TITUS Texts: Black Yajur-Veda: Taittiriya-Samhita

TITUS
Black Yajur-Veda: Taittiriya-Samhita
Part No. 31

Chapter: 3
Paragraph: 1
Verse: 1
Sentence: 1    उ॑त्सन्नय॒ज्ञो वा ए॒ष यद॒ग्निः
Sentence: 2    किं वाहै॒तस्य॑ क्रि॒यते॒ किं वा॒ न
Sentence: 3    यद्वै॑ य॒ज्ञस्य॑ क्रि॒यमा॑णस्यान्त॒र्यन्ति॒ पूय॑ति॒ वा अ॑स्य॒ तत् ।
Sentence: 4    आ॑श्वि॒नीरुप॑ दधाति ।
Sentence: 5    अ॒श्विनौ वै दे॒वाना॑म्भि॒षजौ
Sentence: 6    ताभ्या॑मे॒वास्मै॑ भेष॒जं क॑रोति
Sentence: 7    पञ्चोप॑ दधाति
Sentence: 8    पाङ्क्तो॑ य॒ज्ञस् ।
Sentence: 9    यावा॑ने॒व य॒ज्ञस्तस्मै॑ भेष॒जं क॑रोति ।
Sentence: 10    ऋ॑त॒व्या॒ उप॑ दधाति ।
Sentence: 11    ऋ॑तू॒नां कॢप्त्यै॑ ।।

Verse: 2
Sentence: 1    प॒ञ्चोप॑ दधाति
Sentence: 2    पञ्च॒ वा ऋ॒तव॑स् ।
Sentence: 3    याव॑न्त ए॒वर्तव॑स्
Sentence: 4    तान्क॑ल्पयति
Sentence: 5    समा॒नप्र॑भृतयो भवन्ति समा॒नोद॑र्कास्
Sentence: 6    तस्मा॑त्समा॒ना ऋ॒तव॑स् ।
Sentence: 7    एके॑न प॒देन॒ व्याव॑र्तन्ते
Sentence: 8    तस्मा॑दृ॒तवो॒ व्याव॑र्तन्ते
Sentence: 9    प्राण॒भृत॒ उप॑ दधाति ।
Sentence: 10    ऋ॒तुष्वे॒व प्रा॒णान्द॑धाति
Sentence: 11    तस्मा॑त्समा॒नाः सन्त॑ ऋ॒तवो॒ न जी॑र्यन्ति ।
Sentence: 12    अथो॒ प्र ज॑नयत्येवैनान्
Sentence: 13    ए॒ष वै॑ वा॒युर्यत्प्रा॒णस् ।
Sentence: 14    यदृ॑त॒व्या॑ उप॒धाय॑ प्राण॒भृतः॑ ।।

Verse: 3
Sentence: 1    उ॑प॒दधा॑ति॒ तस्मा॒त्सर्वा॑नृ॒तूननु॑ वा॒युरा व॑रीवर्त्ति
Sentence: 2    वृष्टि॒सनी॒रुप॑ दधाति
Sentence: 3    वृष्टि॑मे॒वाव॑ रुन्द्धे॒ यदे॑क॒धोप॑द॒ध्यादेक॑मृ॒तुं व॑र्षेत् ।
Sentence: 4    अ॑नुपरि॒हारं॑ सादयति॒ तस्मा॒त्सर्वा॑नृ॒तून्व॑र्षति
Sentence: 5    यत्प्रा॑ण॒भृत॑ उप॒धाय॑ वृष्टि॒सनी॑रुप॒दधा॑ति॒ तस्मा॑द्वा॒युप्र॑च्युता दि॒वो वृष्टि॑रीर्त�
Sentence: 6    प॒शवो वै वय॒स्या॑स् ।
Sentence: 7    नाना॑मनसः॒ खलु वै प॒शवो॒ नाना॑व्रता॒स्ते॒ ऽप ए॒वाभि सम॑नसः ।।

Verse: 4
Sentence: 1    यं का॒मये॑त ।
Sentence: 2    अ॑प॒शुः स्या॒दिति॑ वय॒स्या॒स्तस्यो॑प॒धाया॑प॒स्या॒ उप॑ दध्या॒दसं॑ज्ञानमे॒वास्मै॑ प॒शुभिः॑ करोति ।
Sentence: 3    अ॑प॒शुरे॒व भ॑वति
Sentence: 4    यं का॒मये॑त
Sentence: 5    पशु॒मान्त्स्या॒दित्य॑प॒स्या॒स्तस्यो॑प॒धाय॑ वय॒स्या॒ उप॑ दध्यात्सं॒ज्ञान॑मे॒वास्मै॑ प॒शुभिः॑ करोति
Sentence: 6    पशु॒माने॒व भ॑वति
Sentence: 7    चत॑स्रः पु॒रस्ता॒दुप॑ दधाति
Sentence: 8    तस्मा॑च्च॒त्वारि॒ चक्षु॑षो रू॒पाणि॒ द्वे शु॒क्ले द्वे कृ॒ष्णे ।।

Verse: 5
Sentence: 1    मू॑र्ध॒न्वती॑र्भवन्ति
Sentence: 2    तस्मा॑त्पु॒रस्ता॑न्मू॒र्धा
Sentence: 3    पञ्च॒ दक्षि॑णायां॒ श्रोण्या॒मुप॑ दधाति॒ पञ्चोत्त॑रस्यां॒ तस्मा॑त्प॒श्चाद्वर्षी॑यान्पु॒रस�णः प॒शुस् ।
Sentence: 4    ब॒स्तो वय॒ इति॒ दक्षि॒णे ऽं॑स॒ उप॑ दधाति वृ॒ष्णिर्वय॒ इत्युत्त॑रे ।
Sentence: 5    अंसा॑वे॒व प्रति॑ दधाति
Sentence: 6    व्या॒घ्रो वय॒ इति॒ दक्षि॑णे प॒क्ष उप॑ दधाति सिं॒हो वय॒ इत्युत्त॑रे
Sentence: 7    प॒क्षयो॑रे॒व वी॒र्यं॑ दधाति
Sentence: 8    पुरु॑षो॒ वय॒ इति॒ मध्ये॒ तस्मा॒त्पुरु॑षः पशू॒नामधि॑पतिः ।।

Paragraph: 2
Verse: 1
Sentence: 1    इन्द्रा॑ग्नी॒ अव्य॑थमाना॒मिति॑ स्वयमातृ॒ण्णामुप॑ दधाति ।
Sentence: 2    इ॑न्द्रा॒ग्निभ्यां॒ वा इमौ लोकौ॒ विधृ॑तौ ।
Sentence: 3    अ॒नयो॑र्लो॒कयो॒र्विधृ॑त्यै ।
Sentence: 4    अधृ॑तेव॒ वा ए॒षा यन्म॑ध्य॒मा चिति॑स् ।
Sentence: 5    अ॒न्तरि॑क्षमिव॒ वा ए॒षा ।
Sentence: 6    इन्द्रा॑ग्नी॒ इत्या॑ह ।
Sentence: 7    इ॑न्द्रा॒ग्नी वै॑ दे॒वाना॑मोजो॒भृतौ॑ ।
Sentence: 8    ओज॑सैवैनाम॒न्तरि॑क्षे चिनुते
Sentence: 9    धृत्यै
Sentence: 10    स्वयमातृ॒ण्णामुप॑ दधाति ।
Sentence: 11    अ॒न्तरि॑क्षं वै स्वयमातृ॒ण्णा ।
Sentence: 12    अ॒न्तरि॑क्षमे॒वोप॑ धत्ते ।
Sentence: 13    अश्व॒मुप॑ ।।

