TITUS Texts: White Yajur-Veda: Vajasaneyi-Samhita (Madhyandina)

TITUS
White Yajur-Veda: Vajasaneyi-Samhita (Madhyandina)
Part No. 22

Paragraph: 22
Verse: 1
Sentence: a    तेजो॑ सि शु॒क्रम॒मृत॑मायु॒ष्पा आयु॑र्मे पाहि ।
Sentence: b    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: c    आ द॑दे ।।

Verse: 2
Sentence: a    इ॒माम॑गृभ्णन्रश॒नामृ॒तस्य॒ पूर्व॒ आयु॑षि वि॒दथे॑षु क॒व्या ।
Sentence: b    सा नो॑ अ॒स्मिन्त्सु॒त आ ब॑भूव ऋ॒तस्य॒ साम॑न्त्स॒रमा॒रप॑न्ती ।।

Verse: 3
Sentence: a    अ॑भि॒धा अ॑सि॒ भुव॑नमसि य॒न्तासि॑ ध॒र्ता ।
Sentence: b    स त्वम॒ग्निं वै॑श्वान॒रँ सप्र॑थसं गच्छ॒ स्वाहा॑कृतः ।।

Verse: 4
Sentence: a    स्व॒गा त्वा॑ दे॒वेभ्यः॑ प्र॒जाप॑तये॒ ब्रह्म॒न्नश्वं॑ भ॒न्त्स्यामि॑ दे॒वेभ्यः॑ प्र॒जाप॑तये॒ तेन॑ राध्यासम् ।
Sentence: b    तं ब॑धान दे॒वेभ्यः॑ प्र॒जाप॑तये॒ तेन॑ राध्नुहि ।।

Verse: 5
Sentence: a    प्र॒जाप॑तये त्वा॒ जुष्टं॒ प्रोक्षा॑मि ।
Sentence: b    इन्द्रा॒ग्निभ्यां॑ त्वा॒ जुष्टं॒ प्रोक्षा॑मि ।
Sentence: c    वा॒यवे॑ त्वा॒ जुष्टं॒ प्रोक्षा॑मि ।
Sentence: d    विश्वे॑भ्यस्त्वा दे॒वेभ्यो॒ जुष्टं॒ प्रोक्षा॑मि ।
Sentence: e    सर्वे॑भ्यस्त्वा दे॒वेभ्यो॒ जुष्टं॒ प्रोक्षा॑मि ।
Sentence: f    यो अर्व॑न्तं॒ जिघाँ॑सति॒ तम॒भ्य॑मीति॒ वरु॑णः प॒रो मर्तः॑ प॒रः श्वा ।।

Verse: 6
Sentence: a    अ॒ग्नये॒ स्वाहा॑ ।
Sentence: b    सोमा॑य॒ स्वाहा॑ ।
Sentence: c    अ॒पां मोदा॑य॒ स्वाहा॑ ।
Sentence: d    स॑वि॒त्रे स्वाहा॑ ।
Sentence: e    वा॒यवे॒ स्वाहा॑ ।
Sentence: f    विष्ण॑वे॒ स्वाहा॑ ।
Sentence: g    इन्द्रा॑य॒ स्वाहा॑ ।
Sentence: h    बृह॒स्पत॑ये॒ स्वाहा॑ ।
Sentence: i    मि॒त्राय॒ स्वाहा॑ ।
Sentence: j    वरु॑णाय॒ स्वाहा॑ ।।

Verse: 7
Sentence: a    हि॑ङ्का॒राय॒ स्वाहा॒ हिङ्कृ॑ताय॒ स्वाहा॒ क्रन्द॑ते॒ स्वाहा॑वक्र॒न्दाय॒ स्वाहा॒ प्रोथ॑ते॒ स्वाहा॑ प्रप्रो॒थाय॒ स्वाहा॑ ग॒न्धाय॒ स्वाहा॑ घ्रा॒ताय॒ स्वाहा॒ निवि॑ष्टाय॒ स्वाहोप॑विय॒ स्वाहा॒ संदि॑ताय॒ स्वाहा॒ वल्ग॑ते॒ स्वाहासी॑नाय॒ स्वाहा॑ शयानाय॒ स्वाहा॒ स्वप॑ते॒ स्वाहा॒ जाग्र॑ते॒ स्वाहा॒ कूज॑ते॒ स्वाहा॒ प्रबु॑द्धाय॒ स्वाहा॑ वि॒जृम्भ॑माणाय॒ स्वाहा॒ विचृ॑ताय॒ स्वाहा॒ सँहा॑नाय॒ स्वाहोप॑स्थिताय॒ स्वाहाय॑नाय॒ स्वाहा॒ प्राय॑णाय॒ स्वाहा॑ ।।

