იყო ვინმე ტომისაგან ლევისა, რომელმან მოიყვანა ცოლი ასულთაგან ლევისთა და ესუა იგი ცოლად.
მუცლად-იღო მან და შვა წული. ვითარცა იხილეს იგი მკჳრცხედ, მალვიდეს მას სამ თუე.
და ვითარ ვერღარა ეძლო დამალვად, მოიღო დედამან მისმან კიდობანაკი და მოფისა იგი ნაფთითა და შთააწვინა ყრმაჲ იგი მას და დადგა იგი მდინარის კიდესა მას.
და ჰხედვიდა დაჲ მისი შორით, რაჲთა იხილოს, რაჲ-ძი შეემთხჳოს მას.
შთავიდოდა ასული ფარაოჲსი ბანად მდინარესა მას და შიმონვარნი მისნი უვიდოდეს იმიერ და ამიერ მდინარის კიდესა მას. და იხილა კიდობანი იგი მწყურნებსა მას, მიავლინა შიმონარი და მოიღო იგი,
აღაღო და იხილა ყრმაჲ იგი, ტიროდა რაჲ Page of ms. O: 72v კიდობანსა მას შინა, და განარინა იგი ასულმან ფარაოჲსმან და თქუა: ყრმათაგან ებრაელთა არს ესე.
ჰრქუა ასულსა ფარაოჲსსა დამან მას ყრმისამან: გნებავს, თუ მოგიხადო დედაკაცსა მზარდულსა ებრაელთაგანსა და გიწოებდეს ყრმასა მაგას?
ხოლო ასულმან ფარაოჲსმან ჰრქუა მას: წარვედ და მოუწოდე. და წარვიდა ქალი იგი და უწოდა დედასა მის ყრმისასა.
და ჰრქუა მას ასულმან ფარაოჲსმან: დამიმარხე ყრმაჲ ესე და აწოებდ მაგას და მე მიგცე სასყიდელი შენი. მიიქუა დედაკაცმან მან ყრმაჲ იგი...
და შეჰგუარა ასულსა ფარაოჲსსა. და იყო იგი მისა შვილად და დასდვა სახელი მისი მოსე და თქუა; წყლისაგან გამოვიღე ეგე.
იყო დღეთა მათ მრავალთა, განმწჳსნა მოსე და განვიდა ძმათა მისთა ძეთა ისრაჱლისათა ხილვად ჭირისათჳს მათისა და იხილა კაცი ეგჳპტელი, სცემდა რაჲ კაცსა ვისმე ებრაელსა ძმათა მისთაგანსა ძეთა ისრაჱლისათა.
მიიხილა აქა და იქი და არავინ იხილა და მოკლა მეეგჳპტელი იგი და დაჰფლა იგი ქჳშასა.
განვიდა იგი მეორესა დღესა და იხილნა ორნი კაცნი ებრაელნი, რომელნი იბრძოდეს, Page of ms. O: 73r და ჰრქუა, რომელი-იგი ავნებდა მოყუასსა თჳსსა; კაცნო, ძმანი ხართ, რაჲსათჳს ავნებთ ურთიერთას?
ხოლო მან ჰრქუა: ვინ დაგადგინა შენ მთავრად და მსაჯულად ჩუენ ზედა? ანუ მოკლვაჲ ჩემი გნებავს შენ, ვითარცა მოჰკალ გუშინ მეეგჳპტელი იგი? ხოლო მოსეს შეეშინა და თქუა: უკუეთუ ესრეთ განცხადნა სიტყუაჲ ესე?
ესმა ფარაოს სიტყუაჲ ესე და ეძიებდა მოკლვად მოსეს. და წარივლტოდა მოსე პირისაგან ფარაოჲსისა და მწირობდა ქუეყანასა მადიამისასა და დაჯდა იგი ჯურღმულსა მას ზედა.
ხოლო მღდელსა მადიამისასა ესხნეს შჳდ ასულ და მწყსიდეს ცხოვართა მამისა თჳსისა იოთორისთა. და ვითარცა მოვიდეს ვსებად წყალსა. ვიდრემდე აღივსნეს წყლის სასუმელები იგი, რაჲთა ასუან ცხოვართა მამისა თჳსისათა,
მოვიდეს მწყემსნი და წარასხნეს იგინი. აღდგა მოსე და განარინნა იგინი და აღმოუვსო წყალი და ასუა ცხოვართა მათთა.
და შევიდეს იგინი იოთორისა, მამისა მათისა. ხოლო მან ჰრქუა მათ: რაჲსათჳს ისწრაფეთ შემოსლვად Page of ms. O: 73v დღეს?
ჰრქუეს მათ: კაცმან ვინმე მეეგჳპტელმან განმარინნა ჩუენ მწყემსთაგან და აღმომივსო ჩუენ წყალი და ასუა ცხოვართა ჩუენთა.
ხოლო მან ჰრქუა ასულთა თჳსთა: სადა არს? და რაჲსა დაუტევეთ კაცი იგი? მოუწოდეთ მას, რაჲთა ჭამოს პური.
და დაემკჳდრა მოსე კაცისა მის თანა და მისცა სეფორა, ასული თჳსი. ცოლად მოსეს.
და მიუდგა დედაკაცი იგი და შვა ძჱ და სახელი უწოდა მას მოსე გერსამ და თქუა: რამეთუ მწირ ვარი მე ქუეყანასა უცხოსა. და სახელი მეორისაჲ მის უწოდა ელიაზარ და თქუა: ღმერთი მამისა ჩემისაჲ შემეწია მე და მიჴსნა მე ჴელთაგან ფარაოჲსთა.
შემდგომად დღეთა მრავალთა მოკუდა მეფჱ იგი ეგჳპტისაჲ და სულთითქუმიდეს ძენი ისრაჱლისანი საქმეთა მათგან ფიცხელთა და ღაღად-ყვეს და მიიწია ღაღადებაჲ მათი ღმრთისა.
და შეისმინნა ღმერთმან სულთთქუმანი იგი მათნი და მოიჴსენა ღმერთმან აღთქუმაჲ იგი თჳსი აბრაჰამისა მიმართ, ისაკისა და იაკობისა,
და მოჰხედა ღმერთმან ძეთა ისრაჱლისათა და გამოეცხადა მათ.