Verse: 2
Sentence: 1    घ्रा॑पयति
Sentence: 2    प्रा॒णमे॒वास्यां॑ दधाति ।
Sentence: 3    अथो॑ प्राजाप॒त्यो वा अश्वः
Sentence: 4    प्र॒जाप॑तिनै॒वाग्निं चि॑नुते
Sentence: 5    स्वयमातृ॒ण्णा भ॑वति
Sentence: 6    प्रा॒णाना॒मुत्सृ॑ष्ट्यै ।
Sentence: 7    अथो॑ सुव॒र्गस्य॑ लो॒कस्यानु॑ख्यात्यै ।
Sentence: 8    दे॒वानां वै सुव॒र्गं लो॒कं य॒तां दिशः॒ सम॑व्लीयन्त
Sentence: 9    त ए॒ता दिश्या॑ अपश्यन्
Sentence: 10    ता उपा॑दधत
Sentence: 11    ताभिर्वै॒ ते दिशो॑ ऽदृंहन्
Sentence: 12    यद्दिश्या॑ उप॒दधा॑ति
Sentence: 13    दिशं विधृ॑त्यै
Sentence: 14    दश॑ प्राण॒भृतः॑ पु॒रस्ता॒दुप॑ ।।

Verse: 3
Sentence: 1    द॑धाति
Sentence: 2    नव वै॒ पुरु॑षे प्रा॒णा नाभि॑र्दश॒मी
Sentence: 3    प्रा॒णाने॒व पु॒रस्ता॑द्धत्ते
Sentence: 4    तस्मा॑त्पु॒रस्ता॑त्प्रा॒णास् ।
Sentence: 5    ज्योति॑ष्मतीमुत्त॒मां उप॑ दधाति
Sentence: 6    तस्मा॑त्प्रा॒णानां॒ वाग्ज्योति॑रुत्त॒मास् ।
Sentence: 7    दशोप॑ दधाति
Sentence: 8    दशा॑क्षरा वि॒राड्^वि॒राज्
Sentence: 9    वि॒राट्छन्द॑सां॒ ज्योति॑स् ।
Sentence: 10    ज्योत्रे॒व पु॒रस्ता॑द्धत्ते
Sentence: 11    तस्मा॑त्पु॒रस्ता॒ज्ज्योति॒रुपा॑स्महे
Sentence: 12    छन्दां॑सि प॒शुष्वा॒जिम॑युस्
Sentence: 13    तान्बृ॑ह॒त्युद॑जयत्
Sentence: 14    तस्मा॒द्बार्ह॑ताः ।।

Verse: 4
Sentence: 1    प॒शव॑ उच्यन्ते
Sentence: 2    मा छन्द॒ इति॑ दक्षिण॒त उप॑ दधाति॒ तस्मा॑द्दक्षि॒णावृ॑तो॒ माषाः
Sentence: 3    पृथि॒वी छन्द॒ इति॑ प॒श्चात्प्रति॑ष्ठित्यै ।
Sentence: 4    अ॒ग्निर्दे॒वतेत्यु॑त्तर॒त ओजो॒ वा अ॒ग्निरोज॑ ए॒वोत्त॑र॒तो ध॑त्ते॒ तस्मा॑दुत्तरतोऽभिप्रया॒यी ज॑यति
Sentence: 5    षट्त्रिं॑श॒त्सम्प॑द्यन्ते
Sentence: 6    षट्त्रिं॑शदक्षरा बृह॒ती
Sentence: 7    बार्ह॑ताः प॒शव॑स् ।
Sentence: 8    बृ॑हत्यै॒वास्मै॑ प॒शूनव॑ रुन्द्धे
Sentence: 9    बृह॒ती छन्द॑सां॒ स्वारा॑ज्य॒म्परी॑याय
Sentence: 10    यस्यै॒ताः ।।

Verse: 5
Sentence: 1    उ॑पधी॒यन्ते॒ गछ्ति॒ स्वारा॑ज्यम् ।
Sentence: 2    स॒प्त वाल॑खिल्याः पु॒रस्ता॒दुप॑ दधाति स॒प्त प॒श्चात्
Sentence: 3    स॒प्त वै॑ शीर्ष॒ण्याः॑ प्रा॒णा द्वाववा॑ञ्चौ प्रा॒णानां॑ सवीर्य॒त्वाय
Sentence: 4    मू॒र्धासि॒ राडिति॑ पु॒रस्ता॒दुप॑ दधाति॒ यन्त्री॒ राडिति॑ प॒श्चात्
Sentence: 5    प्रा॒णाने॒वास्मै॑ स॒मीचो॑ दधाति ।।

Paragraph: 3
Verse: 1
Sentence: 1    दे॒वा वै॒ यद्य॒ज्ञे ऽकु॑र्वत॒ तदसु॑रा अकुर्वत
Sentence: 2    ते दे॒वा ए॒ता अ॑क्ष्णयास्तो॒मीया॑ अपश्यन्
Sentence: 3    ता अ॒न्यथा॒नूच्या॒न्यथोपा॑दधत
Sentence: 4    तदसु॑रा॒ नान्ववा॑यन्
Sentence: 5    ततो॑ दे॒वा अभ॑व॒न्परासु॑रास् ।
Sentence: 6    यद॑क्ष्णयास्तो॒मीया॑ अ॒न्यथा॒नूच्या॒न्यथो॑प॒दधा॑ति॒ भ्रात्रि॑व्याभिभूत्यै
Sentence: 7    भव॑त्या॒त्मना॒ परा॑स्य॒ भ्रातृ॑व्यो भवति ।
Sentence: 8    आ॒शुस्त्रि॒वृदिति॑ पु॒रस्ता॒दुप॑ दधाति
Sentence: 9    य॒ज्ञमु॒खं वै॑ त्रि॒वृत् ।।

Verse: 2
Sentence: 1    य॑ज्ञमु॒खमे॒व पु॒रस्ता॒द्वि या॑तयति
Sentence: 2    व्यो॑म सप्तद॒श इति॑ दक्षिण॒तस् ।
Sentence: 3    अन्नं वै॒ व्यो॑म ।
Sentence: 4    अन्नं॑ सप्तद॒शस् ।
Sentence: 5    अन्न॑मे॒व द॑क्षिण॒तो ध॑त्ते
Sentence: 6    तस्मा॒द्दक्षि॑णे॒नान्न॑मद्यते
Sentence: 7    ध॒रुण॑ एकविं॒श इति॑ प॒श्चात्प्र॑ति॒ष्ठा वा ए॑कविं॒शः
Sentence: 8    प्रति॑ष्ठित्यै
Sentence: 9    भा॒न्तः प॑ञ्चद॒श इत्यु॑त्तर॒तस् ।
Sentence: 10    ओजो वै भा॒न्तस् ।
Sentence: 11    ओजः॑ पञ्चद॒शस् ।
Sentence: 12    ओज॑ ए॒वोत्त॑र॒तो ध॑त्ते
Sentence: 13    तस्मा॑दुत्तरतोऽभिप्रया॒यी ज॑यति
Sentence: 14    प्रतू॑र्तिरष्टाद॒श इति॑ पु॒रस्ता॑त् ।।

Verse: 3
Sentence: 1    उप॑ दधाति
Sentence: 2    द्वौ त्रि॒वृता॑वभिपू॒र्वं य॑ज्ञमु॒खे वि या॑तयति ।
Sentence: 3    अ॑भिव॒र्तः स॑विं॒श इति॑ दक्षिण॒तस् ।
Sentence: 4    अन्नं॒ वा अ॑भिव॒र्तस् ।
Sentence: 5    अन्नं॑ सविं॒शस् ।
Sentence: 6    अन्न॑मे॒व द॑क्षिण॒तो ध॑त्ते
Sentence: 7    तस्मा॒द्दक्षि॑णे॒नान्न॑मद्यते
Sentence: 8    वर्चो॑ द्वाविं॒श इति॑ प॒श्चात् ।
Sentence: 9    यद्विं॑श॒तिर्द्वे तेन॑ वि॒राजौ
Sentence: 10    यद्द्वे प्र॑ति॒ष्ठा तेन
Sentence: 11    वि॒राजो॑रे॒वाभि॑पू॒र्वम॒न्नाद्ये॒ प्रति॑ तिष्ठति
Sentence: 12    तपो॑ नवद॒श इत्यु॑त्तर॒तस्
Sentence: 13    तस्मा॑त्स॒व्यः ।।

Verse: 4
Sentence: 1    हस्त॑योस्तप॒स्वित॑रस् ।
Sentence: 2    योनि॑श्चतुर्विं॒श इति॑ पु॒रस्ता॒दुप॑ दधाति
Sentence: 3    चतु॑र्विंशत्यक्षरा गाय॒त्री
Sentence: 4    गा॑य॒त्री य॑ज्ञमु॒खम् ।
Sentence: 5    य॑ज्ञमु॒खमे॒व पु॒रस्ता॒द्वि या॑तयति
Sentence: 6    गर्भाः॑ पञ्चविं॒श इति॑ दक्षिण॒तस् ।
Sentence: 7    अन्नं वै॒ गर्भा॑स् ।
Sentence: 8    अन्न॑म्पञ्चविं॒शस् ।
Sentence: 9    अन्न॑मे॒व द॑क्षिण॒तो ध॑त्ते
Sentence: 10    तस्मा॒द्दक्षि॑णे॒नान्न॑मद्यते ।
Sentence: 11    ओज॑स्त्रिण॒व इति॑ प॒श्चात् ।
Sentence: 12    इ॒मे वै॑ लो॒कास्त्रि॑ण॒वस् ।
Sentence: 13    ए॒ष्वे॒व लो॒केषु॒ प्रति॑ तिष्ठति
Sentence: 14    स॒म्भर॑णस्त्रयोविं॒श इति॑ ।।

Verse: 5
Sentence: 1    उ॑त्तर॒तस्
Sentence: 2    तस्मा॑त्स॒व्यो हस्त॑योः सम्भा॒र्य॑तरः
Sentence: 3    क्रतु॑रेकत्रिं॒श इति॑ पु॒रस्ता॒दुप॑ दधाति
Sentence: 4    वाग्वै॒ क्रतु॑स् ।
Sentence: 5    य॑ज्ञमु॒खं वाच् ।
Sentence: 6    य॑ज्ञमु॒खमे॒व पु॒रस्ता॒द्वि या॑तयति
Sentence: 7    ब्र॒ध्नस्य॑ वि॒ष्टपं॑ चतुस्त्रिं॒श इति॑ दक्षिण॒तस् ।
Sentence: 8    असौ॒ वा आ॑दि॒त्यो ब्र॒ध्नस्य॑ वि॒ष्टप॑म्
Sentence: 9    ब्रह्मवर्च॒समे॒व द॑क्षिण॒तो ध॑त्ते
Sentence: 10    तस्मा॒द्दक्षि॒णो ऽर्धो॑ ब्रह्मवर्च॒सित॑रः
Sentence: 11    प्रति॒ष्ठा त्र॑यस्त्रिं॒श इति॑ प॒श्चात्
Sentence: 12    प्रति॑ष्ठित्यै
Sentence: 13    नाकः॑ षट्त्रिं॒श इत्यु॑त्तर॒तः
Sentence: 14    सु॑व॒र्गो वै॑ लो॒को नाकः
Sentence: 15    सुव॒र्गस्य॑ लो॒कस्य॒ सम॑ष्ट्यै ।।

Paragraph: 4
Verse: 1
Sentence: 1    अ॒ग्नेर्भा॒गो॒ ऽसीति॑ पु॒रस्ता॒दुप॑ दधाति
Sentence: 2    यज्ञमु॒खं वा अ॒ग्निस् ।
Sentence: 3    य॑ज्ञमु॒खं दी॒क्षा
Sentence: 4    य॑ज्ञमु॒खम्ब्रह्म
Sentence: 5    यज्ञमु॒खं त्रि॒वृत् ।
Sentence: 6    य॑ज्ञमु॒खमे॒व पु॒रस्ता॒द्वि या॑तयति
Sentence: 7    नृ॒चक्ष॑साम्भा॒गो॒ ऽसीति॑ दक्षिण॒तः
Sentence: 8    शु॑श्रु॒वांसो वै नृ॒चक्ष॒सस् ।
Sentence: 9    अन्नं॑ धा॒ता
Sentence: 10    जा॒तायै॒वास्मा॒ अन्न॒मपि॑ दधाति
Sentence: 11    तस्मा॑ज्जा॒तो ऽन्न॑मत्ति
Sentence: 12    ज॒नित्रं॑ स्पृ॒तं स॑प्तद॒श स्तोम॒ इत्या॑ह ।
Sentence: 13    अन्नं वै ज॒नित्र॑म् ।।

Verse: 2
Sentence: 1    अन्नं॑ सप्तद॒शस् ।
Sentence: 2    अन्न॑मे॒व द॑क्षिण॒तो ध॑त्ते
Sentence: 3    तस्मा॒द्दक्षि॑णे॒नान्न॑मद्यते
Sentence: 4    मि॒त्रस्य॑ भा॒गो॒ ऽसीति॑ प॒श्चात्
Sentence: 5    प्रा॒णो वै॑ मि॒त्रो॑ ऽपा॒नो वरु॑णः
Sentence: 6    प्राणापा॒नावे॒वास्मि॑न्दधाति
Sentence: 7    दि॒वो वृ॒ष्टिर्वाता॑ स्पृ॒ता ए॑कविं॒श स्तोम॒ इत्या॑ह
Sentence: 8    प्रति॒ष्ठा वा ए॑कविं॒शः
Sentence: 9    प्रति॑ष्ठित्यै ।
Sentence: 10    इन्द्र॑स्य भा॒गो॒ ऽसीत्यु॑त्तर॒तस् ।
Sentence: 11    ओजो॒ वा इन्द्र॑स् ।
Sentence: 12    ओजो॒ विष्णु॑स् ।
Sentence: 13    ओजः॑ क्ष॒त्रम्
Sentence: 14    ओजः॑ पञ्चद॒शः ।।

Verse: 3
Sentence: 1    ओज॑ ए॒वोत्त॑र॒तो ध॑त्ते
Sentence: 2    तस्मा॑दुत्तरतोऽभिप्रया॒यी ज॑यति
Sentence: 3    वसू॑नाम्भा॒गो॒ ऽसीति॑ पु॒रस्ता॒दुप॑ दधाति
Sentence: 4    यज्ञमु॒खं वै॒ वस॑वस् ।
Sentence: 5    य॑ज्ञमु॒खं रु॒द्रास् ।
Sentence: 6    य॑ज्ञमु॒खं च॑तुर्विं॒शस् ।
Sentence: 7    य॑ज्ञमु॒खमे॒व पु॒रस्ता॒द्वि या॑तयति ।
Sentence: 8    आ॑दि॒त्याना॑म्भा॒गो॒ ऽसीति॑ दक्षिण॒तस् ।
Sentence: 9    अन्नं॒ वा आ॑दि॒त्यास् ।
Sentence: 10    अन्न॑म्म॒रुत॑स् ।
Sentence: 11    अन्नं॒ गर्भा॑स् ।
Sentence: 12    अन्न॑म्पञ्चविं॒शस् ।
Sentence: 13    अन्न॑मे॒व द॑क्षिण॒तो ध॑त्ते
Sentence: 14    तस्मा॒द्दक्ष्णे॒नान्न॑मद्यते ।
Sentence: 15    अदि॑त्यै भा॒गः ।।

Verse: 4
Sentence: 1    अ॒सीति॑ प॒श्चात्
Sentence: 2    प्रति॒ष्ठा वा अदि॑तिः
Sentence: 3    प्रति॒ष्ठा पू॒षा
Sentence: 4    प्र॑ति॒ष्ठा त्रि॑ण॒वः
Sentence: 5    प्रति॑ष्ठित्यै
Sentence: 6    दे॒वस्य॑ सवि॒तुर्भा॒गो॒ ऽसीत्यु॑त्तर॒तस् ।
Sentence: 7    ब्रह्म वै दे॒वः स॑वि॒ता
Sentence: 8    ब्रह्म॒ बृह॒स्पति॑स् ।
Sentence: 9    ब्रह्म॑ चतुष्टो॒मस् ।
Sentence: 10    ब्र॑ह्मवर्च॒समे॒वोत्त॑र॒तो ध॑त्ते
Sentence: 11    तस्मा॒दुत्त॒रो ऽर्धो॑ ब्रह्मवर्च॒सित॑रः
Sentence: 12    सावि॒त्रव॑ती भवति
Sentence: 13    प्रसू॑त्यै
Sentence: 14    तस्मा॑द्ब्राह्म॒णाना॒मुदी॑ची स॒निः प्रसू॑ता
Sentence: 15    ध॒र्त्रश्च॑तुष्टो॒म इति॑ पु॒रस्ता॒दुप॑ दधाति
Sentence: 16    यज्ञमु॒खं वै॑ ध॒र्त्रः ।।

Verse: 5
Sentence: 1    य॑ज्ञमु॒खं च॑तुष्टो॒मस् ।
Sentence: 2    य॑ज्ञमु॒खमे॒व पु॒रस्ता॒द्वि या॑तयति
Sentence: 3    यावा॑नाम्भा॒गो॒ ऽसीति
Sentence: 4    दक्षिण॒तस् ।
Sentence: 5    मासा वै॒ यावा॑ अर्धमा॒सा अया॑वास्
Sentence: 6    तस्मा॑द्दक्षि॒णावृ॑तो॒ मासा॑स् ।
Sentence: 7    अन्नं वै॒ यावा॑स् ।
Sentence: 8    अन्न॑म्प्र॒जास् ।
Sentence: 9    अन्न॑मे॒व द॑क्षिण॒तो ध॑त्ते
Sentence: 10    तस्मा॒द्दक्षि॑णे॒नान्न॑मद्यते ।
Sentence: 11    ऋ॑भू॒णाम्भा॒गो॒ ऽसीति॑ प॒श्चात्
Sentence: 12    प्रति॑ष्ठित्यै
Sentence: 13    विव॒र्तो॑ ऽष्टाचत्वारिं॒श इत्यु॑त्तर॒तस् ।
Sentence: 14    अ॒नयो॑र्लो॒कयोः॑ सवीर्य॒त्वाय
Sentence: 15    तस्मा॑दिमौ लोकौ स॒माव॑द्वीर्यौ ।।

Verse: 6
Sentence: 1    यस्य॒ मुख्य॑वतीः पु॒रस्ता॑दुपधी॒यन्ते॒ मुख्य॑ ए॒व भ॑वति ।
Sentence: 2    आस्य॒ मुख्यो॑ जायते
Sentence: 3    यस्यान्न॑वतीर्दक्षिण॒तो ऽत्त्यन्न॑म्
Sentence: 4    आस्या॑न्ना॒दो जा॑यते
Sentence: 5    यस्य॑ प्रति॒ष्ठाव॑तीः प॒श्चात्प्रत्ये॒व ति॑ष्ठति
Sentence: 6    यस्यौ॑जस्वतीरुत्तर॒त ओ॑ज॒स्व्ये॒व भ॑वति ।
Sentence: 7    आस्यौ॑ज॒स्वी जा॑यते ।
Sentence: 8    अ॒र्को वा ए॒ष यद॒ग्निस्
Sentence: 9    तस्यै॒तदे॒व स्तो॒त्रमे॒तच्छ॒स्त्रम् ।
Sentence: 10    यदे॒ष वि॒धा ।।

Verse: 7
Sentence: 1    वि॑धी॒यते॒ ऽर्क ए॒व तद॒र्क्य॒मनु॒ वि धी॑यते ।
Sentence: 2    अत्त्यन्न॒मास्या॑न्ना॒द्यो जा॑यते॒ यस्यै॒षा वि॒धा वि॑धी॒यते॒ य उ॑ चैनामे॒वं वेद
Sentence: 3    सृष्टी॒रुप॑ दधाति
Sentence: 4    यथासृ॒ष्टमे॒वाव॑ रुन्द्धे
Sentence: 5    न वा इ॒दं दिवा॒ न नक्त॑मासी॒दव्या॑वृत्तम् ।
Sentence: 6    ते दे॒वा ए॒ता व्यु॑ष्टीरपश्यन्
Sentence: 7    ता उपा॑दधत
Sentence: 8    ततो॒ वा इ॒दं व्औ॑छत् ।
Sentence: 9    यस्यै॒ता उ॑पधी॒यन्ते॒ व्ये॒वास्मा॑ उछति ।
Sentence: 10    अथो॒ तम॑ ए॒वाप॑ हते ।।

Paragraph: 5
Verse: 1
Sentence: 1    अग्ने॑ जा॒तान्प्र णु॑दा नः स॒पत्ना॒निति॑ पु॒रस्ता॒दुप॑ दधाति
Sentence: 2    जा॒ताने॒व भ्रातृ॑व्या॒न्प्र णु॑दते
Sentence: 3    सह॑सा जा॒तानिति॑ प॒श्चात् ।
Sentence: 4    ज॑नि॒ष्यमा॑णाने॒व प्रति॑ नुदते
Sentence: 5    चतुश्चत्वारिं॒श स्तोम॒ इति॑ दक्षिण॒तस् ।
Sentence: 6    ब्र॑ह्मवर्च॒सं वै॑ चतुश्चत्वारिं॒शस् ।
Sentence: 7    ब्र॑ह्मवर्च॒समे॒व द॑क्षिण॒तो ध॑त्ते
Sentence: 8    तस्मा॒द्दक्षि॒णो ऽर्धो॑ ब्रह्मवर्च॒सित॑रः
Sentence: 9    षोड॒श स्तोम॒ इत्यु॑त्तर॒तस् ।
Sentence: 10    ओजो वै षोड॒शस् ।
Sentence: 11    ओज॑ ए॒वोत्त॑र॒तो ध॑त्ते
Sentence: 12    तस्मा॑त् ।।

Verse: 2
Sentence: 1    उ॑त्तरतोऽभिप्रया॒यी ज॑यति
Sentence: 2    वज्रो वै चतुश्चत्वारिं॒शो वज्रः॑ षोडा॒शस् ।
Sentence: 3    यदे॒ते इष्ट॑के उप॒दधा॑ति जा॒तांश्चै॒व ज॑नि॒ष्यमा॑णांश्च॒ भ्रातृ॑व्यान्प्र॒णुद्य॒ वज्र॒मनु॒ प्र ह॑रति
Sentence: 4    स्तृत्यै
Sentence: 5    पुरी॑षवती॒म्मध्य॒ उप॑ दधाति
Sentence: 6    पुरी॑षं वै॒ मध्य॑मा॒त्मनः
Sentence: 7    सात्मा॑नमे॒वाग्निं चि॑नुते
Sentence: 8    सात्मा॒मुष्मिँ॑ लो॒के भ॑वति॒ य ए॒वं वेद॑ ।
Sentence: 9    ए॒ता वा अ॑सप॒त्ना नामेष्ट॑कास् ।
Sentence: 10    यस्यै॒ता उ॑पधी॒यन्ते॑ ।।

Verse: 3
Sentence: 1    नास्य॑ स॒पत्नो॑ भवति
Sentence: 2    प॒शुर्वा ए॒ष यद॒ग्निस् ।
Sentence: 3    वि॒राज॑ उत्त॒मायां॒ चित्या॒मुप॑ दधाति
Sentence: 4    वि॒राज॑मे॒वोत्त॒माम्प॒शुषु॑ दधाति
Sentence: 5    तस्मा॑त्पशु॒मानु॑त्त॒मां वाचं॑ वदति
Sentence: 6    दश॑द॒शोप॑ दधाति सवीर्य॒त्वाय॑ ।
Sentence: 7    अ॑क्ष्ण॒योप॑ दधाति
Sentence: 8    तस्मा॑दक्ष्ण॒या प॒शवो ऽङ्गा॑नि॒ प्र ह॑रन्ति॒ प्रति॑ष्ठित्यै
Sentence: 9    यानि वै॒ छन्दां॑सि सुव॒र्ग्या॒ण्यासन्तैर्दे॒वाः सु॑व॒र्गं लो॒कमा॑यन्
Sentence: 10    तेनर्ष॑यः ।।

Verse: 4
Sentence: 1    अ॑श्राम्यन्
Sentence: 2    ते तपो॑ ऽतप्यन्त
Sentence: 3    तानि॒ तप॑सापश्यन्
Sentence: 4    तेभ्य॑ ए॒ता इष्ट॑का॒ निर्मिमत्।^ अ॑मिमत
Sentence: 5    ।एव॒श्छन्दो॒ वरि॑व॒श्छन्द॒ इति
Sentence: 6    ता उपा॑दधत
Sentence: 7    ताभिर्वै॒ ते सु॑व॒र्गं लो॒कमा॑यन्
Sentence: 8    यदे॒ता इष्ट॑का उप॒दधा॑ति
Sentence: 9    यान्ये॒व छन्दां॑सि सुव॒र्ग्या॑णि तैरे॒व यज॑मानः सुव॒र्गं लो॒कमे॑ति
Sentence: 10    य॒ज्ञेन वै प्र॒जाप॑तिः प्र॒जा अ॑सृजत
Sentence: 11    ता स्तोम॑भागैरे॒वासृ॑जत
Sentence: 12    यत् ।।

Verse: 5
Sentence: 1    स्तोम॑भागा उप॒दधा॑ति प्र॒जा ए॒व तद्यज॑मानः सृजते
Sentence: 2    बृह॒स्पति॒र्वा ए॒तद्य॒ज्ञस्य॒ तेजः॒ सम॑भर॒द्यद्स्तोम॑भागास् ।
Sentence: 3    यत्स्तोम॑भागा उप॒दधा॑ति॒ सते॑जसमे॒वाग्निं चि॑नुते
Sentence: 4    बृह॒स्पति॒र्वा ए॒तां य॒ज्ञस्य॑ प्रति॒ष्ठाम॑पश्य॒द्यत्स्तोम॑भागास् ।
Sentence: 5    यत्स्तोम॑भागा उप॒दधा॑ति य॒ज्ञस्य॒ प्रति॑ष्ठित्यै
Sentence: 6    स॒प्तस॒प्तोप॑ दधाति सवीर्य॒त्वाय
Sentence: 7    ति॒स्रो मध्ये॒ प्रति॑ष्ठित्यै ।।

Paragraph: 6
Verse: 1
Sentence: 1    र॒श्मिरित्ये॒वादि॒त्यम॑सृजत
Sentence: 2    प्रेति॒रिति॒ धर्म॑म्
Sentence: 3    अन्वि॑ति॒रिति॒ दिव॑म् ।
Sentence: 4    सं॒धिरित्य॒न्तरि॑क्षम्
Sentence: 5    प्रति॒धिरिति॑ पृथि॒वीम् ।
Sentence: 6    वि॑ष्ट॒म्भ इति॒ वृष्टि॑म्
Sentence: 7    प्र॒वेत्यह॑र्
Sentence: 8    अनु॒वेति॒ रात्रि॑म्
Sentence: 9    उ॒शिगिति॒ वसू॑न्
Sentence: 10    प्रके॒त इति॑ रु॒द्रान् ।
Sentence: 11    सु॑दी॒तिरित्या॑दि॒त्यान्
Sentence: 12    ओज॒ इति॑ पि॒तॄन् ।
Sentence: 13    तन्तु॒रिति॑ प्र॒जाः
Sentence: 14    पृ॑तना॒षाडिति॑ प॒शून्
Sentence: 15    रे॒वदित्योष॑धीस् ।
Sentence: 16    अ॑भि॒जिद॑सि यु॒क्तग्रा॑वा ।।

Verse: 2
Sentence: 1    इन्द्रा॑य॒ त्वेन्द्रं॑ जि॒न्वेत्ये॒व द॑क्षिण॒तो वज्र॒म्पर्यौ॑हद॒भिजि॑त्यै
Sentence: 2    ताः प्र॒जा अप॑प्राणा असृजत
Sentence: 3    तास्वधि॑पतिर॒सीत्ये॒व प्रा॒णम॑दधात् ।
Sentence: 4    य॒न्तेत्य॑पा॒नम् ।
Sentence: 5    सं॒सर्प॒ इति॒ चक्षु॑स् ।
Sentence: 6    व॑यो॒धा इति॒ श्रोत्र॑म् ।
Sentence: 7    ताः प्र॒जाः प्रा॑ण॒तीर॑पान॒तीः पश्य॑न्तीः शृण्व॒तीर्न मि॑थु॒नी अ॑भवन्
Sentence: 8    तासु॑ त्रि॒वृद॒सीत्ये॒व मि॑थु॒नम॑दधात्
Sentence: 9    ताः प्र॒जा मि॑थु॒नी ।।