Verse: 8
Sentence: a    य॒ते स्वाहा॒ धाव॑ते॒ स्वाहो॑द्द्रा॒वाय॒ स्वाहोद्द्रु॑ताय॒ स्वाहा॑ शूका॒राय॒ स्वाहा॒ शूकृ॑ताय॒ स्वाहा॒ निष॑णाय॒ स्वाहोत्थि॑ताय॒ स्वाहा॑ ज॒वाय॒ स्वाहा॒ बला॑य॒ स्वाहा॑ वि॒वर्त॑मानाय॒ स्वाहा॒ विवृ॑त्ताय॒ स्वाहा॑ विधून्वा॒नाय॒ स्वाहा॒ विधू॑ताय॒ स्वाहा॒ शुश्रू॑षमाणाय॒ स्वाहा॑ शृण्व॒ते स्वाहेक्ष॑माणाय॒ स्वाहे॑क्षि॒ताय॒ स्वाहा॒ वी॑क्षिताय॒ स्वाहा॑ निमे॒षाय॒ स्वाहा॒ यदत्ति॒ तस्मै॒ स्वाहा॒ यत्पिब॑ति॒ तस्मै॒ स्वाहा॒ यन्मूत्रं॑ क॒रोति॒ तस्मै॒ स्वाहा॑ कुर्व॒ते स्वाहा॑ कृ॒ताय॒ स्वाहा॑ ।।

Verse: 9
Sentence: a    तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि ।
Sentence: b    धियो॒ यो नः॑ प्रचो॒दय॑त् ।।

Verse: 10
Sentence: a    हिर॑ण्यपाणिमू॒तये॑ सवि॒तार॒मुप॑ ह्वये ।
Sentence: b    स चेत्ता॑ दे॒वता॑ प॒दम् ।।

Verse: 11
Sentence: a    दे॒वस्य॒ चेत॑तो म॒हीं प्र स॑वि॒तुर्ह॑वामहे ।
Sentence: b    सु॑म॒तिँ स॒त्यरा॑धसम् ।।

Verse: 12
Sentence: a    सु॑ष्टु॒तिँ सु॑मती॒वृधो॑ रा॒तिँ स॑वि॒तुरी॑महे ।
Sentence: b    प्र दे॒वाय॑ मती॒विदे॑ ।।

Verse: 13
Sentence: a    रा॒तिँ सत्प॑तिं म॒हे स॑वि॒तार॒मुप॑ ह्वये ।
Sentence: b    आ॑स॒वं दे॒ववी॑तये ।।

Verse: 14
Sentence: a    दे॒वस्य॑ सवि॒तुर्म॒तिमा॑स॒वं वि॒श्वदे॑व्यम् ।
Sentence: b    धि॒या भगं॑ मनामहे ।।

Verse: 15
Sentence: a    अ॒ग्निँ स्तोमे॑न बोधय समिधा॒नो अम॑र्त्यम् ।
Sentence: b    ह॒व्या दे॒वेषु॑ नो दधत् ।।

Verse: 16
Sentence: a    स ह॑व्य॒वाडम॑र्त्य उ॒शिग्दू॒तश्चनो॑हितः ।
Sentence: b    अ॒ग्निर्धि॒या समृ॑ण्वति ।।

Verse: 17
Sentence: a    अ॒ग्निं दू॒तं पु॒रो द॑धे हव्य॒वाह॒मुप॑ ब्रुवे ।
Sentence: b    दे॒वाँ आ सा॑दयादि॒ह ।।

Verse: 18
Sentence: a    अजी॑जनो॒ हि प॑वमान॒ सूर्यं॑ वि॒धारे॒ शक्म॑ना॒ पयः॑ ।
Sentence: b    गोजी॑रया॒ रँह॑माणः॒ पुर॑न्ध्या ।।

