მას დღესა შინა იყოს ყოველი ადგილი განღებულ სახლსა დავითისა და მკჳდრთა იჱრუსალემისათა მიმოსარყეველად და საპკურებელად;
და იყოს მას დღესა შინა, იტყჳს უფალი საბაოთ, მოვსპო სახ<ე>ლები კერპთაჲ ქუეყანით, და არღარა იყოს მერმე საჴსენებელი მათი; და ცრუ-წინაწარმეტყუელნი და სული არა-წმიდაჲ აღვჴოცო ქუეყანით.
და იყოს უკუეთუ წინაწარმეტყუელებდეს კაცი მერმე, ჰრქუან მამამან მისმან და დედამან მისმან, რომელთა შვეს იგი; ვერ სცხონდე, რამეთუ ნაცილსა იტყოდე სახელითა უფლისაჲთა; და შეკრან იგი მამამან მისმან და დედამან, რომელთა შვეს იგი წინაწარმეტყუელებასა მას შინა.
და იყოს მას დღესა შინა ჰრცხუენეს წინაწარმეტყუელთა კაცად-კაცადსა ხილვისაგან მისისა წინაწარმეტყუელებასა მას მათსა, და შეიმოსონ ტყავი თხისაჲ ამისთჳს, რამეთუ ტყუოდეს.
და ჰრქუას რამეთუ არა ვარ წინაწარმეტყუელი მე, რამეთუ კაცი ქუეყანის-მოქმედი ვარი მე; რამეთუ კაცმან მშვა მე სიყრმით ჩემითგან.
და ჰრქუან მას, რაჲ არიან წყლულნი ეგე შორის ჴელთა შენთა, და თქუას, რომელ ვიწყალ სახლსა შინა საყუარელისა ჩემისასა.
აწ მახჳლი ეგე აღდეგ მწყემსთა ზედა, და კაცსა ზედა მოქალაქისა მისისასა. იტყჳს უფალი ყოვლისა-მპყრობელი; დავსცე მწყემსსა, და განიბნინად ცხოვარნი, და მოვაქციო ჴელი ჩემი მწყემსთა ზედა.
და იყოს მას დღესა შინა, იტყჳს უფალი, ორი წილი მას შინა მოისრას და მოაკლდეს, და მესამე იგი დაშთეს მას შინა.
და განვიყვანო მესამე იგი ნაწილი ცეცხლისაგან, და გამოვაჴურვო იგი ვითარცა გამოიჴურვის ვეცხლი, და გამოვცადნე იგინი ვითარცა გამოიცადის ოქროჲ. მან მხადოს მე სახელი ჩემი, და მე ვისმინო მისი, და ვჰრქუა; ერი ჩემი ესე არს. და მან მრქუას, უფალი ღმერთი ჩემი ხარი შენ.: Page of ms. J: A30v