Verse: 3
Sentence: 1    भव॑न्ती॒र्न प्राजा॑यन्त
Sentence: 2    ताः सं॑रो॒हो॑ ऽसि नीरो॒हो॒ ऽसीत्ये॒व प्राज॑नयत्
Sentence: 3    ताः प्र॒जाः प्रजा॑ता॒ न प्रत्य॑तिष्ठन्
Sentence: 4    ता व॑सु॒को॑ ऽसि॒ वेष॑श्रिरसि॒ वस्य॑ष्टिर॒सीत्येवै॒षु लो॒केषु॒ प्रत्य॑स्थापयत् ।
Sentence: 5    यदा॑ह
Sentence: 6    वसु॒को॑ ऽसि॒ वेष॑श्रिरसि॒ वस्य॑ष्टिर॒सीति॑ प्र॒जा ए॒व प्रजा॑ता ए॒षु लो॒केषु॒ प्रति॑ ष्ठापयत�
Sentence: 7    सात्मा॒न्तरि॑क्षं रोहति
Sentence: 8    सप्रा॑णो॒ ऽमुष्मिँ॑ लो॒के प्रति॑ तिष्ठति ।
Sentence: 9    अव्य॑र्धुकः प्राणापा॒नाभ्या॑म्भवति॒ य ए॒वं वेद॑ ।।

Paragraph: 7
Verse: 1
Sentence: 1    ना॑क॒सद्भिर्वै दे॒वाः सु॑व॒र्गं लो॒कमा॑यन्
Sentence: 2    तन्ना॑क॒सदां॑ नाकस॒त्त्वम् ।
Sentence: 3    यन्ना॑क॒सद॑ उप॒दधा॑ति नाक॒सद्भि॑रे॒व तद्यज॑मानः सुव॒र्गं लो॒कमे॑ति
Sentence: 4    सुव॒र्गो वै॑ लो॒को नाक॑स् ।
Sentence: 5    यस्यै॒ता उ॑पधी॒यन्ते॒ नास्मा॒ अक॑म्भवति
Sentence: 6    यजमानायत॒नं वै॑ नाक॒सद॑स् ।
Sentence: 7    यन्ना॑क॒सद॑ उप॒दधा॑त्या॒यत॑नमे॒व तद्यज॑मानः कुरुते
Sentence: 8    पृ॒ष्ठानां॒ वा ए॒तत्तेजः॒ सम्भृ॑तं॒ यन्ना॑क॒सद॑स् ।
Sentence: 9    यन्ना॑क॒सदः॑ ।।

Verse: 2
Sentence: 1    उ॑प॒दधा॑ति पृ॒ष्ठाना॑मे॒व तेजो ऽव॑ रुन्द्धे
Sentence: 2    पञ्च॒चोडा॒ उप॑ दधाति ।
Sentence: 3    अ॑प्स॒रस॑ एवैनमे॒ता भू॒ता अ॒मुष्मिँ॑ लो॒क उप॑ शेरे ।
Sentence: 4    अथो॑ तनू॒पानी॑रेवै॒ता यज॑मानस्य
Sentence: 5    यं द्वि॒ष्यात्तमु॑प॒दध॑द्ध्यायेत् ।
Sentence: 6    ए॒ताभ्य॑ एवैनं दे॒वता॑भ्य॒ आ वृ॑श्चति
Sentence: 7    ता॒जगार्ति॒मार्छ॑ति ।
Sentence: 8    उत्त॑रा नाक॒सद्भ्य॒ उप॑ दधाति
Sentence: 9    यथा॑ जा॒यामा॒नीय॑ गृ॒हेषु॑ निषा॒दय॑ति ता॒दृगे॒व तत् ।।

Verse: 3
Sentence: 1    प॒श्चात्प्राची॑मुत्त॒मामुप॑ दधाति॒ तस्मा॑त्प॒श्चात्प्राची॒ पत्न्यन्वा॑स्ते
Sentence: 2    स्वयमातृ॒ण्णां च॑ विक॒र्णीं चो॑त्त॒ मेउप॑ दधाति
Sentence: 3    प्रा॒णो वै॑ स्वयमातृ॒ण्णायु॑र्विक॒र्णी
Sentence: 4    प्रा॒णं चै॒वायु॑श्च प्रा॒णाना॑मुत्तमौ धत्ते
Sentence: 5    तस्मा॑त्प्रा॒णश्चायु॑श्च प्रा॒णाना॑मुत्तमौ
Sentence: 6    नान्यामुत्त॑रा॒मिष्ट॑का॒मुप॑ दध्यात् ।
Sentence: 7    यद॒न्यामुत्त॑रा॒मिष्ट॑कामुपद॒ध्यात्प॑शू॒नाम् ।।

Verse: 4
Sentence: 1    च॒ यज॑मानस्य च प्रा॒णं चायु॒श्चापि॑ दध्यात्
Sentence: 2    तस्मा॒न्नान्योत्त॒रेष्ट॑कोप॒धेया
Sentence: 3    स्वयमातृ॒ण्णामुप॑ दधाति ।
Sentence: 4    असौ वै स्वयमातृ॒ण्णामूमे॒वोप॑ धत्ते ।
Sentence: 5    अश्व॒मुप॑ घ्रापयति प्रा॒णमे॒वास्यां॑ दधाति ।
Sentence: 6    अथो॑ प्राजाप॒त्यो वा अश्वः॑ प्र॒जाप॑तिनै॒वाग्निं चि॑नुते
Sentence: 7    स्वयमातृ॒ण्णा भ॑वति प्रा॒णाना॒मुत्सृ॑ष्ट्या॒ अथो॑ सुव॒र्गस्य॑ लो॒कस्यानु॑ख्यात्यै ।
Sentence: 8    ए॒षा वै॑ दे॒वानां॒ विक्रा॑न्ति॒र्यद्वि॑क॒र्णी
Sentence: 9    यद्वि॑क॒र्णीमु॑प॒दधा॑ति दे॒वाना॑मे॒व विक्रा॑न्ति॒मनु॒ वि क्र॑मते ।
Sentence: 10    उ॑त्तर॒त उप॑ दधाति
Sentence: 11    तस्मा॑दुत्तरतौपचारो॒ ऽग्निस् ।
Sentence: 12    वा॑यु॒मती॑ भवति
Sentence: 13    समि॑द्ध्यै ।।

Paragraph: 8
Verse: 1
Sentence: 1    छन्दां॒स्युप॑ दधाति
Sentence: 2    प॒शवो वै॒ छन्दां॑सि
Sentence: 3    प॒शूने॒वाव॑ रुन्द्धे
Sentence: 4    छन्दां॑सि वै दे॒वानां॑ वा॒मम्प॒शव॑स् ।
Sentence: 5    वा॒ममे॒व प॒शूनव॑ रुन्द्धे ।
Sentence: 6    ए॒तां ह वै य॒ज्ञसे॑नश्चैत्रियाय॒णश्चितिं॑ वि॒दां च॑कार
Sentence: 7    तया वै॒ स प॒शूनवा॑रुन्द्ध
Sentence: 8    यदे॒तामु॑प॒दधा॑ति प॒शूने॒वाव॑ रुन्द्धे
Sentence: 9    गाय॒त्रीः पु॒रस्ता॒दुप॑ दधाति
Sentence: 10    तेजो वै गाय॒त्री
Sentence: 11    तेज॑ ए॒व ।।

