Page of ms. J: A19r მეორესა წელსა დარიოზ მეფისასა, თთუესა მეექუსესა, ერთსა თჳსასა, იყო სიტყუაჲ უფლისაჲ ჴელითა ანგეაჲსითა წინაწარმეტყუელისაჲთა, და თქუა; არქუ ზორობაბელს სალათიელისსა ტომისა იუდაჲსსა, და იესუს იოსედეკისსა მღდელსა მას დიდსა, და თქუა.
ამას იტყჳს უფალი ყოვლისა-მპყრობელი და თქუა; ერი ესე იტყჳს, არღა მოწევნულ არს ჟამი შჱნებად სახლისა უფლისა.
და იყო სიტყუაჲ <უფლისაჲ> ჴელითა ანგეს წინაწარმეტყუელისაჲთა, და თქუა;
უკუეთუ თქუენი ჟამი არს ყოფად სახლებსა სართულედსა, ხოლო ყრობელი, განაწესენით გულნი თქუენნი გზათა თქუენთა.
სთესეთ ფრიად, და შეიღეთ მცირედ; შჭამეთ და არა მაძღრივ; სუთ და არა სიმთრვალედ, შეიმოსეთ და ვერ განსტეფით, და რომელი სასყიდელსა შეიკრებდა, შეიკრიბა ტჳრთსა შინა განჴურეტილსა.
ამას იტყჳს უფალი ყოვლისა-მპყრობელი; ღაისხენით გულნი თქუენნი გზათა თქუენთა.
აღვედით მთად, და მოკაფეთ ძელი, და აღაშჱნეთ სახლი ჩემი, და სათნო ვიყო მას შინა, და ვი/დიდო Page of ms. J: A19v მე, იტყჳს უფალი.
და მიხედეთ ფრიადსა, და იქმნა მცირედ; და შეიღეთ სახლთა თქუენთა, და გამოვაქრიე იგი მიერ; ამისთჳს ამას იტყჳს უფალი ყოვლისა-მპყრობელი, ამისთჳს რამეთუ სახლი ჩემი ოჴერ არს, ხოლო თქუენ შეხჳდეთ კაცად-კაცადი სახლსა თჳსსა.
ამისთჳს აღიპყრას ცამან ცუარი, და ქუეყანამან დააყენოს გამომცენარჱ მისი.
და მოვჰჴადო მახჳლი ქუეყანასა ზედა და მთათა ზედა და იფქლსა და ღჳნოსა და ზეთსა, და რავდენი რაჲ გამოაქუს ქუეყანასა, და კაცთა ზედა და საცხოვართა, და ყოველსა ზედა ნაშრომსა ჴელთა მათთასა.
და ესმა ზორობაბელს სალათიელისსა ნათესავისაგან იუდაჲსა, და იესუს იოსედეკისსა მღდელსა მას დიდსა, და ყოყელსა მას ნეშტსა ერისასა ჴმაჲ უფლისა ღმრთისა მათისაჲ, და სიტყუანი ესე ანგეს წინაწარმეტყუელისანი, რამეთუ გამოავლინა იგი უფალმან ღმერთმან მათმან მათდა, და შეეშინა ერსა მას პირისაგან უფლისა.
და თქუა ანგეოს ანგელოზი უფლისაჲ ანგელოზთა შორის უფლისათა ერისა მიმართ, მე ვარ თქუენ თანა, იტყჳს უფალი.
და აღადგინა უფალმან სული ზორობაბელისი ტომისაგან იუდაჲსი სალათიელეანისაჲ, და სული იესუისი ძისა იოსედეკისი მღდელისა მის დიდისაჲ, და სული ყოვლისა მის ნეშტისა ერისაჲ, და შევიდეს და იქმოდეს საქმესა მას სახლისა უფლისასა ყოვლისა-მპყრობელისა ღმრთისა მათისასა.:
