Եւ ժողովեցան որդիքն եփրեմի, եւ եկին ՛ի սեփենա. եւ ասեն ցյեփթայէ. զի՞ է զի ելեր պատերազմել ընդ որդիսն ամոնայ, եւ զմեզ ո́չ կոչեցեր երթալ ընդ քեզ։ արդ՝ այրեսցո́ւք հրով զտուն քո ՛ի վ(ե)ր(այ) քո։
Եւ ասէ ցն(ո)ս(ա) յեփթայէ. ա́յր զրկեա́լ էի ես, եւ ժողովուրդ իմ. եւ որդիք ամոնայ տառապեցուցանէին զիս յոյժ. եւ բողո́ք արկի առ ձեզ, եւ ո́չ փրկեցէք զիս ՛ի ձեռաց ն(ո)ց(ա)։
եւ տեսի զի ո́չ ոք էր որ փրկէր, եւ եդի զանձն իմ ՛ի ձեռին իմում, եւ անցի առ որդիսն ամոնայ. եւ մատնեաց զն(ո)ս(ա) տ(է)ր ՛ի ձեռս իմ։ եւ արդ ընդէ՞ր ելէք առիս յաւուր յայսմիկ մարտնչել ընդիս։
Եւ ժողովեաց յեփթայէ զա(մենայ)ն արս գաղաադու՝ եւ տայր պատերազմ ը(նդ) եփրեմի։ եւ հարին արքն գաղաադու զեփրեմ. զի ասացին ապրեալքն եփրեմի, թէ դուք գաղաադացիք ՛ի մէջ եփրեմի եւ ՛ի մէջ մանասէի էք։
Եւ կալաւ գաղաադ զկիրճս յորդանանու զեփրեմի. եւ եղեւ իբրեւ ասացին ապրեալքն եփրեմայ, թէ թո́ղ անցցուք. ասեն ցն(ո)ս(ա) արք գաղաադու. միթէ եւ դուք յեփրեմէ́ իցէք։ եւ ասեն, չեմք ՛ի ն(ո)ց(ա)նէ։
Եւ ասեն ցն(ո)ս(ա), տո́ւք մեզ նշա́ն ինչ, եւ ասացէ́ք, հա́սկ հա́սկ։ եւ ո́չ յաջողեցան խօսել այնպէս։ եւ կալան եւ կոտորեցին զն(ո)ս(ա) յանցսն յորդանանու։ եւ անկան ՛ի ժամանակին յայնմիկ յեփռեմէ քառասուն եւ երկո́ւ հազարք։
Եւ դատեաց յեփթայի զի(սրա)էլ ամս վեց։ եւ մեռա́ւ յեփթայէ գաղաադացի՝ եւ թաղեցաւ ՛ի քաղաքի իւրում ՛ի գաղաադ։
Եւ դատեաց յետ ն(ո)ր(ա) զի(սրա)էլ եսեբոն ՛ի բեթղեհեմէ։
եւ եղեն ն(ո)ր(ա) ուստերք երեսո́ւն, եւ դստերք երեսուն տուեալ արտաքս։ եւ երեսուն կին ած ուստերաց իւրոց արտաքուստ։ Եւ դատեաց զի(սրա)էլ ամս եւթն. եւ մեռա́ւ եսեբոն՝ եւ թաղեցաւ ՛ի բեթղեհէմ։
Եւ դատեաց յետ ն(ո)ր(ա) զի(սրա)էլ՝ էղոն զաբուղոնացի ամս տա́սն։
եւ մեռա́ւ էղոն զաբուղոնացի, եւ թաղեցաւ յէղիմ յերկրին զաբուղոնի։
Եւ դատեաց յետ նորա զի(սրա)էլ, աբդոն որդի եղղեքայ փարաթոնացի։
եւ եղեն ն(ո)ր(ա) որդիք քառասուն. եւ երեսուն որդիք որդւոց ն(ո)ր(ա), որ հեծանէին յիւթանասո́ւն յաւանակս. եւ դատեաց զի(սրա)էլ ամս ո́ւթ։
Եւ մեռաւ աբդոն որդի եղղեքայ փարաթոնացի. եւ թաղեցաւ յեփրաթոն, յերկրի́ եփրեմայ ՛ի լերինն ամաղեկայ։
