TITUS
Biblia Mcxetica
Part No. 519
Previous part

Chapter: 35 
Verse: 1  Link to sept   მიუგო ელიუს და ჰრქუა:

Verse: 2  Link to sept   რასათჳს ესრეთ განიზრახე სასჯელსა შინა? შენ ვინ ხარ, სთქუ, ვითარმედ: მართალ ვარ წინაშე უფლისა?

Verse: 3  Link to sept   ანუ ესემე სთქუა: ერთვე ვცოდე, აწ რა ვყო?

Verse: 4  Link to sept   მე მოგიგო შენ სიტყუაჲ და სამთა მაგათ მეგობართა შენთა.

Verse: 5  Link to sept   აღიხილენ ზეცად და იხილენ და განიცადენ ღრუბელნი, რავდენ მაღალ არიან შენგან.

Verse: 6  Link to sept   უკუეთუ სცოდე, აწ რაჲ ჰყო? ანუ თუ ფრიად უსჯულოებაჲ გიქმნიეს, რაჲ ჴელ-გეწიფების ყოფად?

Verse: 7  Link to sept   ღაღათუ მართალ ხარ, რაჲმე მისცე მას? ანუ რამე მიიღოს ჴელთაგან შენთა?

Verse: 8  Link to sept   კაცისა მსგავსისა შენისაებრ უსჯულოებაჲ შენი და ძისაგან კაცისა სიმართლე შენი.

Verse: 9  Link to sept   სიმრავლისაგან ცილისწამებისა ღაღადებდენ და ვალალებდენ მკლავისა მაგრისაგან მრავალთასა.

Verse: 10  Link to sept   და არა თქუან: სადა არს ღმერთი, რომელმან შემქმნა მე, რომელმან დააწესნა საცონი ღამისანი,

Verse: 11  Link to sept   რომელმან გამომარჩია მე ოთხფერჴთაგან ქუეყანისათა და მფრინველთაგან ცისათა.

Verse: 12  Link to sept   მუნ ღაღადებდენ და არა ისმინოს მათი და გინებისაგან უკეთურთასა,

Verse: 13  Link to sept   რამეთუ უჯერო არს. ჰნევას ხილვად უფალსა, რამეთუ თავადი ყოვლისა მპყრობელი მსტუარ არს მოქმედთა უსჯულოებისათა და მიჴსნნეს ჩუენ.

Verse: 14  Link to sept   ესაჯეღა წინაშე მისსა, უკუეთუ ვითარ შეუძლო ქებად მისა, რავდენ-იგი არს.

Verse: 15  Link to sept   და აწ არა ვინ არს, რომელმანცა მოხედა რისხვასა მისსა, და არა ცნა იგი ფრიად შეცოდებითა მით. და იობ ამაოდ აღაღო პირი მისი და უცნობელებით სიტყუათა დაამძიმებს.

Section:  

Next part


This text is part of the TITUS edition of Biblia Mcxetica.

Copyright TITUS Project, Frankfurt a/M, 22.3.2021. No parts of this document may be republished in any form without prior permission by the copyright holder.