Page of ms. J: B11r ხილვაჲ აბდიაჲსი. ამას იტყჳს უფალი ღმერთი იდუმეასა; ჰამბავი გესმა უფლისა მიერ, და გარემოცვაჲ წარმართთა ზედა გამოავლინა. აღდეგით და ვდგეთ მის ზედა ბრძოლად.
აჰა ესერა მცირედი რიცხჳთა მიგეც შენ წარმართთა შორის, შეურაცხ ხარ შენ ფრიად.
ამპარტავანებამან გულსა შენისამან აღგამაღლა შენ დამკჳდრებულთა ზედა ჴურელთა კლდისათა; აღამაღლებს საყოფელსა თჳსსა, და იტყჳს გულსნ თჳსსა, ვინ გარდამიყვანოს მე ქუეყანად.
დაღათუ აღჰმაღლდე ვითარცა ორბი, გინა თუ დაიდგნე შორის ვარსკულავთა ბუდენი შენნი, მიერ გარდამოგაგდო შენ, იტყჳს უფალი.
უკუეთუმცა მპარავნი შევიდეს შენდა, ანუ ავაზაკნი ღამჱ, სადამცა გა<ნ>ჰვარდი, არამცა იპარესა ფრიად თავისა თჳს<ი>ა, და უკუეთუმცა მსთულებელნი შევიდეს შენდა, არამცა დაუტევეს სამყნელი კჳრტი.
ვითარ გამოიკულია ესავ, და შეიპყრა დამალული მისი;
ვიდრე საზღვრადმდე განგავლინეს შენ, ყოველთა კაცთა აღთქუმისა შენისათა წინა-აღგიდგეს შენ, და შეგიძლეს შენ კაცთა მშჳდობისა შენისათა, და გიდვეს დასაბრკოლებელი ქუეშჱ შენსა, არა არს გულის-ჴმის-ყოფა მას შინა.
მას დღესა შინა წარვწყმიდნე ბრძენნი იდუმეაჲთ, და გულის-ჴმის-ყოფაჲ მთისაგან ესავისა, იტყჳს უფალი.
და შეძრწუნდენ მბრძოლნი იგი ახოვანნა შენნი თემანელნი, Page of ms. J: B1r რაჲთა აღიჴოცოს კაცი მთისაგან ესავისა,/
კლვისა მისთჳს და შეცოდებისა ძმისა შენისა იაკობისა. დაგფაროს შენ სირცხჳლმან, და აღიჴოცო უკუნისამდე.
ვინაჲთ დღითგან წინა-აღუდეგ წინაშე მტერად, დღესა მას წარტყუენაისა<სა> უცხოთესლთაგან ერი მისი, და უცხონი შევიდეს ბჭეთა მისთა, და იჱრუსალემსა ზედა განაგდეს წილი, და თქუენ ხართ ვითარცა ერთი მათგანი.
და ნუ დაივიწყებ დღესა ძმისა შენისასა დღესა მას უცხოთესლთასა, და ნუ მოგცხრებინ ძეთა ზედა იუდაჲსთა დღესა წარწყმედისა მათისასა, და ნა დიდსა იტყჳ დღესა ჭირისასა,
ნუცა შეხუალ ბჭეთა ერისათა დღესა სალმობისა მათისასა, და ნუ მიხედავ შენ შესაკრებელსა მათსა დღესა მოწყუედისა მათისასა, და ნუცა დაშჯერდები ძალსა მათსა ზედა დღესა წარწყმედისა მათისასა,
ნუცა მიადგები განსავალსა მათსა მოსრვად განრინებულთა მათთა, ნაცა შეაყენებ მეოტთა მათთა დღესა ჭირისასა.
რამეთუ ახლოს არს დღჱ უფლისაჲ ყოველთა ზედა თესლთა, ვითარცა იგი ჰყავ, ეგრევე გეყოს შენ, მისაგებელი შენა მიგეგოს შენ თავსა შენსა.
რამეთუ ვითარცა იგი სუემდ მთასა წმიდასა ჩემსა, <ეგრე> სუმიდენ ყოველნი ნათესავნი ღჳნასა, სუმიდენ, და დაეცნენ იგინი, და იქმნნენ ვითარცა არა-ყოფილნი,
ხოლო მთასა სიონსა იყოს მაცხოვარებაჲ, და იყოს იგი წმიდა, და დაიმკჳდრნეს სახლმან იაკობისმან, რომელთა დაიმკჳდრნეს იგინი. Page of ms. J: B1v
და იყოს სახლი იაკობისი ცეცხლ, და სახლი იოსებისი ალ ცეცხლის,/ ხოლო სახლი ესავისი ლერწამ, და აღ<ა>ტყდენ ვითარცა ლერწამნი მათ ზედა, და შეჭამნას იგინი; და არა იყოს უცეცხლო სახლი ესავისი, რამეთუ უფალი იტყოდა.
და დაიმკჳდრონ რომელნი არიან ნაგებს შინა მთაჲ იგი ესავისი, და რომელნი არიან სეფელას შინა უცხოთესლნი იგი და დაიმკჳდრონ მთაჲ იგი ეფრემისი, და ველი იგი სამარიაჲსაჲ და ბენიამენი და გალაადი;
და მწირობისა იგი დასაბამი ესე არს ძეთა ისრაჱლისათჲ; ქუეყანაჲ ქანანელთაჲ ვიდრე სარეფთადმდე, და სამკჳდრებელი ისრაჱლისაჲ ვიდრე ეფრეთადმდე დაიმკჳდრონ ქალაქები გეთისაჲ.
და გამოვიდენ განრინებულნი მთისაგან სიონისა შურის-ძიებად მთასა ესავისსა, და იყოს უფლისა მეუფებაჲ.: .: .:
