და შენ, ძეო კაცისაო, მოიღე გოდებაჲ მთავარსა მას ზედა ისრაჱლისასა,
და არქუ მას, რაჲსათჳს დედაჲ შენი, ვითარცა ლეკჳ შორის ლომთა ძოვდა, და შორის ლომთა განიმრავლნა ლეკუნი თჳსნი,
და გამოხლდა ლეკუთა მიმართ, ლომ იქმნა, და ისწავა ტაცებაჲ ნატაცებთაჲ; კაცებსა ჭამდა,
და ესმა მისთჳს წარმართთა, განჴრწნილებასა მათს[ა] შეიპყრა, და მიიყვანეს იგი ჭიმითა ეგჳპტედ.
და იხილეს რამეთუ განდგომილ არს მისგან, წარწყმდა ძალი მისი. და მოიყვანა სხუაჲ ლეკუთაგან მისთა, ლომად დააწესა იგი.
და იქცეოდა იგი შორის ლომთა, ლომ იქმნა, და ისწავა ტაცებაჲ ნატაცებისაჲ; <კაცებსა> ჭამდა,
და ძოვდა იგი სიხუესტითა თჳსითა, და ქალაქები მათი მოაოჴრა, და განრყუნა ქუეყანაჲ და სავსებაჲ მისი ჴმისაგან ზახებისა მისისა.
და მოსცეს მის ზედა ნათესავთა სოფლებისაგან გარემო, და განჰმარტეს მის ზედა ბადე მათი; განჴრწნითა მათითა შეიპყრა.
და დადვეს იგი Page of ms. J: B75v ჭიმითა და გალი/აკითა; მოვიდა იგი მეფისა ბაბილოვნელთაჲსა, და შეიყვანეს იგი საპყრობილედ, რაჲთა არა ისმეს ჴმაჲ მისი მთათა ზედა ისრაჱლისა<თა>.
დედაჲ შენი ვითარცა ვენაჴი. ვითარცა ყუავილი ბროწეულსა წყალთა ზედა დანერგული; მცენარჱ მისი და ნაყოფი მისი იყო წყალთაგან მრავალთა.
და იყო მისა კუერთხი ტოჰმთა ზედა წინამძღუართა, და განმწჳსნა სიდიდითა მისითა შორის ხეთა, და იხილა სიკეთჱ თჳსი სიმრავლითა რტოთა თჳსთაჲთა.
და შეიმუსრა გულის-წყრომითა, და დაეცა ქუეყანასა, და ქარმან ცხელმან განაჴმნა რტონი მისნი, და შური იძია მათგან, და განჴმა კუერთხი იგი ძლიერებისა მისისაჲ, და ცეცხლმან განლია იგი.
და აწ დაჰნერგეს იგი უდაბნოსა ქუეყანასა ურწყულსა.
და გამოჴდა ცეცხლი კუერთხისაგან რჩეულითა მისთაჲსა, და შეჭამა იგი, და არა იყო მას შინა კუერთხი ძლიერებისაჲ, ტოჰმი, იგავი გოდებისაჲ არს, და იყო<ს> გოდებად.;
