილს ფაყვს და̈რ იგამ, აშ ლა̈იდ სურუ ლალმა̈გნა
Line of edition: 10    დე ირივ.

Line of edition: 11       მჷთმი ჲეხვა̈რ შიშდ ლა̈თმის ხადხ. კეშა̈რს ქა ისპახ, ფარვა̈რს
Line of edition: 12    ჩუ იხვრახ ი ეშვი ფა ჩაფლა̈რსი დემის იდისგვხ. მჷთმია̈შ ლასგვრა
Line of edition: 13    ლალსგვრა ლექვა ლასვ. ლასგვრაჟი იგვნუდხ, ილჭალხ ი იკილალხ,
Line of edition: 14    ყორქა ლახ ქა ჴედნივხ, ქორა̈შ ა̈ზვს ლა̈ლჭალშვ ხეჭამხ ი ხეგვანახ
Line of edition: 15    ლჷდგა̈რიშ ნარდვს.


Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.