Verse: 19
Sentence: a    वि॒भूर्मा॒त्रा प्र॒भूः पि॒त्राश्वो॑ सि॒ हयो॒ स्यत्यो॑ सि॒ मयो॒ स्यर्वा॑सि॒ सप्ति॑रसि वा॒ज्य॑सि॒ वृषा॑सि नृ॒मणा॑ असि ।
Sentence: b    ययु॒र्नामा॑सि॒ शिशु॒र्नामा॑स्यादि॒त्यानां॒ पत्वान्वि॑हि ।
Sentence: c    देवा॑ आशापाला ए॒तं दे॒वेभ्यो श्वं॒ मेधा॑य॒ प्रोक्षि॑तँ रक्षत् ।
Sentence: d    इ॒ह रन्तिः॑ ।
Sentence: e    इ॒ह र॑मताम् ।
Sentence: f    इ॒ह धृतिः॑ ।
Sentence: g    इ॒ह स्वधृ॑तिः॒ स्वाहा॑ ।।

Verse: 20
Sentence: a    काय॒ स्वाहा॒ कस्मै॒ स्वाहा॑ कत॒मस्मै॒ स्वाहा॒ स्वाहा॒धिमाधी॑ताय॒ स्वाहा॒ मनः॑ प्र॒जाप॑तये॒ स्वाहा॑चि॒त्तं विज्ञा॑ता॒यादि॑त्यै॒ स्वाहादि॑त्यै मह्यै॒ स्वाहादि॑त्यै सुमृडी॒कायै॒ स्वाहा॒ सर॑स्वत्यै॒ स्वाहा॒ सर॑स्वत्यै पाव॒कायै॒ स्वाहा॒ सर॑स्वत्यै बृहत्यै॒ स्वाहा॑ पू॒ष्णे स्वाहा॑ पू॒ष्णे प्र॑प॒थ्या॑य॒ स्वाहा॑ पू॒ष्णे न॒रंधि॑षाय॒ स्वाहा॒ त्वष्ट्रे॒ स्वाहा॒ त्वष्ट्रे॑ तु॒रीपा॑य॒ स्वाहा॒ त्वष्ट्रे॑ पुरु॒रूपा॑य॒ स्वाहा॒ विष्ण॑वे॒ स्वाहा॒ विष्ण॑वे निभूय॒पाय॒ स्वाहा॒ विष्ण॑वे शिपिवि॒ष्टाय॒ स्वाहा॑ ।।

Verse: 21
Sentence: a    विश्वो॑ दे॒वस्य॑ ने॒तुर्मर्तो॑ वुरीत स॒ख्यम् ।
Sentence: b    विश्वो॑ रा॒य इ॑षुध्यति द्यु॒म्नं वृ॑णीत पु॒ष्यसे॒ स्वाहा॑ ।।

Verse: 22
Sentence: a    आ ब्रह्म॑न्ब्राह्म॒णो ब्र॑ह्मवर्च॒सी जा॑यता॒मा रा॒ष्ट्रे रा॑ज॒न्यः॒ शूर॑ इष॒व्यो॑ तिव्या॒धी म॑हार॒थो जा॑यतां॒ दोग्ध्री॑ धे॒नुर्वोढा॑न॒ड्वाना॒शुः सप्तिः॒ पुरं॑धि॒र्योषा॑ जि॒ष्णू र॑थे॒ष्ठाः स॒भेयो॒ युवास्य यज॑मानस्य वी॒रो जा॑यतां॒ निका॑मेनिकामे नः प॒र्जन्यो॑ वर्षतु॒ पल॑वत्यो न॒ ओष॑धयः पच्यन्तां योगक्षे॒मो नः॑ कल्पताम् ।।

Verse: 23
Sentence: a    प्रा॒णाय॒ स्वाहा॑पा॒नाय॒ स्वाहा॑ व्या॒नाय॒ स्वाहा॒ चक्षु॑षे॒ स्वाहा॒ श्रोत्रा॑य॒ स्वाहा॑ वा॒चे स्वाहा॒ मन॑से॒ स्वाहा॑ ।।

Verse: 24
Sentence: a    प्राच्यै॑ दि॒शे स्वाहा॒र्वाच्यै॑ दि॒शे स्वाहा॒ दक्षि॑णायै दि॒शे स्वाहा॒र्वाच्यै॑ दि॒शे स्वाहा॑ प्र॒तीच्यै॑ दि॒शे स्वाहा॒र्वाच्यै॑ दि॒शे स्वाहोदी॑च्यै दि॒शे स्वाहा॒र्वाच्यै॑ दि॒शे स्वाहो॒र्ध्वायै॑ दि॒शे स्वाहा॒र्वाच्यै॑ दि॒शे स्वाहावा॑च्यै दि॒शे स्वाहा॒र्वाच्यै॑ दि॒शे स्वाहा॑ ।।

Verse: 25
Sentence: a    अ॒द्भ्यः स्वाहा॑ वा॒र्भ्यः स्वाहो॑द॒काय॒ स्वाहा॒ तिष्ठ॑न्तीभ्यः॒ स्वाहा॒ स्रव॑न्तीभ्यः॒ स्वाहा॒ स्यन्द॑मानाभ्यः॒ स्वाहा॒ कूप्या॑भ्यः॒ स्वाहा॒ सूद्या॑भ्यः॒ स्वाहा॒ धार्या॑भ्यः॒ स्वाहा॑र्ण॒वाय॒ स्वाहा॑ समु॒द्राय॒ स्वाहा॑ सरि॒राय॒ स्वाहा॑ ।।

Verse: 26
Sentence: a    वाता॑य॒ स्वाहा॑ धू॒माय॒ स्वाहा॒भ्राय॒ स्वाहा॑ मे॒घाय॒ स्वाहा॑ वि॒द्योत॑मानाय॒ स्वाहा॑ स्त॒नय॑ते॒ स्वाहा॑व॒स्पूर्ज॑ते॒ स्वाहा॒ वर्ष॑ते॒ स्वाहा॑व॒वर्ष॑ते॒ स्वाहो॒द्रं वर्ष॑ते॒ स्वाहा॑ शी॒घ्रं वर्ष॑ते॒ स्वाहो॑द्गृह्ण॒ते स्वाहोद्गृ॑हीताय॒ स्वाहा॑ प्रुष्ण॒ते स्वाहा॑ शीकाय॒ते स्वाहा॒ प्रुष्वा॑भ्यः॒ स्वाहा॑ ह्रा॒दुनी॑भ्यः॒ स्वाहा॑ नीहा॒राय॒ स्वाहा॑ ।।

Verse: 27
Sentence: a    अ॒ग्नये॒ स्वाहा॒ सोमा॑य॒ स्वाहेन्द्रा॑य॒ स्वाहा॑ पृथिव्यै॒ स्वाहा॒न्तरि॑क्षाय॒ स्वाहा॑ दि॒वे स्वाहा॑ दि॒ग्भ्यः स्वाहाशा॑भ्यः॒ स्वाहोर्व्यै दि॒शे स्वाहा॒र्वाच्यै॑ दि॒शे स्वाहा॑ ।।

Verse: 28
Sentence: a    नक्ष॑त्रेभ्यः॒ स्वाहा॑ नक्ष॒त्रिये॑भ्यः॒ स्वाहा॑होरा॒त्रेभ्यः॒ स्वाहा॑र्धमा॒सेभ्यः॒ स्वाहा॒ मासे॑ब्न्ह्यः॒ स्वाहा॑ ऋ॒तुभ्यः॒ स्वाहा॑र्त॒वेभ्यः॒ स्वाहा॑ संवत्स॒राय॒ स्वाहा॒ द्यावा॑पृथि॒वीभ्याँ॒ स्वाहा॑ च॒न्द्राय॒ स्वाहा॒ सूर्या॑य॒ स्वाहा॑ र॒श्मिभ्यः॒ स्वाहा॒ वसु॑भ्यः॒ स्वाहा॑ रु॒द्रेभ्यः॒ स्वाहा॑दि॒त्येभ्यः॒ स्वाहा॑ म॒रुद्भ्यः॒ स्वाहा॒ विश्वे॑भ्यो दे॒वेभ्यः॒ स्वाहा॒ मूले॑भ्यः॒ स्वाहा॒ शाखा॑भ्यः॒ स्वाहा॒ वन॒स्पति॑भ्यः॒ स्वाहा॒ पुष्पे॑भ्यः॒ स्वाहा॒ पले॑भ्यः॒ स्वाहौ॑षधीभ्यः॒ स्वाहा॑ ।।

Verse: 29
Sentence: a    पृ॑थिव्यै॒ स्वाहा॒न्तरि॑क्षाय॒ स्वाहा॑ दि॒वे स्वाहा॒ सूर्या॑य॒ स्वाहा॑ च॒न्द्राय॒ स्वाहा॒ नक्ष॑त्रेभ्यः॒ स्वाहा॒द्भ्यः स्वाहौ॑षधीभ्यः॒ स्वाहा॒ वन॒स्पति॑भ्यः॒ स्वाहा॑ परिप्ल॒वेभ्यः॒ स्वाहा॑ चराच॒रेभ्यः॒ स्वाहा॑ सरीसृ॒पेभ्यः॒ स्वाहा॑ ।।

