Page of ms. P: 272r წელსა მესამესა იოაკიმ მეფისა ჰურიასტანისასა მოვიდა ნაბუქოდონოსორ, მეფჱ ბაბილოვნელთაჲ, იერუსალჱმდ, და მოიცვიდა მას
და მისცა უფალმან ჴელთა მისთა იოაკიმ, მეფჱ ჰურიასტანისაჲ, ფასით, ერითურთ სახლისა მისგან ტაძრისა ღმრთისა. მოვიდა და მოიღო იგი ქუეყანასა მას სენაათსა და ფასი იგი მოიღო და შეიღო სახლსა თჳსსა.
და უბრძანა მეფემან ასფანელსს, ეზოჲსმოძღუარსა თჳსსა, გამორჩევად ნატყუენავსა მისგან ძეთა ისრაჱლისათა ნათესავისა მისგან მეფეთაჲსა, ნაშობთა მათგან არშაკთა
ყრმანი რჩეულნი, რომელთა თანა არა იყო რაჲვე ბიწი ქმნულკეთილ პირითა, გონიერნი, სიბრძნითა წურთილნი, გულითა მზრახვალნი .რჩეულნი ძრიელნი, რაჲთა მარადის დგენ წინაშე მეფისა .და უბრძანა Page of ms. P: 159v მათი განსწავლაჲ წიგნისაჲ და მეცნიერებისაჲ ზრახვისა ქალდეველთაჲსა.
და შეაბა მეფემან როჭიკი სამარადისოჲ ტაბლათაგან მეფეთაჲსა და ღჳნოჲ მეფისა სასუმელი, რაჲთა განზარდნეს იგინი და განსწავლნეს სამ წელ და მერმე მოჰგუარნეს წინაშე მეფისა და დაადგინნეს მსახურად.
Page of ms. P: 272v და მოიპოვნეს ძეთაგან იუდაჲსთა ყრმანი რჩეულნი: [დანიელ], ანანია, აზარია და მისაელ.
და დასდვა მათ სახელები ეზოჲსმოძღუარმან მან: ბალტასარ სედრაქ, მისაქ და აბედნაგო.
და დაიდვა გულსა თჳსსა დანიელ, რაჲთა ყოვლადვე არა იხილოს გემოჲ ტაბლისაგან მეფისა და არცა სასუმლისაგან მისისა. და მოვიდა და ევედრებოდა ეზოჲსმოძღუარსა მას, რაჲთა არა სძლოს მათ გემოჲს ხილვად მისგან.
და მისცა უფალმან დანიელს მადლი და წყალობაჲ და შეწყნარებაჲ წინაშე ეზოჲსმოძღურისა მის.
მიუგო ეზოჲსმოძღუარმან მან დანიელს და ჰრქუა: მეშინის მე უფლისა ჩემისა მეფისაგან, რამეთუ თქუენდა როჭიკი ესე ჭამადისა და სასუმლისა თქუენისაჲ განუგიეს. ნუუკუე სადამე პირი თქუენი უმწუხარჱს იყოს სხუათა ყრმათა, ასაკის სწორთა თქუენთა, და მყოთ მე თავისა თჳსისა თანამდებ წინაშე მეფისა.
მაშინ ჰრქუა დანიელ ამელსარს, რომელი დაედგინა ეზოჲსმოძღუარსა მას;
გამო-ღა-მცადენ ათ დღე ოდენ და გუცემდ ჩუენ თვალისაგან მარცუალსა ცუდად; ვჭამოთ და წყალი ვსუათ.
და იხილეთ პირი ჩუენი თესლის მჭამელთაჲ და პირები ყრმებისა Page of ms. P: 273r მაგის, რომელნი ჭამენ ტაბლისა მისგან სამეუფოჲსა; და ვითარცა იხილო და გამოგუცადნე, ეგრეცა უყავ მონათა შენთა.
და ერჩდა მათ სიტყუასა მას და გამოცადნა იგინი ათ დღე.
და შემდგომად ათთა მათ დღეთა ეჩუენნეს პირნი მათნი სავსენი და ფეროანნი. და იგი თავადი ძრიელ და მტკიცე უფროჲს მათ ყრმათა, რომელნი ჭამდეს ტაბლისაგან სამეუფოჲსა.
და იყო, მიერითგან ამელსარ შეუმოკლა მათგან როჭიკი იგი და ღჳნოჲ, რომელი იყო სასუმელი მეფისაჲ, და სცემდა თესლსა მას საჭმლად.
და ყრმათა მათ ოთხთავე მისცა ღმერთმან გონებაჲ და სიბრძნჱ და მეცნიერებაჲ და ყოველი მწიგნობრობისა და ჴელოვნობისა სიბრძჱ. დანიელ იყო მეცნიერ ყოველსა ჩუენებასა ზრახვათასა და სიზმართა გულისხმის-ყოფასა.
მერმე შემდგომად აღსარულსა მათ დღეთასა, რომელთაჲ ებრძა მეფესა მოყვანებაჲ, და წარუდგინნა იგინი ეზოჲსმოძღუარმან მან წინაშე ნაბუქოდონოსორ მეფესა.
და ზრახვიდა მათ თანა მეფჱ იგი. და არავინ იპოებოდა სწორ დანიელისა, ანანიაჲსა, აზარიაჲსა და მისაელისა.
და ყოველსა შინა სიტყუასა სიბრძნისასა, რასაცა ეძიებდა მეფჱ მათგან, პოვნა იგინი უმეტჱს ათწილ ყოველთა მეცნიერთა და მოგუთა, რომელნი იყვნეს მეფობასა მისსა.
და იყო დანიელ ვიდრე ცხრა წლადმდე კუროზ მეფისა.
