TITUS
Movses Kalankatowaci, Patmowtiwn Alowanic Asxarhi
Part No. 72
Previous part

Chapter: 42  
Page: 293  
Line: 13 
ԳԼՈՒԽ ՜ԽԲ.

Line: 14  Խորհուրդ մեծ իշխանին Հոնաց Իլիթուերոյ ընդ նախարարս
Line: 15  իւր, զի եպիսկոպոսն Իսրայէլ առ նոսա մնասցէ
Line: 16  ՛ի հաստատել անդ զաթոռ հայրապետութեան։


Line: 17       Մտանէ մեծ իշխանն Հոնաց ընդ ամենայն
Line: 18    մեծամեծս եւ նախարարս իւրոյ տէրութեան ՛ի
Line: 19    խորհուրդ բարի եւ ասէ. "Խաւար ուրեմն տգիտական
Line: 20    մթացուցիչ հոգւոց զմեօք պարփակեալ
Line: 21    ունէր ՛ի վաղընջուց, որով նկատել ոչ կարէաք
Line: 22    զարդարութեան զլոյսն բոլոր տիեզերաց։ Արդ
Line: 23    Տէր մեր Յիսուս Քրիստոս առաքեաց առ մեզ
Line: 24    քաղցրութեամբ իւրով առաջնորդ կենաց զայս
Page: 294   Line: 1    եպիսկոպոս, որ բանիւք եւ գործովք կշտամբեալ
Line: 2    յանդիմանեաց զանօրէնութիւնս մեր եւ ետ մեզ
Line: 3    ճանաչել զամենաստեղծն Աստուած եւ զսքանչելահրաշ
Line: 4    նորա զօրութիւնն, որում ամենեւին իսկ
Line: 5    միտք իմ ճշմարիտ հաւատացեալ վկայեաց. եւ
Line: 6    ահա հաւատացաք ՛ի մի Աստուած՝ արարիչ երկնի
Line: 7    եւ երկրի։ Օրինակ բերցուք մեզ զամենայն
Line: 8    աշխարհս, հաւանեալս այսմ հաւատոյ եւ զմեծ
Line: 9    թագաւորութիւնն Հռովմայեցւոց։ Քանզի թագաւոր
Line: 10    ոմն եղեալ ասեն՝ անուն Կոստանդիանոս, որ
Line: 11    զԿոստանդնուպօլիսն շինեաց. առաջին զնա ասեն
Line: 12    լեալ քրիստոնեայ թագաւորութեանն այնմիկ եւ
Line: 13    այնչափ հաւատարիմ եղեալ այր, որ հրեշտակ
Line: 14    Աստուծոյ կայր ՛ի սպասու նմա. եւ այսու հաւատով
Line: 15    հզօր յաղթութեամբ զամենայն թշնամիսն
Line: 16    իւր կործանեաց։ Արդ եթէ ՛ի ձեռն քրիստոսական
Line: 17    հաւատոցն այնպէս փառաւոր եւ յաղթող
Line: 18    մարթ է մեզ լինել՝ մեք զի՞ յեղգասցուք հաւատալ
Line: 19    յԱստուած կենդանի։ Ահա ուսուցիչ պատգամացն
Line: 20    Աստուծոյ այրս այս Իսրայէլ եպիսկոպոս.
Line: 21    եկայք աղաչեսցուք զսա, զի կացցէ յաշխարհիս
Line: 22    մերում եւ լուսաւորեսցէ զմեզ"։ Զայսոսիկ
Line: 23    միաբանութեամբ խորհեալ՝ յղէ նա առ
Line: 24    եպիսկոպոսն Իսրայէլ զաւագ ոմն իշխան՝ անուն
Line: 25    Աւչի, այր զօրաւոր, որ թարխանութեան ունէր
Line: 26    զպատիւ եւ զսենեկապետն Զաթկասար. եւ նոքա ՛ի
Line: 27    գալն առ նա պատմեն զխորհրդոյն զօրութիւն,
Page: 295   Line: 1    եթէ ասաց մեծ իշխանն Հոնաց եւ ամենայն մեծամեծքն.
Line: 2    "հայր մեր՝ ծանեաք զարարիչն մեր ՛ի
Line: 3    ձեռն քո եւ հաւատացեալ երկրպագեմք միշտ սրբոյ
Line: 4    Երրորդութեանն. աղաչեմք զքո սրբութիւնդ,
Line: 5    զի հաւանեսցիս լինել մեզ տեսուչ եւ վարդապետ՝
Line: 6    կանգնելով ՛ի Վարաչան քաղաքիս մերում
Line: 7    զաթոռ հայրապետական. եւ յուխտ Տեառն մտից
