Խօսեցաւ տ(է)ր ընդ մովսիսի՝ եւ ասէ։
խօսեա́ց ընդ որդիսդ ի(սրաէ)լի՝ եւ ասասցե́ս ցնոսա։ Սո́ւրբ եղերուք. զի ես ս(ուր)բ եմ տ(է)ր ա(ստուա)ծ ձեր։
Իւրաքանչիւր ՛ի հօրէ եւ ՛ի մօրէ իւրմէ երկնչիջի́ք։ Եւ զշաբաթս իմ պահեսջի́ք. զի ե́ս եմ տ(է)ր ա(ստուա)ծ ձեր։
Մի́ երթայցէք զհետ կռոց. եւ աստուածս ձուլածոյս մի́ առնիցէք ձեզ։ ե́ս եմ տ(է)ր ա(ստուա)ծ ձեր։
Եւ եթէ զոհիցէք զոհ փրկու(թ)ե(ան) տ(եառ)ն, զընդունելի́ս ձեր զոհեսջիք։
Յաւուր յորում մատուցանիցի՝ կերիցի́, եւ ՛ի վաղիւ անդր. եւ եթէ մնասցէ մինչեւ ցօրն երրորդ՝ հրո́վ այրեսցի։
Ապա թէ ուտելո́վ ուտիցի յաւուրն երրորդի, անզո́հ է, մի́ ընկալցի.
եւ որ ուտիցէ զայն՝ մե́ղս առցէ. զի զսրբու(թ)ի(ւն) տ(եառ)ն պղծեաց, եւ սատակեսցին անձինքն որ ուտիցեն՝ ՛ի ժողովրդենէ իւրեանց։
Եւ ՛ի հնձել հնձողաց ձերոց զհունձս երկրին ձերոյ, մի́ սպառիցէք զհունձս անդոց ձերոց մօտ հնձելով. եւ զանկեալն ՛ի հնձոց քոց մի́ ժողովեսցես։
Եւ զայգի քոյ ճռաքաղ մի́ առնիցես։ եւ պտղաքաղ այգւոյ մի́ լինիցիս։ տնանկին եւ պանդխտի́ թողուցուս զայն. ե́ս եմ տ(է)ր ա(ստուա)ծ ձեր։
Մի́ գողանայցէք. եւ մի́ ստիցէք. եւ մի́ զրպարտիցէք իւրաքանչիւր զընկե́ր իւր։
Եւ մի́ երդնուցուք սուտ յանո́ւն իմ. եւ մի́ պղծիցէք զանուն տ(եառ)ն ա(ստուծո)յ ձերոյ. ե́ս եմ տ(է)ր ա(ստուա)ծ ձեր։
Մի́ զրկեսցես զընկեր քո, եւ մի́ յափշտակեսցես։ Մի́ ագցին վարձք վարձկանին առ քեզ մինչեւ ցառաւօտ։
Զհամրն մի́ զզուիցես։ եւ առաջի կուրին գայթագղութի(ւն) մի́ դնիցես։ եւ երկնչիցի́ս ՛ի տ(եառն)է ա(ստուծո)յ քումմէ։ Ե́ս եմ տ(է)ր ա(ստուա)ծ քո։
անիրաւութի(ւն) ՛ի դատաստանի մի́ առնիցես. եւ ակն աղքատի մի́ առնուցուս. եւ մի́ երեսաց աչառիցես հարստի. արդարու(թեամ)բ դատեսցի́ս զընկեր քո։
Եւ նենգութ(եամ)բ ընդ ազգի քում մի́ գնայցես։ եւ յարիւն ընկերի քոյ մի́ յօժարիցիս։
մի́ ատեսցես զեղբայր քո ՛ի մտի քում։ Յանդիմանութ(եամ)բ յանդիմանեսցես զընկե́ր քո, եւ մի́ ընդունիցիս վ(ա)ս(ն) ն(ո)ր(ա) զմեղս։
Մի́ խնդրեսցէ վրէժ ձեռն քո։ եւ ընդ որդւոց ժողովրդեան քոյ ոխս՝ մի́ ունիցիս։
