უმცირეს ვიყავ მე ძმათა ჩემთა შორის და უმრწემეს სახლსა მამისა ჩემისასა და ვმწყსიდი მე საცხოვართა მამისა ჩემისათა.
ჴელთა ჩემთა ქმნეს საგალობელი, და თითთა ჩემთა განაგეს საქებელი.
და ვინ-მე მიუთხრას ესე უფალსა ჩემსა? და თავადმან უფალმან ისმინა ჩემი.
და თავადმან უფალმან გამოავლინა ანგელოზი მისი და გამომიყვანა მე საცხოვართაგან მამისა ჩემისათა და მცხო მე ზეთითა ცხებულებისა მისისაჲთა.
ხოლო ძმანი ჩემნი იყვნეს უკეთჱს და უშუენიერეს, და არა სთნდეს იგინი უფალსა.
განვედ მე შემთხუევად უცხო თესლსა მას და მწყევდა მე სახელის-დებით კერპთა მიმართ თჳსთა;
ხოლო მე სახელითა უფლისა ღმრთისა ჩემისაჲთა მოვიღე მახჳლი იგი მისი და მოვჰკუეთე თავი მისი და აღვჴოცე ყუედრებაჲ ძეთაგან ისრაელისათა.