Line: 8    ես Իլիթուեր ընդ քեզ. զամենայն հեթանոսական
Line: 9    պաշտամունս բնաջինջ խլեցից յերեսաց Հոնաց
Line: 10    երկրիս. զկախարդասար քաղդեայս, որ ոչ գան
Line: 11    ՛ի հաւատս՝ հրով այրեցից. եւ անձն, որ հեթանոսաբար
Line: 12    շրջիցի յաշխարհիս իմում կամ գաղտ
Line: 13    կռոց զոհեսցէ, սատակեցից զնա սրով։ Եւ յառաջ
Line: 14    եղիցի նոյն ինքն աստուածպաշտութիւնն, եւ
Line: 15    քարոզեսցին անպատում պարգեւքն Քրիստոսի"։
Line: 16    Եւ պատասխանեալ ասէ ցնսա. "Ոչ է իմ այդ
Line: 17    կարողութիւն առնել անձամբ առանց մեծի հայրապետին
Line: 18    Աղուանից սրբոյն Եղիազարու. զի նորա
Line: 19    է այդ իշխանութիւնդ եւ ես վիճակ ունիմ բարեկարգ,
Line: 20    զիա՞րդ մարթացայց թողուլ զհօտ իմ,
Line: 21    զոր Աստուած շնորհեաց ինձ հովուել. այլ Տէր
Line: 22    Յիսուս ըստ մարդասիրութեանն իւրոյ զձեզ հոգասցէ
Line: 23    աճեցուսցէ եւ օրհնեսցէ, եւ տացէ ձեզ ըստ
Line: 24    հաւատոց ձերոց հովիւ ՛ի տեսաւորել աւետարանաւն
Line: 25    Քրիստոսի"։ Եւ երկրորդեալ եւ երրորդեալ
Line: 26    պատգամացն՝ զնոյնն ասէին բանս։ Եւ
Line: 27    եպիսկոպոսն ասէ. "թոյլ տուք այժմ մինչեւ
Page: 296   Line: 1    շնորհեսցէ ինձ Աստուած երթալ յաշխարհն իմ
Line: 2    առ բարեպաշտ որդեակն իմ Վարազ Տրդատ՝ իշխանն
Line: 3    Աղուանից, եւ առ սուրբ կաթուղիկոսն.
Line: 4    եթէ Աստուծոյ եւ նոցա հաճոյ թուեսցի՝ կատարեսցէ
Line: 5    Աստուած զբանդ զայդ, ոչ է վասն իմ
Line: 6    պատիւդ այդ, զոր խոստանայք. այլ եթէ չարահնար
Line: 7    տանջանօք ՛ի ձէնջ տանջիմ, փառս եւ պատիւ
Line: 8    ինձ զայն համարիմ՝ վասն Տեառն խընդամիտ
Line: 9    յոյժ լինելով. բայց պարտ է ձեզ զայդ
Line: 10    խորհուրդ մտածութեան գրով ծանուցանել առ
Line: 11    համօրէն աշխարհն Աղուանից եւ առ հայրապետն
Line: 12    Եղիազար, որ ՛ի սրբոյն Եղիշէէ մինչեւ ցայսօր
Line: 13    արեւելից հիւսիսականաց միայն վիճակեալ է յառաքելական
Line: 14    աթոռ՝ յաստուածաբնակ քաղաքէն
Line: 15    Երուսաղեմէ եւ ՛ի սրբոյն Յակոբայ յեղբօրէ Տեառըն
Line: 16    ընկալեալ զձեռնադրութիւն. եւ դուք սահման
Line: 17    էք այնր վիճակի. առանց կամաց խորհըրդակցութեան
Line: 18    բոլորեցունց հարց եւ եղբարց աթոռակցաց
Line: 19    իմոց՝ այդ զիա՞րդ լինիցի. զի նոր է
Line: 20    գործս եւ կարեւոր խորհուրդս"։

Line: 21       Լուեալ զայս ամենայն յեպիսկոպոսէն՝ կատարեցին
Line: 22    զհրամանն եւ արձակեցին զնա պատուով
Line: 23    յաշխարհն իւր։



Next part


This text is part of the TITUS edition of Movses Kalankatowaci, Patmowtiwn Alowanic Asxarhi.

Copyright TITUS Project, Frankfurt a/M, 23.8.2008. No parts of this document may be republished in any form without prior permission by the copyright holder.