Verse: 2
Sentence: 1    मु॑ख॒तो ध॑त्ते
Sentence: 2    मूर्ध॒न्वती॑र्भवन्ति
Sentence: 3    मू॒र्धान॑मेवैनं समा॒नानां॑ करोति
Sentence: 4    त्रि॒ष्टुभ॒ उप॑ दधाति ।
Sentence: 5    इ॑न्द्रि॒यं वै त्रिष्टुग्^त्रि॒ष्टुभ्
Sentence: 6    इन्द्रि॒यमे॒व म॑ध्य॒तो ध॑त्ते
Sentence: 7    जग॑ती॒रुप॑ दधाति
Sentence: 8    जाग॑ता वै प॒शवः
Sentence: 9    प॒शूने॒वाव॑ रुन्द्धे ।
Sentence: 10    अ॑नु॒ष्टुभ॒ उप॑ दधाति
Sentence: 11    प्रा॒णा वा अनु॒ष्टुप्^नु॒ष्टुभ्
Sentence: 12    प्रा॒णाना॒मुत्सृ॑ष्ट्यै
Sentence: 13    बृह॒तीरु॒ष्णिहाः॑ प॒ङ्क्तीर॒क्षर॑पङ्क्ती॒रिति॒ विषु॑रूपाणि॒ छन्दां॒स्युप॑ दधाति
Sentence: 14    विषु॑रूपा वै प॒शवः
Sentence: 15    प॒शवः॑ ।।

Verse: 3
Sentence: 1    छन्दां॑सि
Sentence: 2    विषु॑रूपाने॒व प॒शूनव॑ रुन्द्धे
Sentence: 3    विषु॑रूपमस्य गृ॒हे दृ॑श्यते॒ यस्यै॒ता उ॑पधी॒यन्ते॒ य उ॑ चैना ए॒वं वेद॑ ।
Sentence: 4    अति॑छन्दस॒मुप॑ दधाति ।
Sentence: 5    अति॑छन्दा वै॒ सर्वा॑णि॒ छन्दां॑सि
Sentence: 6    सर्वे॑भिरेवैनं॒ छन्दो॑भिश्चिनुते
Sentence: 7    वर्ष्म॒ वा ए॒षा छन्द॑सां॒ यदति॑छन्दास् ।
Sentence: 8    यतति॑छन्दसमुप॒दधा॑ति॒ वर्ष्मैवैनं समा॒नानां॑ करोति
Sentence: 9    द्वि॒पदा॒ उप॑ दधाति
Sentence: 10    द्वि॒पाद्यज॑मानः
Sentence: 11    प्रति॑ष्ठित्यै ।।

Paragraph: 9
Verse: 1
Sentence: 1    सर्वा॑भ्यो वै दे॒वता॑भ्यो॒ ऽग्निश्ची॑यते
Sentence: 2    {F यत्{W यत् स॒युजो॒ नोप॑द॒ध्याद्दे॒वता॑ अस्या॒ग्निं वृ॑ञ्जीरन्
Sentence: 3    यत्स॒युज॑ उप॒दधा॑त्या॒त्मनैवैनं स॒युजं॑ चिनुते॒ नाग्निना॒ व्यृ॑ध्यते ।
Sentence: 4    अथो॒ यथा॒ पुरु॑षः॒ स्नाव॑भिः॒ संत॑त ए॒वमेवै॒ताभि॑र॒ग्निः संत॑तस् ।
Sentence: 5    अ॒ग्निना वै दे॒वाः सु॑व॒र्गं लो॒कमा॑य॒न्ता अ॒मूः कृत्ति॑का अभवन्
Sentence: 6    यस्यै॒ता उ॑पधी॒यन्ते॑ सुव॒र्गमे॒व ।।

Verse: 2
Sentence: 1    लो॒कमे॑ति॒ गछ॑ति प्रका॒शं चि॒त्रमे॒व भ॑वति
Sentence: 2    मण्डलेष्ट॒का उप॑ दधाति ।
Sentence: 3    इ॒मे वै॑ लो॒का म॑ण्डलेष्ट॒कास् ।
Sentence: 4    इ॒मे खलु वै लो॒का दे॑वपु॒रास् ।
Sentence: 5    दे॑वपु राए॒व प्र वि॑शति॒ नार्ति॒मार्छ॑त्य॒ग्निं चि॑क्या॒नस् ।
Sentence: 6    वि॒श्वज्यो॑तिष॒ उप॑ दधाति ।
Sentence: 7    इ॒मानेवै॒ताभि॑र्लो॒काञ्ज्योति॑ष्मतः कुरुते ।
Sentence: 8    अथो॑ प्रा॒णानेवै॒ता यज॑मानस्य दाध्रति ।
Sentence: 9    ए॒ता वै॑ दे॒वताः॑ सुव॒र्ग्या॑स्
Sentence: 10    ता ए॒वान्वा॒रभ्य॑ सुव॒र्गं लो॒कमे॑ति ।।

Paragraph: 10
Verse: 1
Sentence: 1    वृ॑ष्टि॒सनी॒रुप॑ दधाति
Sentence: 2    वृष्टि॑मे॒वाव॑ रुन्द्धे
Sentence: 3    यदे॑क॒धोप॑द॒ध्यादेक॑मृ॒तुं व॑र्षेत् ।
Sentence: 4    अ॑नुपरि॒हारं॑ सादयति॒ तस्मा॒त्सर्वा॑नृ॒तून्व॑र्षति
Sentence: 5    पुरोवात॒सनि॑र॒सीत्या॑ह ।
Sentence: 6    ए॒तद्वै॒ वृष्ट्यै॑ रू॒पम् ।
Sentence: 7    रू॒पेणै॒व वृष्टि॒मव॑ रुन्द्धे
Sentence: 8    सं॒यानी॑भिर्वै दे॒वा इ॑माँ लो॒कान्त्सम॑युस्
Sentence: 9    तत्सं॒यानी॑नां संयानि॒त्वम् ।
Sentence: 10    यत्सं॒यानी॑रुप॒दधा॑ति॒ यथा॒प्सु ना॒वा सं॒यात्ये॒वम् ।।

Verse: 2
Sentence: 1    एवै॒ताभि॒र्यज॑मान इ॒माँ लो॒कान्त्सं या॑ति
Sentence: 2    प्ल॒वो वा ए॒षो॒ ऽग्नेर्यत्सं॒यानी॑स् ।
Sentence: 3    यत्सं॒यानि॑रुप॒दधा॑ति प्ल॒वमेवै॒तम॒ग्नय॒ उप॑ दधाति ।
Sentence: 4    उ॒त यस्यै॒तासूप॑हिता॒स्वापो॒ ऽग्निं हर॒न्त्यहृ॑त ए॒वास्या॒ग्निस् ।
Sentence: 5    आ॑दित्येष्ट॒का उप॑ दधाति ।
Sentence: 6    आ॑दि॒त्या वा ए॒तम्भूत्यै॒ प्रति॑ नुदन्ते॒ यो ऽल॒म्भूत्यै॒ सन्भूतिं॒ न प्रा॒प्नोति॑ ।
Sentence: 7    आ॑दि॒त्याः ।।

Verse: 3
Sentence: 1    एवैन॒म्भूतिं॑ गमयन्ति ।
Sentence: 2    असौ॒ वा ए॒तस्या॑दि॒त्यो रुच॒मा द॑त्ते॒ यो॒ ऽग्निं चि॒त्वा न रोच॑ते
Sentence: 3    यदा॑दित्येष्ट॒का उ॑प॒दधा॑य॒सावे॒वास्मि॑न्नादि॒त्यो रुचं॑ दधाति
Sentence: 4    यथासौ दे॒वानां॒ रोच॑त ए॒वमेवै॒ष म॑नु॒ष्या॑णां रोचते
Sentence: 5    घृतेष्ट॒का उप॑ दधाति ।
Sentence: 6    ए॒तद्वा अ॒ग्नेः प्रि॒यं धाम॒ यद्घृ॒तम्
Sentence: 7    प्रि॒येणैवैनं॒ धाम्ना॒ सम॑र्धयति ।।

Verse: 4
Sentence: 1    अथो॒ तेज॑सा ।
Sentence: 2    अ॑नुपरि॒हारं॑ सादयति ।
Sentence: 3    अप॑रिवर्गमे॒वास्मि॒न्तेजो॑ दधाति
Sentence: 4    प्र॒जाप॑तिर॒ग्निम॑चिनुत
Sentence: 5    स यश॑सा॒ व्या॑र्ध्यत
Sentence: 6    स ए॒ता य॑शो॒दा अ॑पश्यत्
Sentence: 7    ता उपा॑धत्त
Sentence: 8    ताभिर्वै॒ स यश॑ आ॒त्मन्न॑धत्त
Sentence: 9    यद्य॑शो॒दा उ॑प॒दधा॑ति॒ यश॑ ए॒व ताभि॒र्यज॑मान आ॒त्मन्ध॑त्ते
Sentence: 10    पञ्चोप॑ दधाति
Sentence: 11    पाङ्क्तः॒ पुरु॑षस् ।
Sentence: 12    यावा॑ने॒व पुरु॑ष॒स्तस्मि॒न्यशो॑ दधाति ।।

Paragraph: 11
Verse: 1
Sentence: 1    दे॑वासु॒राः संय॑त्ता आसन्
Sentence: 2    कनी॑यांसो दे॒वा आस॒न्भूयां॒सो ऽसु॑रास्
Sentence: 3    ते दे॒वा ए॒ता इष्ट॑का अपश्यन्
Sentence: 4    ता उपा॑दधत
Sentence: 5    भूय॒स्कृद॒सीत्ये॒व भूयां॑सो ऽभव॒न्वन॒स्पति॑भि॒रोष॑धीभिस् ।
Sentence: 6    व॑रिव॒स्कृद॒सीती॒माम॑जयन्
Sentence: 7    प्राच्य॒सीति॒ प्राचीं॒ दिश॑मजयन् ।
Sentence: 8    ऊ॒र्ध्वासीत्य॒मूम॑जयन् ।
Sentence: 9    अ॑न्तरिक्ष॒सद॑स्य॒न्तरि॑क्षे सी॒देत्य॒न्तरि॑क्षमजयन्
Sentence: 10    ततो॑ दे॒वा अभ॑वन् ।।

Verse: 2
Sentence: 1    परासु॑रास् ।
Sentence: 2    यस्यै॒ता उ॑पधी॒यन्ते॒ भूया॑ने॒व भ॑वति ।
Sentence: 3    अ॒भीमाँ लो॒काञ्ज॑यति
Sentence: 4    भव॑त्या॒त्मना॒ परा॑स्य॒ भ्रातृ॑व्यो भवति ।
Sentence: 5    अ॑प्सु॒षद॑सि श्येन॒सद॒सीत्या॑ह ।
Sentence: 6    ए॒तद्वा अ॒ग्ने रू॒पम् ।
Sentence: 7    रू॒पेणै॒वाग्निमव॑ रुन्द्धे
Sentence: 8    पृथि॒व्यास्त्वा॒ द्रवि॑णे सादया॒मीत्या॑ह ।
Sentence: 9    इ॒मानेवै॒ताभि॑र्लो॒कान्द्रवि॑णावतः कुरुते ।
Sentence: 10    आ॑यु॒ष्या॒ उप॑ दधाति ।
Sentence: 11    आयु॑रे॒व ।।

Verse: 3
Sentence: 1    अ॑स्मिन्दधाति ।
Sentence: 2    अग्ने॒ यत्ते॒ परं॒ हृन्नामेत्या॑ह ।
Sentence: 3    ए॒तद्वा अ॒ग्नेः प्रि॒यं धाम
Sentence: 4    प्रि॒यमे॒वास्य॒ धामोपाप्नो॑ति
Sentence: 5    तावेहि॒ सं र॑भावहा॒ इत्या॑ह
Sentence: 6    व्येवैनेन॒ परि॑ धत्ते
Sentence: 7    पाञ्च॑जन्ये॒ष्वप्ये॑ध्यग्न॒ इत्या॑ह ।
Sentence: 8    ए॒ष वा अ॒ग्निः पाञ्च॑जन्यो॒ यः पञ्च॑चितीकस्
Sentence: 9    तस्मा॑दे॒वमा॑ह ।
Sentence: 10    ऋ॑त्व॒या॒ उप॑ दधाति ।
Sentence: 11    ए॒तद्वा ऋ॑तू॒नाम्प्रि॒यं धाम॒ यदृ॑त॒व्या॑स् ।
Sentence: 12    ऋ॑तू॒नामे॒व प्रि॒यं धामाव॑ रुन्द्धे
Sentence: 13    सु॒मेक॒ इत्या॑ह
Sentence: 14    संवत्स॒रो वै॑ सु॒मेकः
Sentence: 15    संवत्स॒रस्यै॒व प्रि॒यं धामोपा॑प्नोति ।।

Paragraph: 12
Verse: 1
Sentence: 1    प्र॒जाप॑ते॒रक्ष्य॑श्वयत्
Sentence: 2    तत्परा॑पतत्
Sentence: 3    तदश्वो॑ ऽभवत् ।
Sentence: 4    यदश्व॑य॒त्तदश्व॑स्याश्व॒त्वम् ।
Sentence: 5    तद्दे॒वा अ॑श्वमे॒धेनै॒व प्रत्य॑दधुस् ।
Sentence: 6    ए॒ष वै॑ प्र॒जाप॑तिं॒ सर्वं॑ करोति॒ यो॑ ऽश्वमे॒धेन॒ यज॑ते
Sentence: 7    सर्व॑ ए॒व भ॑वति
Sentence: 8    सर्व॑स्य॒ वा ए॒षा प्राय॑श्चित्तिः॒ सर्व॑स्य भेष॒जम् ।
Sentence: 9    सर्वं॒ वा ए॒तेन॑ पा॒प्मानं॑ दे॒वा अ॑तरन् ।
Sentence: 10    अपि वाए॒तेन॑ ब्रह्मह॒त्याम॑तरन् ।
Sentence: 11    सर्व॑म्पा॒प्मान॑म् ।।

Verse: 2
Sentence: 1    त॑रति॒ तर॑ति ब्रह्मह॒त्यां यो॑ ऽश्वमे॒धेन॒ यज॑ते॒ य उ॑ चैनमे॒वं वेद॑ ।
Sentence: 2    उत्त॑रं वै॒ तत्प्र॒जाप॑ते॒रक्ष्य॑श्वयत्
Sentence: 3    तस्मा॒दश्व॑स्योत्तर॒तो ऽव॑ द्यन्ति दक्षिण॒तो॒ ऽन्येषा॑म्पशू॒नाम् ।
Sentence: 4    वै॑त॒सः कटो॑ भवति ।
Sentence: 5    अ॒प्सुयो॑नि॒र्वा अश्व॑स् ।
Sentence: 6    अ॑प्सु॒जो वे॑त॒सः
Sentence: 7    स्व एवैनं॒ योनौ॒ प्रति॑ ष्ठापयति
Sentence: 8    चतुष्टो॒म स्तोमो॑ भवति
Sentence: 9    स॒रड्ढ॒ वा अश्व॑स्य॒ सक्थ्यावृ॑हत्
Sentence: 10    तद्दे॒वाश्च॑तुष्टो॒मेनै॒व प्रत्य॑दधुस् ।
Sentence: 11    यच्च॑तुष्टो॒म स्तोमो॒ भव॒त्यश्व॑स्य सर्व॒त्वाय॑ ।।

This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.