Page of ms. L: _ Page of ms. P: 331v ესრე იტყჳს უფალი ღმერთი ისრაჱლისაჲ და თქუა: დაწერენ თავისა შენისა ყოველნი, რომელნი გიბრძანნე შენ წიგნი,
რამეთუ, აჰა, ესერა, დღენი მოვლენან იტყჳს უფალი, და მოვაქციო ტყუჱ ერისა ჩემისა ისრაჱლისაჲ და იუდაჲსი, თქუა უფალმან, და მოვაქციო იგი ადგილსავე მას, რომელი მივეც მამათა მათთა, და ეუფლნენ მათ.
და ესე სიტყუანი არიან, რომელსა იტყოდა უფალი ღმერთი ისრაჱლისაჲ და იუდაჱსი.
ესრე იტყჳს უფალი: ჴმაჲ შიშისაჲ ისმინეთ, შიში, და არა არს მათ თანა მშჳდობაჲ.
ჰკითხეთ უკლუე და იხილეთ, უკუეთუ შვა წულმან? და შიშისათჳს, რომლითა შეიპყრნე წელნი შენნი და ცხორებაჲ? რამეთუ ვიხილე კაცი და ჴელნი მისნი წელთა, ვითარცა შობადი; მიიქცეს ყოველი პირი, განრყუნად გარდაიქცა.
რამეთუ დიდ არს დღჱ იგი, და არა არს ეგევითარი ჟამი იაკობისი და ამისგან ცხონდეს,
და იყოს, მას დღესა შინა, თქუა უფალმან ძალთამან, შევმუსრო უღელი ქედსა ზედა მათსა და საკრველნი მათნი განვხეთქნე, და არღარა უქმოდიან იგინი უცხოთა მერმე,
არამედ უქმოდიან იგინი უფალსა და დავითს, მეფესა მათსა, რომელი აღუდგინო მათ.
ხოლო შენ ნუ გეშინინ, მონაო ჩემო იაკობ, ნუცა შესძრწუნდები, ისრაჱლ, რამეთუ, აჰა, ესერა, გიჴსნე შენ შორით და ნათესავი შენი ტყუეობისაგან მათისა; და მოიქცეს იაკობი და დაეყუდოს და იშუებდეს, და არავინ იყოს მაშინებელ.
რამეთუ შენ თანა ვარ მე, იტყჳს უფალი, განრინებად შენდა. Page of ms. P: 332r რამეთუ ვყო მოკლებაჲ ყოველთა თესლთაჲ, რომელთა შორის გაგაბნიე შენ; ხოლო შენი არა ვყო აღსასრული და განგსწავლო შენ სამართლად.
