შეკერბით და შეიკრენით ნათესავი ეგე უსწავლელი ვიდრე ყოფადმდე თქუენდა.
ვითარცა ყუავილნი წარმავალნი დღენი თქუენნი, ვიდრე მოწევადმდე თქუენ ზედა რისხვაჲ უფლისაჲ, ვიდრე მოსლვადმდე თქუენ ზედა დღისა მის რი<ს>ხვისა გულის-წყრომისა უფლისაჲსა.
ვძიეგდით უფალსა ყოველნი მდაბალნი ქუეყანისანი, სამართალსა იქმოდეთ, და სიმართლესა ეძიებდით, და იტყოდეთ მართლ, რაჲთა დაიფარნეთ დღესა მას რისხვისა უფლისასა.
რამეთუ გაზაჲ მიმოსატაცებელ იყოს, და ასკალონი განსარყუნელ, და აზოტჱ შუვა Page of ms. J: A17v სამხრის განვარდეს, და აკარონი ძირით აღიფხურეს./
ვაჲ რომელნი დამკჳდრებულ არიან ნაწილებსა ზღჳსასა. მწირნი კრეტესანი, სიტყუაჲ უფლისაჲ თქუენ ზედა, ქანაან ქუეყანაო უცხოთესლთაო, და წარგწყმიდნა თქუენ სამკჳდრებელისაგან თქუენისა.
და იყოს კრეტე საძოვარ სამწყსოთა, და სადგურ ცხოვართა;
და იყოს ნაწილები იგი ზღჳსაჲ ნეშტთა მათ სახლისა იუდაჲსთა. მას ზედა ძოვდენ სახლთა შინა ასკალონისათა, მიმწუხრი დაემალნენ პირისაგან ძეთა იუდაჲსთა, რამეთუ მოხედვა ყოს მათ ზედა უფალმან ღმერთმან, და მოაქციოს ტყუჱ მათი.
მესმნას ყუედრებანი მოაბისანი, და დაქენჯნანი ძეთა ამონისთანი, რომლითა აყუედრებდეს ერსა ჩემსა, და განდიდნებოდეს საზღვართა ზედა ჩემთა.
ამისთჳს ამას იტყჳს უფალი, ცხოველ ვარ მე, თქუა უფალმან ძალთამან ღმერთმან ისრაჱლისამან, ვითარმედ მოაბი ვითარცა სოდომაჲ იყოს, და ძენი ამონისნი ვითარცა გომორაჲ. და დამასკჱ მოკლებულ ვითარცა ზჳნი კალოჲსაჲ, და განირყუნეს უკუნისამდე. და ნეშტნი ერისა ჩემისანი აღიჭრიდენ მათ, და ნეშტთა ერისა ჩემისათა დაიმკჳდრნენ იგინი.
ესე ეყოს მათ გინებისა მათისა წილ; რამეთუ აყუედრებდეს და განდიდნებოდეს უფლისა ზედა ყოვლისა-მპყრობელისა.
გამოჩნდეს უფალი მათ ზედა, და მოსჴნეს ყოველნი ღმერთნი ნათესავთა მათ ქუეყანისათანი, და თაყუანის-სცემდენ მას მხოლოსა კაცად-კაცადი ადგილით თჳსით ყოველნი ჭალაკნი თესლებისანი.
და თქუენ ეთიოპელნი წყლულებითა მახჳლი<სა ჩემისაჲ>თა იყვნეთ.
და განითხრას ჴელი მისი ჩრდილოდ, და წარწყმიდოს ასურასტანელი იგი, და დადვას ნინევჱ განსარყუნელად Page of ms. J: A18r ურწყულად ვითარცა ოჴერი.
და ძოვდენ შორის მისსა სამწყსონი,/ და ყოველნი მჴეცნი ქუეყანისანი, და მსუენ-ლომნი და გრძღაბნი სართულთა მისთა დაადგრენ, და მჴეცნი ღაღადებდენ ჴევნებსა მათსა, და ყორანნი ბჭეებსა მისსა. რამეთუ ვითარცა ნაძჳ აღდგომაჲ მისი.