Verse: 30
Sentence: a    अस॑वे॒ स्वाहा॒ वस॑वे॒ स्वाहा॑ वि॒भुवे॒ स्वाहा॒ विव॑स्वते॒ स्वाहा॑ गण॒श्रिये॒ स्वाहा॑ ग॒णप॑तये॒ स्वाहा॑भि॒भुवे॒ स्वाहाधि॑पतये॒ स्वाहा॑ शू॒षाय॒ स्वाहा॑ सँस॒र्पाय॒ स्वाहा॑ च॒न्द्राय॒ स्वाहा॒ ज्योति॑षे॒ स्वाहा॑ मलिम्लु॒चाय॒ स्वाहा॒ दिवा॑ प॒तय॑ते॒ स्वाहा॑ ।।

Verse: 31
Sentence: a    मध॑वे॒ स्वाहा॒ माध॑वाय॒ स्वाहा॑ शु॒क्राय॒ स्वाहा॒ शुच॑ये॒ स्वाहा॒ नभ॑से॒ स्वाहा॑ नभ॒स्या॑य॒ स्वाहा॑हे॒षाय॒ स्वाहो॒र्जाय॒ स्वाहा॒ सह॑से॒ स्वाहा॑ सह॒स्या॑य॒ स्वाहा॒ तप॑से॒ स्वाहा॑ तप॒स्या॑य॒ स्वाहाँ॑हसस्प॒तये॒ स्वाहा॑ ।।

Verse: 32
Sentence: a    वाजा॑य॒ स्वाहा॑ प्रस॒वाय॒ स्वाहा॑पि॒जाय॒ स्वाहा॒ क्रत॑वे॒ स्वाहा॒ स्वः॒ स्वाहा॑ मू॒र्ध्ने स्वाहा॑ व्यश्नु॒विने॒ स्वाहान्त्या॑य॒ स्वाहान्त्या॑य भौव॒नाय॒ स्वाहा॒ भुव॑नस्य॒ पत॑ये॒ स्वाहाधि॑पतये॒ स्वाहा॑ प्र॒जाप॑तये॒ स्वाहा॑ ।।

Verse: 33
Sentence: a    आयु॑र्य॒ज्ञेन॑ कल्पताँ॒ स्वाहा॑ प्रा॒णो य॒ज्ञेन॑ कल्पताँ॒ स्वाहा॑पा॒नो य॒ज्ञेन॑ कल्पताँ॒ स्वाहा॑ व्या॒नो य॒ज्ञेन॑ कल्पताँ॒ स्वाहो॑दा॒नो य॒ज्ञेन॑ कल्पताँ॒ स्वाहा॑ समा॒नो य॒ज्ञेन॑ कल्पताँ॒ स्वाहा॒ चक्षु॑र्य॒ज्ञेन॑ कल्पताँ॒ स्वाहा॒ श्रोत्रं॑ य॒ज्ञेन॑ कल्पताँ॒ स्वाहा॒ वाग्य॒ज्ञेन॑ कल्पताँ॒ स्वाहा॒ मनो॑ य॒ज्ञेन॑ कल्पताँ॒ स्वाहा॒त्मा य॒ज्ञेन॑ कल्पताँ॒ स्वाहा॑ ब्र॒ह्मा य॒ज्ञेन॑ कल्पताँ॒ स्वाहा॒ ज्योति॑र्य॒ज्ञेन॑ कल्पताँ॒ स्वाहा॒ स्व॑र्य॒ज्ञेन॑ कल्पताँ॒ स्वाहा॑ पृ॒ष्ठं य॒ज्ञेन॑ कल्पताँ॒ स्वाहा॑ य॒ज्ञो य॒ज्ञेन॑ कल्पताँ॒ स्वाहा॑ ।।

Verse: 34
Sentence: a    एक॑स्मै॒ स्वाहा॒ द्वाभ्याँ॒ स्वाहा॑ श॒ताय॒ स्वाहै॑कशताय॒ स्वाहा॒ व्यु॑ष्ट्यै॒ स्वाहा॑ स्व॒र्गाय॒ स्वाहा॑ ।।

This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.