Page of ms. P: 322r ხოლო შენ, ისრაჱლ, მონაჲ ჩემი ხარი შენ, იაკობ, რომელი გამოგირჩიე, ნათესავი აბრაჰამისი, რომელი შევიყუარე,
რომელსა გიპყარ ჴელი კიდითგან ქუეყანისაჲთ და საებგუროჲთგან მისით გიწოდე შენ და გარქუ: მონაჲ ჩემი ხარი შენ, გამოგირჩიე და არა დაგიტეო შენ.
ნუ გეშინინ, რამეთუ მე შენ თანა ვარ, ნუცა სცთები; რამეთუ მე ვარ, რომელმან განგაძრიელე შენ და შეგეწიე შენ და განგამაგრე შენ მარჯუენითა ჩემითა მართლითა.
აჰა, ესერა, ჰრცხუენოდის და კდემულ იყვნენ ყოველნი მტერნი შენნი, რამეთუ იქმნნენ ვითარცა არა ყოფილნი, და წარწყმდენ ყოველნი მსაჯულნი შენნი.
ეძიებდე და არა ჰპოვნე კაცთა მათ, რომელთა შეურაცხ-გყვეს შენ, რამეთუ იქმნნენ ვითარცა არარანი, და არა იყვნენ ბრძოლანი იგი შენნი.
რამეთუ მე ვარ უფალი, რომელმან გიპყარ მარჯუენჱ შენი გარქუ: ნუ გეშინინ.
შვილო ჩემო იაკობ და მცხუედო ჩემო ისრაჱლ, შეგეწიო შენ, იტყჳს უფალი, მჴსნელი შენი, ღმერთი ისრაჱლისაჲ.
აჰა, ესერა, გყავ შენ, ვითარცა ურმისთუალი მლეწველი, ახალი ხერხის სახჱ, და დაჰლეწნე მთანი და დააწულილნე ბორცუნი და ვითარცა მიწაჲ დასხნე.
და განაქრიო, და ქარმან წარიხუნეს იგინი. ხოლო შენ იხარებდე წმიდისა მიმართ ისრაჱლისა და მხიარულ იყო.
და იხარებდენ გლახაკნი და ნაკლულევანნი. რამეთუ ეძიებდენ წყალსა, და არა იყოს; და ენაჲ მათი წყურილითა განჴმეს. Page of ms. P: 322v მე ვარ უფალი ღმერთი, მე ვისმინო მათი, ღმერთმან ისრაჱლისამან, და არა დაუტევნე იგი,
არამედ გამოვადინნე მათ ზედა მდინარენი და შორის ველთა წყაროები ვყო, უდაბნოჲ წყურნებად წყალთა, და ქუეყანასა წყურიელსა დიოდის ნაკადულები წყალთაჲ.
და აღმოვაცენო ქუეყანასა ურწყულსა ნაძჳ და ბზაჲ და მურტი და საროჲ და ვერხჳ.
რამეთუ იხილონ და ცნან და გულისხმა-ყონ და ჰრწმენეს ერთბამად, რამეთუ ჴელმან უფლისამან შექმნა ესე ყოველი და წმიდამან ისრაჱლისამაბ აჩუენა ესე.