զօրէնս իմ պահեսջի́ր։
Եթէ ոք ննջեսցէ ընդ կնոջ արութ(եամ)բ սերման. եւ նա՝ իցէ աղախին պահեալ առն, եւ փրկանօք չիցէ́ փրկեալ, եւ ազատութ(եամ)բ չիցէ́ ազատեալ. հարց եւ փորձ լիցի ն(ո)ց(ա). եւ մի́ մեռանիցին՝ զի չիցէ́ ազատեալ։
Եւ մատուսցէ ընդ յանցանաց իւրոց տ(եառ)ն առ դրան խորանին վակյութե(ան) խո́յ յանցանաց։
եւ քաւեսցէ́ վ(ա)ս(ն) նորա քահանայն խոյի́ւն յանցանաց առաջի տ(եառ)ն վ(ա)ս(ն) մեղացն զոր մեղաւ. եւ թողցի նմա մեղքն՝ զոր մեղաւ։
Եւ յորժամ մտանիցէք յերկիրն՝ զոր տ(է)ր ա(ստուա)ծ տացէ ձեզ, եւ տնկիցէք զա(մենայ)ն փայտ ուտելի, սրբեսջի́ք զպղծութի(ւն) ն(ո)ր(ա). եւ պտուղ ն(ո)ր(ա) զերեամ պի́ղծ լիցի ձեզ, եւ մի́ կերիցի։
Եւ յամին չորրորդի եղիցի ա(մենայ)ն պտուղ ն(ո)ր(ա) սուրբ, օրհնեա́լ տ(եառ)ն.
եւ յամին հինգերորդ կերիջի́ք զպտուղ ն(ո)ր(ա). յաւելուա́ծ ձեզ լինիցին բերք ն(ո)ր(ա)։ Ե́ս եմ տ(է)ր ա(ստուա)ծ ձեր.
՛ի վ(ե)ր(այ) լերանց մի́ ուտիցէք։ Եւ մի́ հմայիցէք. եւ մի́ հաւահարց՝ եւ մի́ հաւագէտք լինիցիք։
Ցցունս ՛ի վարսից գլխոց ձերոց մի́ առնիցէք. եւ մի́ ապականիցէք զտեսիլ մօրուաց ձերոց։
Եւ վէտս ՛ի վ(ե)ր(այ) ոգւոյ մի́ առնիցէք ՛ի մարմինս ձեր։ Եւ գիր կտեալ մի́ առնիցէք ՛ի ձեզ։
մի́ պղծիցես զդուստր քո պոռնկեցուցանելով զնա. զի մի́ պոռկեսցի երկիրն, եւ լցցի́ երկիրն անիրաւութ(եամ)բ։
Զշաբաթս իմ պահեսջի́ք, եւ ՛ի սրբու(թ)ե(ան)ց իմոց երկնչիջի́ք, զի ե́ս եմ տ(է)ր։
Զհետ վհկաց՝ մի́ երթայցէք, եւ ՛ի գէտս մի́ յարիցիք պղծել նոքօք։
առաջի ալեաց յառնիցէ́ս, եւ պատուեսցե́ս զերեսս ծերոյն։
Եւ եթէ յարեսցի առ ձեզ եկ՝ յերկրին ձերում, մի́ նեղիցէք զնա։
իբրեւ զբնակն ձեր լինիցի ձեզ՝ եւ եկն յարեալ ՛ի ձեզ։
Մի́ առնիցէք անիրաւութի(ւն) ՛ի դատաստանի, չափս, եւ ՛ի կշի́ռս, եւ ՛ի զոյգս։
Զոյգք արդարք, եւ չափք արդարք, եւ կշիռք արդարք, եւ կապիճ արդա́ր լիցի ձեզ։ Ե́ս եմ տ(է)ր ա(ստուա)ծ ձեր՝ որ հանի զձեզ յերկրէն եգիպտացւոց։
եւ պահեսջի́ք զա(մենայ)ն զօրէնս իմ, եւ զա(մենայ)ն զհրամանս իմ. եւ արասջի́ք զն(ո)ս(ա)՝ զի ե́ս եմ տ(է)ր ա(ստուա)ծ։
